യു.എ.ഇ ദേശീയ ദിനാഘോഷത്തിന്റെ ഭാഗമായി വിമാന സര്‍വീസുകളില്‍ 15 ശതമാനം ഇളവ് പ്രഖ്യാപിച്ച് എയര്‍ ഇന്ത്യ എക്സ്പ്രസ്. 2024 മാര്‍ച്ച് 31 വരെയുള്ള യാത്രകള്‍ക്കായി നാളെ നടത്തുന്ന നേരിട്ടുള്ള ബുക്കിംഗുകള്‍ക്ക് ഇളവ് ലഭിക്കും. എയര്‍ലൈനിന്റെ മൊബൈല്‍ ആപ്പിലും airindiaexpress.com എന്ന വെബ്സൈറ്റിലും ലോഗിന്‍ ചെയ്ത് ബുക്ക് ചെയ്യുന്നവര്‍ക്ക് യാത്രാസമയത്ത് സൗജന്യ ഫ്രഷ് ഫ്രൂട്ട് പ്ലാറ്ററും ലഭിക്കും. യു.എ.ഇയിലേക്ക് ആഴ്ചയില്‍ 195 സര്‍വീസുകള്‍ എയര്‍ ഇന്ത്യ എക്സ്പ്രസ് നടത്തുന്നുണ്ട്.

ദുബായിലേക്ക് 80 സര്‍വീസുകളും ഷാര്‍ജയിലേക്ക് 77 സര്‍വീസുകളും അബുദാബിയിലേക്ക് 31 സര്‍വീസുകളും ആഴ്ചയിലുണ്ട്. കൂടാതെ യു.എ.ഇയിലെ അല്‍ ഐനിലേക്ക് രണ്ട് സര്‍വീസുകളും റാസല്‍ഖൈമയിലേക്ക് അഞ്ച് സര്‍വീസുകളുമുണ്ട്. 29 ബോയിംഗ് 737, 28 എയര്‍ബസ് എ320 എന്നിവയുള്‍പ്പെടെ 57 വിമാനങ്ങളുള്ള എയര്‍ ഇന്ത്യ എക്സ്പ്രസ് പ്രതിദിനം 300 ലധികം വിമാനസര്‍വീസുകള്‍ നടത്തുന്നുണ്ട്‌.