പുതുപ്പള്ളിയില് ഇടതുമുന്നണിക്ക് കാലുറയ്ക്കുന്നില്ല; രക്ഷപ്പെടില്ലെന്ന പ്രചാരകരുടെ നിലവിളിക്ക് ഉത്തരം തേടി മുഖ്യമന്ത്രി പിണറായി വിജയന് കളത്തിലിറങ്ങി; കിട്ടാവുന്ന വോട്ടുകൂടി ഇല്ലാതാകാനേ പിണറായിയുടെ വരവ് ഇടയാക്കുവെന്ന് സ്വകാര്യം പറഞ്ഞ് സഖാക്കള്
പുതുപ്പള്ളിയില് ഇടതുമുന്നണിക്ക് കാലുറയ്ക്കുന്നില്ല. രക്ഷപ്പെടില്ലെന്ന പ്രചാരകരുടെ നിലവിളിക്ക് ഉത്തരം തേടി മുഖ്യമന്ത്രി പിണറായി വിജയന് കളത്തിലിറങ്ങിയിരിക്കുന്നു. കിട്ടാവുന്ന വോട്ടുകൂടി ഇല്ലാതാകാനേ പിണറായിയുടെ വരവ് ഇടയാക്കു എന്ന സഖാക്കള്തന്നെ സ്വകാര്യം പറയുമ്പോഴും 15 മന്ത്രിമാരും തലങ്ങുവിലങ്ങു പായുന്നുണ്ട്. ജെയ്ക് സി തോമസ് എന്ന സ്ഥാനാര്ഥിയല്ല പുതുപ്പള്ളിയെ തരിപ്പണമാക്കിയിരിക്കുന്നത്. ജനവിമര്ശനത്തില് ഇവിടെ ഒന്നാം പ്രതി മുഖ്യമന്ത്രി പിണറായി വിജയന് തന്നെ.
പിണറായി വിജയന്റെ മകളുമായി ബന്ധപ്പെട്ട കോഴക്കഥകള്ക്ക് വ്യക്തമായ ഉത്തരമില്ല. ഓണക്കിറ്റുപോലുമില്ലാതെ ജനത്തെ വലയ്ക്കുന്ന സര്ക്കാരിനോടുള്ള കടുത്ത അമര്ഷം സാധാരണക്കാരിലും പാവപ്പെട്ടവരിലും തിളച്ചുപൊന്തുകയാണ്. ഇത്തരമൊരു മോശം ഇമേജില് പിണറായി വിജയന് അടുത്ത കാലത്തൊന്നും ഇലക്ഷന് പ്രചരണത്തിനിറങ്ങിയിട്ടില്ല. കളം മോശമെന്നു കണ്ടതോടെ സിപിഎം പതിനെട്ടാമത്തെ അടവും പയറ്റിനോക്കിയിട്ടും ചലനമുണ്ടാക്കാന് പറ്റുന്നില്ല. പ്രചാരണം അവസാനഘട്ടത്തിലേക്ക് കടക്കുമ്പോഴും പ്രചാരണതന്ത്രങ്ങളൊന്നും വിജയിക്കുന്നുമില്ല.
