ഇലക്ട്രിക് ബസില്‍ ഡ്രൈവറായും കണ്ടക്ടറായും വനിതകള്‍. യാത്രക്കാരായി മുഖ്യമന്ത്രി പിണറായിവിജയനും മന്ത്രിമാരും. സ്മാര്‍ട്ട് സിറ്റി പദ്ധതിയുടെ ഭാഗമായി കെ.എസ്.ആര്‍.ടി.സിയും നഗരസഭയും ചേര്‍ന്ന് ആരംഭിച്ച 60 റെഡ് ഇലക്ട്രിക് ബസുകളുടെ ഫ്‌ളാഗ് ഓഫ് മുഖ്യമന്ത്രി നിര്‍വഹിച്ചശേഷം ആദ്യ സവാരിയിലാണ് ഇവര്‍ യാത്രക്കാരായത്.

മന്ത്രിമാരായ കെ.എന്‍. ബാലഗോപാല്‍, ആന്റണി രാജു, വി.ശിവന്‍കുട്ടി, ജി.ആര്‍. അനില്‍ എന്നിവര്‍ക്കു പുറമേ, മേയര്‍ ആര്യാ രാജേന്ദ്രനും കെ.എസ്.ആര്‍.ടി.സി. എം.ഡി. ബിജു പ്രഭാകറും മറ്റ് ഉന്നത ഉദ്യോഗസ്ഥരും യാത്രക്കാരായി.

ചടങ്ങ് നടന്ന ചാല ബോയ്‌സ് സ്‌കൂള്‍ ഗ്രൗണ്ട് മുതല്‍ സെക്രട്ടേറിയറ്റ് വരെയായിരുന്നു യാത്ര.സാരഥിയായത് വനിതാ ഡ്രൈവര്‍ ജിസ്ന ജോയിയും കണ്ടക്ടര്‍ സവിതയും.


വന്‍ സുരക്ഷാ അകമ്പടിയോടെയുള്ള യാത്ര തൈക്കാട്, വഴുതക്കാട് വിമന്‍സ് കോളേജ്, കലാഭവന്‍ മണി റോഡുവഴി പനവിളയിലെത്തി ബേക്കറി ജംഗ്ഷന്‍ പിന്നിട്ട് നോര്‍ത്ത് ഗേറ്റുവഴി വൈകിട്ട് 4.45ന് സെക്രട്ടേറിയേറ്റില്‍ അവസാനിച്ചു.

അതേസമയം തലസ്ഥാനത്തെ ഓണത്തിരക്ക് കണക്കിലെടുത്ത് ഇന്നുമുതല്‍ സെപ്തംബര്‍ മൂന്നുവരെ രാത്രി 12 റെഡ് ബസുകള്‍ സര്‍വീസ് നടത്തും. സമീപ പ്രദേശങ്ങളിലേക്ക് റെഡ് ബസുകളുമായി ബന്ധപ്പെടുത്തി കണക്ഷന്‍ സര്‍വീസുകളും ഉണ്ടായിരിക്കും.

കെ.എസ്.ആര്‍.ടി.സി സ്വിഫ്റ്റിന്റെ രണ്ട് ഹൈബ്രിഡ് ബസുകളുടെ ഫ്‌ളാഗ് ഓഫും ഇതോടൊപ്പം നടത്തി. മന്ത്രി എം.ബി രാജേഷ് അദ്ധ്യക്ഷത വഹിച്ചു. ഇ-ബസ്, ഹൈബ്രിഡ് ബസ് എന്നിവയുടെ മിനിയേച്ചര്‍ രൂപങ്ങള്‍ യഥാക്രമം മന്ത്രി ആന്റണി രാജു, മന്ത്രി കെ.എന്‍. ബാലഗോപാല്‍ എന്നിവര്‍ ഏറ്റുവാങ്ങി. ആദ്യ ഇ-ബസിന്റെയും ഹൈബ്രിഡ് ബസിന്റെയും താക്കോല്‍ദാനം നിര്‍വഹിച്ച് മന്ത്രി വി. ശിവന്‍കുട്ടി .