മാരക ലഹരിമരുന്നുകളുമായി കുവൈറ്റില്‍ രണ്ട് പേര്‍ പിടിയില്‍. പ്രതികളുടെ ഇടപാട് സംബന്ധിച്ച് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പരിശോധന നടത്തിയത്. 35 കിലോഗ്രാം ഹാഷിഷ് ഓയിലും 2000ല്‍ അധികം ഗുളികകളുമായി ജാബിര്‍ അല്‍ അഹ്മദ് പ്രദേശത്ത് നിന്ന് രണ്ട് പേരാണ് പിടിയിലായത്. ആഭ്യന്തര മന്ത്രാലയ അധികൃതരാണ് പ്രതികളെ പിടികൂടിയത്. പ്രതികളില്‍ നിന്ന് ലഹരി മരുന്ന് വിറ്റത് വഴി സമ്പാദിച്ച പണവും പിടികൂടി.

പ്രതികളില്‍ നിന്ന് പിടികൂടിയ ലഹരിമരുന്നും പണവും ബന്ധപ്പെട്ട് വകുപ്പിന് തുടര്‍പരിശോധനയ്ക്കായി കൈമാറി. രാജ്യത്ത് ലഹരിവേട്ട അധികൃതര്‍ ശക്തമാക്കിയതിന് പിന്നാലെ ഈ ആഴ്ചയില്‍ ഇത് രണ്ടാം തവണയാണ് കുവൈറ്റില്‍ ഹാഷിഷ് ഓയിലുമായി പ്രതികളെ പിടികൂടുന്നത്. ചൊവ്വാഴ്ച കുവൈറ്റ് സിറ്റിയില്‍ നിന്ന് ഒന്നരലക്ഷം ദിനാര്‍ മൂല്യം വരുന്ന 40 കിലോഗ്രാം ഹാഷിഷ് ഓയിലുമായി പ്രതികളെ പിടികൂടിയിരുന്നു.