ജെയ്ക്കിന്റെ പ്രചാരണത്തിന് പിണറായി എത്തുമ്പോള് ആളു കുറഞ്ഞാല് അത് സ്ഥാനാര്ഥി ജെയ്ക്കിനും കോട്ടയത്തിന്റെ മന്ത്രി വിഎന് വാസവനും വല്ലാത്ത ക്ഷീണമാകും. ഇതിന് പരിഹാരമായി പുതുപ്പള്ളി മണ്ഡലം അതിരിടുന്ന കോട്ടയം, പാലാ, കാഞ്ഞിരപ്പള്ളി, ചങ്ങനാശേരി, കടുത്തുരുത്തി മണ്ഡലത്തില് നിന്നും പ്രവര്ത്തകരെ ഇറക്കുകയാണ്. പുതുപ്പള്ളിയിലും അയര്ക്കുന്നത്തും നടക്കുന്ന ഇലക്ഷന് പ്രചാരണത്തിലേക്ക് തൊഴിലാളികളെയും കുടുംബശ്രീ വനിതകളെയുമൊക്കെയാണ് വാഹനങ്ങളില് എത്തിക്കുന്നത്. കഴിഞ്ഞയാഴ്ച മുതല് ഇത്തരത്തില് ആളെക്കൂട്ടാന് നോക്കിയിട്ടും അയ്യായിരം പേരെപ്പോലും മുഖ്യമന്ത്രിയുടെ പ്രസംഗം കേള്ക്കാന് എത്തിക്കാനാകുന്നില്ല.
പുതുപ്പള്ളി മണ്ഡലത്തിലെ എല്ഡിഎഫ് പ്രവര്ത്തകരുടെ നിസംഗതയാണ് സിപിഎമ്മിന് കുഴയ്ക്കുന്നത്. വീടുസന്ദര്ശനം നടത്തിയാല് സര്ക്കാരിനെക്കുറിച്ചു നല്ലതു പറയാന് ഒന്നുമില്ല. ഓണക്കിറ്റില്ലാത്തതും മുഖ്യമന്ത്രിയുമായി ബന്ധപ്പെട്ട കേസുകളും വിലക്കയറ്റവും അവശ്യസാധനങ്ങളുടെ ക്ഷാമവും കാര്ഷിക വിലിയിടിവും ഉള്പ്പെടെ ജനങ്ങളെ വെറുപ്പിക്കുന്ന വിഷയങ്ങളില് സഖാക്കള്ക്ക് വ്യക്തമായ ഉത്തരമില്ല. മുഖ്യമന്ത്രി പിണറായിയുടെ മകള് വീണയുടെ മാസപ്പടി വിവാദം പ്രതിപക്ഷം കെട്ടിച്ചമച്ചതാണെന്ന ഏക മറുപടി പറയുമ്പോഴും പിണറായി സംശയത്തിന്റെ നിഴലില്തന്നെ.
സിപിഎം ഇതോടകം നടത്തിയ ഒരു സമ്മേളനത്തിലും അയ്യായിരം പേരെ തികയ്ക്കാന് പാര്ട്ടി സംവിധാനത്തിനു കഴിഞ്ഞില്ല. സ്ഥലത്ത് ക്യാമ്പ് ചെയ്ത് പ്രചാരണതന്ത്രങ്ങള് മെനയുന്ന മന്ത്രി വിഎന് വാസവനുപോലും മണ്ഡലത്തില് ഉണര്വുണ്ടാക്കാന് കഴിയുന്നില്ല. കഴിഞ്ഞ തെരഞ്ഞെടുപ്പില് നിന്ന് വ്യത്യസ്തമായി കേരള കോണ്ഗ്രസ് മാണി പ്രവര്ത്തകരും അനുഭാവികളും എല്ഡിഎഫിനെപ്പം സജീവമാകുന്നില്ല.
സിപിഎം പ്രവര്ത്തരുടെ ശൈലിയുമായി യോജിക്കാന് മാണിവിഭാഗം പ്രവര്ത്തകര്ക്ക് താല്പര്യവുമില്ല. ജെയ്ക് സി തോമസ് ജയിക്കും എന്ന് പൊതുവേദികളില് നേതാക്കള് അവകാശപ്പെടുമ്പോഴും പാര്ട്ടി അണികളില് ശുഭപ്രതീക്ഷയില്ല. കഴിഞ്ഞ തെരഞ്ഞെടുപ്പില് ഉമ്മന് ചാണ്ടിക്കെതിരെ ഉണര്ന്ന യാക്കോബായ സഭാ വിരോധം സജീവമല്ലെന്നതും എല്എഡിഎഫ് പ്രതീക്ഷകള് തല്ലിക്കെടുത്തുന്നു. ബിജെപി വോട്ടുകളില്പോലും യുഡിഎഫിലേക്ക് ചോര്ച്ചയുണ്ടാകാനുള്ള സാധ്യതയാണ് സിപിഎമ്മിനെ ഇത്തവണ വെട്ടിലാക്കുന്നത്.
