പ്രവാസികൾ പലപ്പോഴും ഭീമമായ തുക മുടക്കിയാണ് നാട്ടിലേക്ക് പോകുന്നത്. എന്നാൽ 10 ദിർഹത്തിന് നാട്ടിലേക്ക് പോകാൻ നിങ്ങൾക്ക് അവസരം കിട്ടിയാലോ? ഇത്രയും കുറഞ്ഞ നിരക്കിൽ നാട്ടിലേക്ക് വിമാന ടിക്കറ്റ് ലഭിക്കും എന്ന് കേട്ടാൽ അൽപം അമ്പരപ്പ് തോന്നും. എന്നാൽ അത് നമ്മുടെ നാട്ടിലേക്കല്ലെന്നറിയുമ്പോൾ മലയാളികൾക്ക് അൽപം അസൂയയും തോന്നിപ്പോകും.ഫിലിപ്പൈൻസിലെ മുൻനിര വിമാനക്കമ്പനി സെബു പസഫികാണ് പത്താം വാർഷികത്തോടനുബന്ധിച്ച് ഇത്തരമൊരു ഓഫർ നൽകുന്നത്.

ദുബൈയിൽ നിന്ന് മനിലയിലേക്ക് ടിക്കറ്റെടുക്കുന്നവർക്ക് ഓഫർ ലഭിക്കും. മെയ് 5 മുതൽ 9 വരെ, ദുബൈയിൽ നിന്ന് മനിലയിലേക്കുള്ള യാത്രക്കാർക്ക് 10 ദിർഹം എന്ന വൺവേ അടിസ്ഥാന നിരക്കിൽ അവരുടെ വിമാനങ്ങൾ ബുക്ക് ചെയ്യാം. യാത്രാ കാലയളവ് ജൂൺ 1 മുതൽ നവംബർ 30, വരെ ആയിരിക്കണമെന്നതാണ് വ്യവസ്ഥ.ഇത്രക്ക് കുറഞ്ഞ നിരക്കിൽ ടിക്കറ്റ് കിട്ടില്ലെങ്കിലും 3000 രൂപയ്ക്കൊക്കെ ടിക്കറ്റ് കിട്ടാൻ സാധ്യതയുണ്ട്.

കുറഞ്ഞ ചിലവിൽ പ്രവാസികൾക്ക് നാട്ടിലേക്ക് പറക്കാൻ യുഎഇയിലെ ബജറ്റ് എയര്‍ലൈൻ വിസ് എയര്‍ അബുദാബി ഇന്ത്യയിലേക്ക് സര്‍വീസുകള്‍ തുടങ്ങാന്‍ പദ്ധതിയിടുന്നതായി റിപ്പോര്‍ട്ട്.അനുമതി ലഭിച്ചാൽ 179 ദിർഹത്തിന് ഇന്ത്യയിലേക്കും സർവീസ് നടത്തുമെന്ന് കമ്പനി അധികൃതർ പറഞ്ഞു. ഏറ്റവും കുറഞ്ഞ ചെലവിൽ വിമാന സർവീസ് നടത്തുന്ന അബൂദബിയുടെ വിമാനകമ്പനിയാണ് വിസ് എയർ അബൂദബി. സര്‍വീസുകള്‍ ആരംഭിക്കുന്നതിന് ആവശ്യമായ അനുമതികള്‍ നേടുന്ന ഘട്ടത്തിലാണെന്ന് കമ്പനിയെന്ന് വിസ് എയര്‍ അബുദാബി മാനേജിങ് ഡയറക്ടര്‍ ജോണ്‍ എയ്‍ദഗെന്‍ പറഞ്ഞു.

നിലവില്‍ പരിമിതമായ റൂട്ടുകളിലേക്ക് മാത്രം സര്‍വീസ് നടത്തുന്ന വിസ് എയര്‍ അബുദാബി ഈ വര്‍ഷം വലിയ തോതിലുള്ള വളര്‍ച്ചയാണ് ലക്ഷ്യമിടുന്നത്. ചെലവ് കുറഞ്ഞ യാത്രകള്‍ക്ക് കൂടുതല്‍ ആവശ്യക്കാരുള്ള വിപണികളാണ് തങ്ങള്‍ തെരഞ്ഞെടുക്കുന്നതെന്ന് വിസ് എയര്‍ മാനജിങ് ഡയറക്ടര്‍ പറയുന്നു. അബുദാബിയില്‍ നിന്നും യുഎഇയില്‍ നിന്നും അഞ്ച് മുതല്‍ ആറ് മണിക്കൂര്‍ വരെയുള്ള സമയം കൊണ്ട് പറന്നെത്താവുന്ന നഗരങ്ങളിലേക്ക് വ്യാപകമായി കുറഞ്ഞ ടിക്കറ്റിലുള്ള സര്‍വീസുകള്‍ നടത്താനാണ് വിസ് എയര്‍ അബുദാബി ലക്ഷ്യമിടുന്നത്.

179 ദിര്‍ഹത്തിന് ടിക്കറ്റുകള്‍ വിറ്റ് ശ്രദ്ധ നേടിയ കമ്പനി കൂടിയാണ് വിസ് എയര്‍ അബുദാബി. ഇത്തരത്തില്‍ വമ്പന്‍ ഡിസ്‍കൗണ്ടുകള്‍ ഇന്ത്യയിലേക്കുള്ള സര്‍വീസുകളിലും കൊണ്ടുവരുമെന്ന് കമ്പനി അധികൃതര്‍ അവകാശപ്പെടുന്നു. വലിയ ഡിസ്‍കൗണ്ടുകള്‍ വേണ്ടവര്‍ക്ക് പ്രത്യേക ഡിസ്‍കൗണ്ട് ക്ലബ്ബുമുണ്ട്.

179 ദിര്‍ഹത്തിനും അതിലും കുറഞ്ഞ നിരക്കിലുമൊക്കെ ടിക്കറ്റുകള്‍ ലഭ്യമാക്കുമെന്നും നിശ്ചിത എണ്ണം സീറ്റുകള്‍ കുറഞ്ഞ നിരക്കിലുള്ള ടിക്കറ്റുകള്‍ക്കായി മാറ്റിവെയ്ക്കുമെന്നും കമ്പനി പറയുന്നു. എന്നാല്‍ വിവിധ സീറ്റുകളില്‍ വിവിധ തരത്തിലുള്ള നിരക്ക് തന്നെയായിരിക്കും ഈടാക്കുക. അവസാന നിമിഷം വരെ ടിക്കറ്റെടുക്കാന്‍ കാത്തിരിക്കാതെ രണ്ടോ മൂന്നോ മാസം നേരത്തെ ടിക്കറ്റ് ബുക്ക് ചെയ്യുന്നവര്‍ക്ക് വന്‍ നേട്ടം കൊയ്യാമെന്നാണ് കമ്പനിയുടെ വാഗ്ദാനം.