വിമാനാപകടം വളരെ ചുരുക്കമായി മാത്രമേ സംഭവിക്കാറുള്ളൂവെങ്കിലും അപകടം സംഭവിച്ചാൽ അത് വൻ ദുരന്തത്തിലായിരിക്കും കലാശിക്കുക.
അതിനാൽ വിമാനയാത്രയിൽ ഒരു ചെറിയ കുലുക്കം അനുഭവപ്പെട്ടാൽ പോലും മിക്കവർക്കും എന്തെങ്കിലും സംഭവിക്കുമോയെന്ന ഭയമാണ്. അത്തരത്തിൽ വിമാനത്തിന് എന്തും സംഭവിക്കാമെന്ന തരത്തിൽ യാത്രക്കാരെ മുള്‍മുനയിലാക്കിയ സംഭവം റിപ്പോർട്ട് ചെയ്തിരിക്കുകയാണ്.

യുഎസിലെ ഫ്ലോറിഡയിലാണ് ഇത്തരത്തിൽ ഒരു സംഭവമുണ്ടായിരിക്കുന്നത്. പറക്കുന്നതിനിടെ വിമാനം 15,000 അടി താഴേക്ക് പതിച്ചത്. യാത്രക്കാരെ ആശങ്കയിലാഴ്ത്തി. അമേരിക്കൻ എയർലൈൻസിന്റെ 5916 വിമാനമാണ് മൂന്ന് മിനിട്ടിനുള്ളിൽ 15,000 അടി താഴേക്ക് പതിച്ചത്. ഫോക്സ് ന്യൂസാണ് ഇത് സംബന്ധിച്ച് വാർത്ത റിപ്പോർട്ട് ചെയ്തിരിക്കുന്നത്. നോർത്ത് കാരോലൈനയിലെ ഗെയ്‌നെസ്‌ വില്ലെയിലേക്ക് പോവുകയായിരുന്ന വിമാനമാണ് വായുസമ്മർദ പ്രശ്നങ്ങളെ തുടർന്ന് താഴ്ന്നുപറന്നത്.

വിമാനം പറന്ന് 43 മിനിട്ട് യാത്രയ്ക്ക് ശേഷമാണ് സംഭവമുണ്ടായത്. ആറ് മിനിട്ടിനുള്ളിൽ 18,600 അടി താഴ്ചയിലേക്ക് വിമാനം താഴേക്ക് കൂപ്പുകുത്തുകയായിരുന്നു. 11 മിനിട്ടിനുള്ളിൽ വിമാനം മൊത്തം 20,000 അടി താഴ്ന്നുവെന്നും റിപ്പോർട്ടുണ്ട്. പെട്ടന്നുണ്ടായ വിമാനത്തിന്റെ താഴ്ച വിമാനയാത്രക്കാരെ ആശങ്കയിലാക്കി. യാത്രക്കിടെയുണ്ടായ അനുവഭങ്ങൾ പങ്കുവച്ചുകൊണ്ട് യാത്രക്കാർ പലരും രംഗത്തുവന്നിട്ടുണ്ട്. വിമാനത്തിനുള്ളിലെ ചിത്രങ്ങളും യാത്രക്കാർ സമൂഹമാധ്യമങ്ങളിലൂടെ പങ്കുവച്ചിട്ടുണ്ട്. വിമാനത്തിൽ ഓക്സിജൻ മാസ്കുകൾ തൂങ്ങിക്കിടക്കുന്നതു ചിത്രങ്ങളിൽ കാണാം.

യാത്രക്കാരനായ ഫ്ലോറിഡ സർവകലാശാലയിലെ പ്രഫ. ഹാരിസൺ ഹോവ് വിമാനത്തിലെ പേടിപ്പെടുത്തുന്ന നിമിഷങ്ങളെപ്പറ്റി എക്സ് (ട്വിറ്റർ) പ്ലാറ്റ്ഫോമിൽ കുറിച്ചു. ഭയപ്പെടുത്തുന്ന സംഭവമായിരുന്നു നടന്നത്. തീ കത്തുന്നതിന്റെ മണവും ചെവിപൊട്ടുന്ന വൻ ശബ്ദവും ഫോട്ടോകൾക്കു പിടിച്ചെടുക്കാൻ കഴിയില്ല. നിരവധി യാത്രകൾ ഞാൻ നടത്തിയിട്ടുണ്ട്, എന്നാലിത് ഭയാനകമായിരുന്നു. അതിശയകരമായി പ്രവർത്തിച്ച വിമാന ജീവനക്കാർക്ക് അഭിനന്ദനങ്ങൾ എന്നും അദ്ദേഹം കുറിച്ചു. എന്നാൽ പിന്നീട് വിമാനം സുരക്ഷിതമായി ലക്ഷ്യസ്ഥാനത്ത് ഇറക്കാൻ പൈലറ്റിനായി.

അതേസമയം ഖത്തര്‍ എയര്‍വേയ്‍സ് വിമാനം ആകാശച്ചുഴിയില്‍ പെട്ടതിനെ തുടര്‍ന്ന് നിരവധി യാത്രക്കാര്‍ക്ക് പരിക്കേറ്റ സംഭവവും ഉണ്ടായിട്ടുണ്ട്. തു‌ടർന്ന് വിമാനം അടിയന്തിരമായി നിലത്തിറക്കി. ദോഹയില്‍ നിന്ന് ഇന്തോനേഷ്യയിലെ ഡെന്‍പസറിലേക്ക് പുറപ്പെട്ട ക്യു.ആര്‍ 960 വിമാനമാണ് ആകാശച്ചുഴിയില്‍ പെട്ടത്. തുടര്‍ന്ന് ബാങ്കോങ്കില്‍ അടിയന്തിരമായി നിലത്തിറക്കി പരിക്കേറ്റ യാത്രക്കാർക്ക് വൈദ്യസഹായം ലഭ്യമാക്കി.

"യാത്രാ മദ്ധ്യേ വിമാനം ആകാശച്ചുഴിയില്‍ പെട്ടതിനെ തുടര്‍ന്ന് ചില യാത്രക്കാര്‍ക്ക് പരിക്കേല്‍ക്കുകയും വിമാനം സുരക്ഷിതമായി ബാങ്കോക്കില്‍ ഇറക്കി ഇവര്‍ക്ക് ചികിത്സ ലഭ്യമാക്കുകയുമായിരുന്നു എന്ന് ഖത്തര്‍ എയര്‍വേയ്‍സ് പുറത്തിറക്കിയ പ്രസ്‍താവനയില്‍ അറിയിച്ചത്.