മരണവീടിന്റെ പ്രതീതിയാണ് എല്ഡിഎഫിന്റെ ഇലക്ഷന് പ്രചാരണ ഓഫീസുകളില്. അവാര്ഡ് പടത്തിന് ആളിരിക്കും പോലെ നാലഞ്ചു പേരും പത്തന്പത് ചുവന്ന കസേരകളും. മുഖ്യമന്ത്രി പങ്കെടുക്കുന്ന യോഗങ്ങളില് മന്ത്രിമാര് അടക്കം പ്രമുഖ എല്ഡിഎഫ് നേതാക്കളും പങ്കെടുക്കുമെന്ന പറയുമ്പോഴും ജനങ്ങളെ ഇളക്കാന് ഒരു സാഹചര്യവുമില്ല. ഉമ്മന് ചാണ്ടിയുടെ മരണം ഉണര്ത്തിയ സഹതാപതരംഗത്തിനു മുന്നില് ജനവികാരത്തെ മാറ്റിമറിക്കാനുള്ള യാതൊരു സാഹചര്യവും ഇപ്പോള് പുതുപ്പള്ളിയിലില്ല.
മാത്രവുമല്ല സോളാര് പീഡന ആരോപണത്തോടെ ഉമ്മന് ചാണ്ടിയെ സിപിഎം ആസൂത്രിതമായി അപമാനിച്ചു എന്ന തോന്നല് പൊതുസമൂഹത്തില് ശക്തവുമാണ്. വിജയസാധ്യത തെല്ലുമില്ലെങ്കിലും വിജയിക്കും എന്ന നേതാക്കളുടെ പ്രസ്താവന വിശ്വസിക്കാന് വിവരം കെട്ടവരല്ല പുതുപ്പള്ളിയിലെ ജനസമൂഹം എന്നതാണ് സിപിഎം നേരിടുന്ന പരിമിതി. ഇതുവരെ നടത്തിയ പ്രചാരണം വിലയിരുത്താന് ഇന്ന് രാവിലെ കോട്ടയത്ത് ഇടതുമുന്നണി യോഗം ചേര്ന്നിരുന്നു.
ആ രഹസ്യയോഗത്തിലും പുതുപള്ളിയില് ഇടതിന് അനുകൂലമായ തരംഗമില്ലെന്നാണ് വിലയിരുത്തലുണ്ടായത്. മുഖ്യമന്ത്രി പിണറായി ഉള്പ്പെടെ നേതാക്കള് യോഗത്തില് പങ്കെടുത്തെങ്കിലും വലിയ പ്രതീക്ഷയിലല്ല ഇതുവരെയുള്ള റിപ്പോര്ട്ടുകള്. സിപിഎം ഏരിയാ സെക്രട്ടറിമാകും എല്ഡിഎഫ് ഇലക്ഷന് പ്രചാരണ കമ്മിറ്റിയും നല്കിയ രസഹ്യറിപ്പോര്ട്ടും സിപിഎമ്മിന് വലിയ പ്രതീക്ഷ സമ്മാനിക്കുന്നില്ല. സിപിഎമ്മില്തന്നെ ഡിവൈഎഫ്ഐ, എസ്എഫ്ഐ പ്രവര്ത്തകരുടെ നിസംഗതയും പാര്ട്ടിയെ വല്ലാത അലട്ടുന്നുണ്ട്. കഴിഞ്ഞ ഇലക്ഷനില് കേരളത്തില് എല്ലാ ജില്ലകളിലും നിന്ന് യുവ ഇടതുസഖാക്കള് പുതുപ്പള്ളിയില് ജെയ്ക്കിനുവേണ്ടി പ്രചാരണത്തിനെത്തിയിരുന്നു. ഇത്തവണ മണ്ഡലം വിട്ട് സഖാക്കളാരും പ്രചാരണത്തില് സജീവമല്ല.
