ഏതാനും ദിവസങ്ങൾക്ക് മുമ്പാണ് ടാറ്റയുടെ ഉടമസ്ഥതയിലുള്ള എയർ ഇന്ത്യ, പുതിയ വിമാനങ്ങൾ വാങ്ങാൻ ബോയിങും എയർബസുമായി കരാറിൽ ഒപ്പുവെച്ചത്. എയർബസിന്റെ 250 വിമാനങ്ങളും ബോയിങ്ങിന്റെ 220 എണ്ണവും വാങ്ങാനാണ് കരാർ. അങ്ങനെ മൊത്തം 470 പുതിയ വിമാനങ്ങൾ 70 ബില്യൺ ഡോളറിന് വാങ്ങാൻ പാരിസിൽ നടക്കുന്ന എയർ ഷോയിലാണ് എയർ ഇന്ത്യ കരാർ ഒപ്പിട്ടത്. പുതിയ ഇന്ത്യയെ സൃഷ്ടിക്കുന്നതിൽ കമ്പനിക്ക് ഉത്തരവാദിത്തമുണ്ടെന്നും കരാറിന് പിന്നാലെ എയർ ഇന്ത്യ പ്രതികരിച്ചു.

470 പുതിയ വിമാനങ്ങൾ വാങ്ങുമെന്ന് കമ്പനി ഫെബ്രുവരിയിൽ തന്നെ വ്യക്തമാക്കിയിരുന്നു. പുതുതായി വാങ്ങുന്നതിൽ 70 എണ്ണം വലിയ വിമാനങ്ങളാണ്. ഇതിൽ 34 A350-1000s വിമാനങ്ങളും ആറ് 350-900എസ് എയർബസ് വിമാനങ്ങളും ഉൾപ്പെടുന്നു. ഇതിന് പുറമേ ബോയിങ്ങിന്റെ 20 ഡ്രീംലൈനർ വിമാനങ്ങളും 10 777x വിമാനവും എയർ ഇന്ത്യ വാങ്ങുന്നുണ്ട്. 140 എയർബസ് A320 നിയോ, 70 എയർബസ് A321 നിയോ, 190 ബോയിങ് 737 മാക്സ് വിമാനങ്ങളും ഉൾപ്പെടും.

കഴിഞ്ഞ ഫെബ്രുവരിയിലാണ് എയര്‍ ഇന്ത്യ 7000 കോടി ഡോളര്‍ മുടക്കി വിമാനങ്ങള്‍ വാങ്ങുന്ന വിവരം പ്രഖ്യാപിച്ചത്. ടാറ്റ ഗ്രൂപ്പ് എയര്‍ ഇന്ത്യയെ വീണ്ടും ഏറ്റെടുത്ത ശേഷം ഒരു വര്‍ഷത്തിനുള്ളിലാണ് ഇത്രയും വലിയ കരാര്‍ അന്തിമ തീരുമാനത്തിലെത്തിയിരിക്കുന്നത്. ‘ആധുനിക വ്യോമയാന രംഗത്തിന്റെ പ്രതിനിധികളായി ഞങ്ങള്‍ മാറുമെന്നാണ് പ്രതീക്ഷ’ എന്നാണ് ടാറ്റ സണ്‍സ് ആന്‍ഡ് എയര്‍ ഇന്ത്യ ചെയര്‍മാന്‍ എന്‍.ചന്ദ്രശേഖരന്‍ പ്രതികരിച്ചത്.