ദൃശ്യങ്ങള്‍ പുറത്ത്... തൊഴില്‍ തട്ടിപ്പിനിരയായി സൗദി അറേബ്യയില്‍ അകപ്പെട്ട മലയാളി 3 യുവാക്കള്‍ക്ക് ക്രൂരമര്‍ദനം
തൊഴില്‍ തട്ടിപ്പിനിരയായി സൗദി അറേബ്യയില്‍ അകപ്പെട്ട മലയാളി യുവാക്കള്‍ക്ക് ക്രൂരമര്‍ദനം. ഹരിപ്പാട് സ്വദേശികളായ മൂന്നുപേരെ തൊഴിലുടമയായ അറബിയും സ്‌പോണ്‍സര്‍മാരും ചേര്‍ന്ന് ശാരീരികമായി അക്രമിക്കുന്നതിന്റെ ദൃശ്യങ്ങളാണ് പുറത്തായത്. നാട്ടില്‍ ട്രാവല്‍ ഏജന്‍സിക്കെതിരെ നല്‍കിയ പരാതി പിന്‍വലിച്ചില്ലെങ്കില്‍ കൊന്നുകളയുമെന്നാണ് ഭീഷണി.
ഉയര്‍ന്ന ശമ്പളത്തില്‍ സൗദിയിലെ കമ്പനിയില്‍ ഇലക്ട്രീഷ്യന്‍ മെക്കാനിക്കല്‍ തസ്തികകളില്‍ ജോലി എന്നായിരുന്നു മോഹന വാഗ്ദാനം. പാസ്‌പോര്‍ട്ടും വിസയുമെല്ലാം ശരിയാക്കാന്‍ സ്‌പോണ്‍സറും ട്രാവല്‍ ഏജന്‍സിയും മുന്നിട്ടിറങ്ങി.
ഒന്നരമാസം മുമ്പ് ഹരിപ്പാട് ഏവൂര്‍മുട്ടം സ്വദേശി ബൈജുവിനെയാണ് ആദ്യം കൊണ്ടുപോയത്. ഡിസംബര്‍ ആദ്യവാരത്തില്‍ വിമല്‍കുമാര്‍ അഭിലാഷ് എന്നിവരെയും സൗദിയിലെത്തിച്ചു. നിര്‍മ്മാണ കമ്പനിയില്‍ മികച്ച ജോലി പ്രതീക്ഷിച്ച്് വിമാനമിറങ്ങിയവരെ കാത്തിരുന്നത് ഇഷ്ടികചൂളയിലെ ചുമടെടുപ്പ്. ഒപ്പം അറബിയുടെ ക്രൂര പീഡനവും.
പാസ്‌പോര്‍ട്ട് സ്‌പോണ്‍സര്‍ കൈവശപ്പെടുത്തി. വാഗ്ദാനം ചെയ്ത ജോലി നല്‍കാത്തതിനെ ചോദ്യം ചെയ്തപ്പോള്‍ കൊന്നുകളയുമെന്നായി ഭീഷണി.തുടര്‍ന്ന് അറബിയുടെ കണ്ണുവെട്ടിച്ച് പുറത്തുകടന്ന യുവാക്കള്‍ ദൃശ്യങ്ങള്‍ നാട്ടിലേയ്ക്കയച്ചു. ഒളിവില്‍ കഴിയുകയാണെന്നും ഏത് നിമിഷവും അറബിയുടെയോ സ്‌പോണ്‍സര്‍മാരുടെയോ കൈയ്യിലകപ്പെട്ടേക്കാമെന്ന വിവരമാണ് വീട്ടുകാരുമായി ഇവര്‍ പങ്കുവച്ചത്.
ആളൊന്നിന് ഒരുലക്ഷത്തി എഴുപത്തിഅയ്യായിരം രൂപവീതം നല്‍കിയാല്‍ നാട്ടിലേയ്ക്ക് മടക്കി അയക്കാമെന്നാണ് മലയാളികള്‍കൂടി ഉള്‍പ്പെട്ട വീസ തട്ടിപ്പ് സംഘത്തിന്റെ നിലപാട്. ഒപ്പം ട്രാവല്‍ ഏജന്‍സിക്കെതിരെ യുവാക്കളുടെ മാതാപിതാക്കള്‍ കായംകുളം പൊലീസിന് നല്‍കിയ പരാതിയും പിന്‍വലിക്കണം. യമന്‍ അതിര്‍ത്തിയിലെ അബാഹയില്‍ കൊടും പട്ടിണിയില്‍ മരണഭയത്തോടെ കഴിയുകയാണ് ഹരിപ്പാടുകരായ മൂന്ന് യുവാക്കള്‍.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
