വേതന സുരക്ഷാ നിയമം തൊഴിലാളികള്‍ക്ക് ഗുണകരം
സൗദി തൊഴില്‍ മന്ത്രാലയം നടപ്പാക്കിവരുന്ന വേതന സുരക്ഷാനിയമം സ്വദേശികളും വിദേശികളുമായ ജോലിക്കാര്‍ക്ക് ഗുണകരമാണെന്നും മന്ത്രാലയത്തിന്റെ താല്‍പര്യങ്ങള്‍ക്ക് ഉപരി തൊഴിലാളികളുടെ അവകാശങ്ങളും പുതിയ നിയമത്തില്‍ സംരക്ഷിക്കപ്പെടുമെന്നും മന്ത്രാലയ വൃത്തങ്ങള്‍ വ്യക്തമാക്കി. തൊഴിലാളികളുടെ ശമ്പളം ഒരു മാസം വൈകിയാല്‍ മന്ത്രാലയത്തിന് നല്‍കിയ വിവരത്തിന്റെ അടിസ്ഥാനത്തില്‍ ഇമെയില്‍ മുഖേന സ്ഥാപന അധികൃതരെ വിവരം ധരിപ്പിക്കുകയും ആവശ്യമാണെങ്കില്‍ സ്ഥാപനത്തില്‍ നേരിട്ട് വന്ന് പരിശോധന നടത്തുകയും ചെയ്യും. ശമ്പളം രണ്ടു മാസം വൈകുന്ന സാഹചര്യത്തില്‍ വര്‍ക്‌പെര്‍മിറ്റ് എടുക്കലും പുതുക്കലും ഒഴികെയുള്ള തൊഴില്‍ മന്ത്രാലയത്തിന്റെ സേവനങ്ങള്‍ മരവിപ്പിക്കും.
മൂന്നാം മാസവും ശമ്പളം വൈകിയാല്‍ മന്ത്രാലയത്തിന്റെ എല്ലാ ഇലക്ട്രോണിക് സേവനങ്ങളും നിര്‍ത്തിവെക്കും. അതോടൊപ്പം തൊഴിലാളികള്‍ക്ക് തൊഴിലുടമയുടെ അനുവാദം കൂടാതെ തന്നെ മറ്റൊരു സ്ഥാപനത്തിലേക്ക് സ്‌പോണ്‍സര്‍ഷിപ്പ് മാറാവുന്നതാണെന്നും ഫൈസല്‍ അല്‍ഉതൈബി പറഞ്ഞു. നിലവിലെ സ്‌പോണ്‍സര്‍ നല്‍കിയ വര്‍ക്ക് പെര്‍മിറ്റ് കാലാവധിയുള്ളതാണെങ്കിലും ഇത്തരത്തില്‍ സ്‌പോണ്‍സര്‍ഷിപ്പ് മാറാവുന്നതാണെന്ന് അല്‍ഉതൈബി വിശദീകരിച്ചു. 500ന് മുകളില്‍ ജോലിക്കാരുള്ള സ്ഥാപനങ്ങളില്‍ വേതനസുരക്ഷാനിയമം നടപ്പാക്കുന്നതിന്റെ ഭാഗമായി തൊഴില്‍ മന്ത്രാലയം സംഘടിപ്പിച്ച പണിപ്പുരയിലാണ് മന്ത്രാലയത്തിലെ പരിശോധന വിഭാഗം ഉപദേഷ്ടാവ് ഫൈസല്‍ അല്‍ ഉതൈബി കാര്യങ്ങള്‍ വ്യക്തമാക്കിയത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