വി.ശിവന്കുട്ടി, അഹമ്മദ് ദേവര്കോവില്, കെ.കൃഷ്ണന്കുട്ടി, ജെ.ചിഞ്ചുറാണി, കെ.ബിന്ദു എന്നിവര് ഒഴികെയുള്ള എല്ലാ മന്ത്രിമാരും പുതുപ്പള്ളിയില് പ്രചാരണത്തിനെത്തുകയാണ്. മന്ത്രി രാജേഷ് കഴിഞ്ഞ ദിവസം പങ്കെടുത്ത യോഗങ്ങളില് നൂറു പേര് പോലും പങ്കെടുക്കാതെ വന്ന സാഹചര്യം സിപിഎമ്മില് വലിയ ആശങ്കയാണ് ജനിപ്പിക്കുന്നത്. ഈ മാസം 30, സെപ്റ്റംബര് ഒന്ന് തീയതികളില് ആറ് പൊതുയോഗങ്ങളില്കൂടി പിണറായി പ്രസംഗിക്കുന്നുണ്ട്.
സന്ദേശ സദസ് എന്ന പേരില് യോഗങ്ങള് നടത്തി മന്ത്രിമാര് പുതുപ്പള്ളിയില് വികസനമുണ്ടായില്ല എന്ന മട്ടില് പ്രസംഗിക്കാനായിരുന്നു മുന്തീരുമാനം. ഇത് വലിയ തിരിച്ചടിയുണ്ടാകുമെന്ന അഭിപ്രായത്തില് ഉമ്മന് ചാണ്ടിയെ ഇനി കുറ്റപ്പെടുത്തി പ്രചാരണം വേണ്ടെന്നാണ് പൊതുനിര്ദേശം. സര്ക്കാരിനും വിവിധ വകുപ്പുകള്ക്കും ഇമേജ് നഷ്ടപ്പെട്ടതോടെ ഉപതിരഞ്ഞെടുപ്പില് മന്ത്രിമാര് വിട്ടുനില്ക്കുന്നെന്ന ആരോപണത്തെ പ്രതിരോധിക്കുക കൂടിയാണ് സന്ദേശ സദസിലൂടെ ലക്ഷ്യം വയ്ക്കുന്നത്.
തൃക്കാക്കര ഉപതിരഞ്ഞെടുപ്പില് വീടുകയറി വോട്ടു ചോദിക്കാനടക്കം എത്തിയ മന്ത്രിമാര് പുതുപ്പള്ളിയില് നിന്നു വിട്ടു നില്ക്കുകയാണെന്നു വിമര്ശനം ഉയര്ന്നിരുന്നു. പുതുപ്പള്ളില് ഒന്നേ മുക്കാല് ലക്ഷത്തിലേറെ വോട്ടര്മാരാണുള്ളത്. മണ്ഡലത്തിലെ റിക്കാര്ഡ് തോല്വിയിലേക്കാണ് ഇത്തവണത്തെ ഇലക്ഷന് പ്രചാരണം അവസാനഘട്ടത്തിലെത്തുന്നതെന്ന വിലയിരുത്തലിലാണ് പിണറായി കളത്തിലിറങ്ങിയിരിക്കുന്നത്. ജെയ് കഴിഞ്ഞ തവണ പിടിച്ച 54000 വോട്ടുകളില് എത്ര കുറയും എന്നതില് കണക്കുകൂട്ടുന്ന പ്രവര്ത്തരും കുറവല്ല.
https://www.facebook.com/Malayalivartha