നേമം മണ്ഡലത്തിലെ ഇടതുപക്ഷ ജനാധിപത്യ മുന്നണി സ്ഥാനാർത്ഥി വി. ശിവൻകുട്ടിയുടെ തിരഞ്ഞെടുപ്പ് പ്രചാരണം തുടരുന്നു. ഞായറാഴ്ച രാവിലെ നീറമൺകര, ആറാമട, തിരുവല്ലം, കൈമനം എന്നീ പ്രദേശങ്ങളിലെ വീടുകൾ നേരിട്ട് സന്ദർശിച്ച അദ്ദേഹം വോട്ടർമാരോട് വോട്ട് അഭ്യർത്ഥിച്ചു. വിവിധ സ്ഥലങ്ങളിൽ നടന്ന കുടുംബയോഗങ്ങളിലും പങ്കെടുത്ത അദ്ദേഹം സർക്കാരിന്റെ വികസന പ്രവർത്തനങ്ങളെക്കുറിച്ചും മണ്ഡലത്തിന്റെ ഭാവി പദ്ധതികളെക്കുറിച്ചും ജനങ്ങളോട് സംവദിച്ചു.

ഉച്ചയ്ക്കുശേഷം സ്ഥാനാർത്ഥിയുടെ ഔദ്യോഗിക പര്യടന പരിപാടിക്ക് തുടക്കമായി. വൈകുന്നേരം 3.00 മണിക്ക് പൂജപ്പുര കുന്നുവിളയിൽ നിന്നും ആരംഭിച്ച പര്യടനം മണ്ഡലത്തിലെ അമ്പതോളം കേന്ദ്രങ്ങളിലൂടെയാണ് കടന്നുപോയത്. കട്ടയ്ക്കാൽ, പൈ ലൈൻ, മുടവൻമുകൾ, തമലം തുടങ്ങി വിവിധ ജനവാസ മേഖലകളിൽ വൻ ജനപങ്കാളിത്തത്തോടെയുള്ള സ്വീകരണമാണ് സ്ഥാനാർത്ഥിക്ക് ലഭിച്ചത്. വാദ്യമേളങ്ങളുടെയും മുദ്രാവാക്യം വിളികളുടെയും അകമ്പടിയോടെ ഓരോ കേന്ദ്രങ്ങളിലും നാട്ടുകാർ സ്ഥാനാർത്ഥിയെ വരവേറ്റു.