നാട്ടിലേക്കുള്ള യാത്രക്കായി കുവൈറ്റ് എയർപോർട്ടിൽ എത്തിയ അറബ് വംശജനായ പ്രവാസിയെ തന്റെ ലഗേജിൽ ബോംബ് ഉണ്ടെന്ന് തമാശ പറഞ്ഞതിന് നാടുകടത്താൻ അധികൃതർ തീരുമാനിച്ചു. കഴിഞ്ഞ ദിവസമാണ് കുവൈറ്റ് എയർപോർട്ടിൽ സംഭവം നടന്നത്. സാധാരണ ഗതിയിലുള്ള പരിശോധനക്കിടെ ലഗേജിൽ എന്തൊക്കെയുണ്ടെന്നു ഉദ്ദ്യോഗസ്ഥർ യാത്രക്കാരനായ പ്രവാസിയോട് തിരക്കുകയായിരുന്നു.

എന്നാൽ ലഗേജിൽ ബോംബാണെന്ന തമാശ കലർന്ന മറുപടിയാണ് ഇയാൾ നൽകിയത്. പിന്നീട് ഇയാൾ താൻ തമാശ പറഞ്ഞതാണെന്ന് തിരുത്തിയെങ്കിലും, കളി കാര്യമായി മാറുകയായിരുന്നു. ഉദ്ദ്യോഗസ്ഥർ ഇയാളുടെ ലഗേജ് തിരിച്ചുവാങ്ങിക്കുകയും യാത്ര ചെയ്യാൻ അനുവദിക്കാതെ ബന്ധപ്പെട്ട ഉദ്ദ്യോഗസ്ഥർക്ക് കൈമാറുകയും ചെയ്‌തുവെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്‌തു.

ഇതിനു മുൻപും സമാന സംഭവങ്ങൾ ഉണ്ടായിട്ടുണ്ട് . വിമാനത്താവളത്തിൽ ബോംബ് ഭീഷണി മുഴക്കിയ കേസിൽ തൃക്കാക്കരയിൽ താമസിക്കുന്ന പത്തനംതിട്ട മണ്ണംതുരത്തി മലക്കപ്പുഴ മഠത്തിപറമ്പിൽ സാബു വർഗീസ് (55) ആണ് ഇക്കഴിഞ്ഞ ജൂലൈ 28 നു പൊലീസ് പിടിയിലായത്

വിമാനത്താവളത്തിൽ ചെക്ക്–ഇൻ ചെയ്യാൻ ക്യൂവിൽ നിൽക്കുന്നതിനിടെ മറ്റൊരാളുടെ ബാഗിൽ ബോംബുണ്ടെന്ന് തമാശയായി പറഞ്ഞതാണ് സാബുവിന് വിനയായത്.

വിമാനക്കമ്പനി ജീവനക്കാർ വിവരം സുരക്ഷാ വിഭാഗത്തെ അറിയിച്ചതോടെ അവരെത്തി സാബുവിനെ പിടികൂടി ചോദ്യം ചെയ്തു. പിന്നീട് നെടുമ്പാശേരി പൊലീസിന് കൈമാറി. ബോംബ് ഭീഷണി മുഴക്കി വിമാനത്താവളത്തിൽ പരിഭ്രാന്തിയുണ്ടാക്കിയതിന് സാബുവിനെതിരെ കേസെടുത്തു എങ്കിലും പിന്നീട് വിട്ടയച്ചു

എയർപോർട്ട് പോലുള്ള അതിസുരക്ഷാ ക്രമീകരണങ്ങൾ ഉള്ള ഇടത്ത് ഇത്തരം തമാശകൾ അതി ഗുരുതമായ പ്രശ്‌നങ്ങൾ സൃഷ്‌ടിക്കുമെന്നതിന് ഉദാഹരണമാണ് ഈ സംഭവങ്ങൾ .