നവകേരള സദസെന്ന അശ്ലീല കെട്ടുകാഴ്ചയുടെ പേരില് മുഖ്യമന്ത്രിയെത്തുന്ന ജില്ലകളില് യു.ഡി.എഫ് പ്രവര്ത്തകരെ വ്യാപകമായി കരുതല് തടങ്കലിലാക്കുകയും പൊലീസും സി.പി.എം പ്രവര്ത്തകരും ആക്രമിക്കുകയും ചെയ്യുന്നു; ആരോപണവുമായി പ്രതിപക്ഷ നേതാവ് വി ഡി സതീശൻ
നവകേരള സദസെന്ന അശ്ലീല കെട്ടുകാഴ്ചയുടെ പേരില് മുഖ്യമന്ത്രിയെത്തുന്ന ജില്ലകളില് യു.ഡി.എഫ് പ്രവര്ത്തകരെ വ്യാപകമായി കരുതല് തടങ്കലിലാക്കുകയും പൊലീസും സി.പി.എം പ്രവര്ത്തകരും ആക്രമിക്കുകയും ചെയ്യുന്നുവെന്ന ആരോപണവുമായി പ്രതിപക്ഷ നേതാവ് വി ഡി സതീശൻ . കണ്ണൂരിലുണ്ടായ ആക്രമണത്തെ ന്യായീകരിക്കുകയും അത് ഇനിയും തുടരണമെന്ന് പറഞ്ഞ് കലാപത്തിന് ആഹ്വാനം ചെയ്ത മുഖ്യമന്ത്രിയുടെ പ്രസ്താവനയാണ് നിയമം കയ്യിലെടുക്കാന് സി.പി.എം ക്രിമിനലുകള്ക്കും പൊലീസിനും പ്രചോദനമാകുന്നത്.
വടകരയില് ഒരു സംഘര്ഷവും ഇല്ലാതെയാണ് പ്രവര്ത്തകരെ കരുതല് തടങ്കലിലെടുത്തത്. പൊലീസ് മനപൂര്വം സംഘര്ഷമുണ്ടാക്കുകയാണ്. മുഖ്യമന്ത്രിയുടെ പരിപാടി അവസാനിച്ചതിന് ശേഷമാണ് പ്രവര്ത്തകരെ വിട്ടയച്ചത്. അവരെ കൊണ്ടുവരാന് പോയ യു.ഡി.എഫ് ചെയര്മാന് കോട്ടയില് രാധാകൃഷ്ണനെ ബൈക്കില് പിന്തുടര്ന്നെത്തിയ സംഘം മാരാകായുധങ്ങളുമായി ആക്രമിച്ചു. കാര് അടിച്ചു തകര്ത്തു. വാഹനം എസ്.പി ഓഫീസിലേക്ക് കയറ്റിയതു കൊണ്ടാണ് ജീവന് രക്ഷിക്കാനായത്. ഇതില് പ്രതിഷേധിച്ച് കരിങ്കൊടി കാണിച്ച പ്രവര്ത്തകനെ ഡെപ്യൂട്ടി കമ്മിഷണര് ശ്വാസംമുട്ടിച്ച് കൊലപ്പെടുത്താന് ശ്രമിച്ചത്.
അമേരിക്കയിലെ മിനെപോളിസില് വെളുത്ത വര്ഗക്കാരനായ പോലീസുകാരന് ജോര്ജ് ഫ്ലോയിഡ് എന്ന കറുത്തവര്ഗക്കാരനെ ശ്വാസം മുട്ടിച്ച് കൊലപ്പെടുത്തിയ ദൃശ്യങ്ങള് ലോകം മുഴുവന് കണ്ടതാണ്. എനിക്ക് ശ്വാസം മുട്ടുന്നുവെന്നാണ് ഫ്ലോയിഡ് അവസാനമായി പറഞ്ഞ വാക്കുകള്. ഡെപ്യൂട്ടി കമ്മിഷണര് കഴുത്ത് ഞെരിക്കുമ്പോള് ജോയല് എന്ന യൂത്ത് കോണ്ഗ്രസ് പ്രവര്ത്തകന് പറഞ്ഞതും എനിക്ക് ശ്വാസം മുട്ടുന്നുവെന്നാണ് അമേരിക്കയിലെ മിനെപോളിസില് നിന്നും കോഴിക്കോടേക്കുള്ള ദൂരം അധികം ഇല്ലെന്ന് ബോധ്യപ്പെടുത്തിയ ക്രൂരമായ സംഭവമാണ്.
പടനിലത്ത് കരിങ്കൊടി കാട്ടിയ പ്രവര്ത്തകരെ ഡി.വൈ.എഫ്.ഐക്കാരും സി.പി.എമ്മുകാരും ചേര്ന്ന് ആക്രമിച്ചു. ഹെല്മെറ്റ് ഉപയോഗിച്ചായിരുന്നു ആക്രമണം. പൊലീസ് കസ്റ്റഡിയിലും ആക്രമിച്ചു. മുഖ്യമന്ത്രിയുടെ മുന്നില് പോകുന്ന സുരക്ഷാ ഭടന്മാരുടെ വാഹനത്തില് മാരകായുധങ്ങളാണ്. ആ മാരകായുധങ്ങളാണ് റോഡ് വക്കത്ത് നില്ക്കുന്ന പ്രതിഷേധക്കാര്ക്കെതിരെ വീശുന്നത്. മാരകായുധങ്ങളുമായി മുഖ്യമന്ത്രിക്ക് എസ്കോര്ട്ട് പോകുന്നത് ക്രിമിനലുകള് ആണോയെന്ന് വ്യക്തമാക്കണം.
ഒരു പ്രകോപനവും ഇല്ലാതെ കെ.എസ്.യു പ്രവര്ത്തക നസിയയുടെ മുഖത്തടിച്ച് മൂക്കിന്റെ പാലം തകര്ത്ത പൊലീസുകാരനെതിരെ ഒരു നടപടിയും എടുത്തില്ല. കണ്ണൂരില് മുഖ്യമന്ത്രിയുടെ സുരക്ഷാ വാഹനത്തില് നിന്നും ഇറങ്ങിയ ഉദ്യോഗസ്ഥര് വയര്ലെസ് സെറ്റ് ഉപയോഗിച്ചാണ് യൂത്ത് കോണ്ഗ്രസ് പ്രവര്ത്തകന്റെ തലയില് ഇടിച്ചത്. ഇതിലും നടപടിയില്ല എന്നും അദ്ദേഹം ആരോപിച്ചു
https://www.facebook.com/Malayalivartha
