നമ്മുടെ യുവജനങ്ങളോട് ഏറെ കരുതൽ വേണ്ട ഒരു കാലഘട്ടത്തിലൂടെയാണ് നമ്മളിപ്പോൾ കടന്നുപോകുന്നതെന്ന് മന്ത്രി വി. ശിവൻകുട്ടി. പഠനം പൂർത്തിയാക്കി തൊഴിലിലേക്ക് കടക്കുന്നതിനിടയിലുള്ള കാലയളവിൽ ഉദ്യോഗാർത്ഥികൾ അനുഭവിക്കുന്ന സാമ്പത്തികവും മാനസികവുമായ സമ്മർദ്ദം കുറയ്ക്കുക എന്നത് സർക്കാരിന്റെ പ്രധാന ലക്ഷ്യങ്ങളിലൊന്നാണ്.

ഈ ലക്ഷ്യം മുൻനിർത്തി സംസ്ഥാന സർക്കാർ ആവിഷ്‌കരിച്ച അഭിമാന പദ്ധതിയായ മുഖ്യമന്ത്രിയുടെ കണക്ട് ടു വർക്ക് പദ്ധതിയുടെ സംസ്ഥാനതല ഉദ്ഘാടനം നാളെ നടക്കുകയാണ് എന്നും മന്ത്രി പറഞ്ഞു . വിദ്യാഭ്യാസത്തിന് ശേഷം മത്സരപ്പരീക്ഷകൾക്കോ നൈപുണ്യ പരിശീലനത്തിനോ തയ്യാറെടുക്കുന്ന യുവതീയുവാക്കൾക്ക്, അവർ സ്വപ്നം കാണുന്ന കരിയറിലേക്ക് എത്തിച്ചേരുന്നത് വരെ സാമ്പത്തിക പിന്തുണ നൽകുക എന്നതാണ് ഈ പദ്ധതിയിലൂടെ സർക്കാർ ചെയ്യുന്നത്. അർഹരായ ഉദ്യോഗാർത്ഥികൾക്ക് പ്രതിമാസം ആയിരം രൂപ വീതം ഒരു വർഷത്തേക്ക് ഈ പദ്ധതി വഴി ധനസഹായം ലഭിക്കും എന്നും മന്ത്രി പറഞ്ഞു.

നാഷണൽ എംപ്ലോയ്‌മെന്റ് സർവീസ് വകുപ്പിന്റെ പോർട്ടലായ ഇഎംപ്ലോയ്‌മെന്റ് ഡോട്ട് കേരള ഡോട്ട് ജി ഒ വി ഡോട്ട് ഇൻ വഴി ഓൺലൈനായി ഉദ്യോഗാർത്ഥികൾക്ക് അപേക്ഷിക്കാം. യുവജനങ്ങളിൽ നിന്ന് വളരെ വലിയ സ്വീകാര്യതയാണ് പദ്ധതിക്ക് ലഭിച്ചുകൊണ്ടിരിക്കുന്നത്. ഇതിനോടകം സംസ്ഥാനത്തുടനീളം മുപ്പത്തിയാറായിരത്തി അഞ്ഞൂറ് അപേക്ഷകൾ ലഭിച്ചു കഴിഞ്ഞു എന്നും മന്ത്രി പറഞ്ഞു.