ലഹരിമരുന്ന് കടത്തിനും വില്പനയ്ക്കും എതിരെ വിട്ടുവീഴ്ചയില്ലാത്ത നടപടികളുമായി കുവൈത്ത്
വ്യത്യസ്ത കേസുകളിലായി പിടിയിലായ നിരവധി പ്രതികള്ക്ക് കടുത്ത ശിക്ഷകള് വിധിച്ച് കുവൈത്ത് ക്രിമിനല് കോടതി. ലഹരിമരുന്ന് നിയന്ത്രണ വിഭാഗം നടത്തിയ രഹസ്യ ഓപ്പറേഷനുകളിലൂടെയാണ് പ്രതികളെ പിടികൂടിയത്. രഹസ്യ ഏജന്റിന് ഹെറോയിന് വില്ക്കാന് ശ്രമിച്ച അഫ്ഗാന് സ്വദേശിക്ക് ജീവപര്യന്തം തടവ് വിധിച്ചു. ഹെറോയിനും ഹാഷിഷുമായി പിടിയിലായ ബംഗ്ലാദേശ് സ്വദേശിയായ മയക്കുമരുന്ന് കച്ചവടക്കാരനും ജീവപര്യന്തം തടവ് വിധിച്ചു.
ഹവല്ലിയില് വന്തോതില് ഹെറോയിനും മറ്റ് ലഹരിവസ്തുക്കളുമായി പിടിയിലായ മറ്റൊരു അഫ്ഗാന് സ്വദേശിക്കും ജീവപര്യന്തം തടവാണ് ശിക്ഷ. സാല്മിയയില് വെച്ച് ഹാഷിഷുമായി പിടിയിലായ ഫിലിപ്പിനോ പൗരന് 15 വര്ഷം തടവ് ശിക്ഷ വിധിച്ചു. സര്ക്കാര് മന്ത്രാലയത്തില് ജോലി ചെയ്യുന്ന ഒരു കുവൈത്തി സ്വദേശിക്കും ഒരു ഡോക്ടര്ക്കും 10 വര്ഷം വീതം തടവും 10,000 ദിനാര് പിഴയും കോടതി വിധിച്ചു. ഹാഷിഷ്, കൊക്കെയ്ന് എന്നിവ ഉപയോഗിച്ചതിനും വിറ്റതിനുമാണ് ഇവര് കുറ്റക്കാരാണെന്ന് കണ്ടെത്തിയത്. സുറ, സിദ്ദീഖ് എന്നിവിടങ്ങളില് വെച്ച് ഡി.സി.ജി.ഡി ഉദ്യോഗസ്ഥര് നടത്തിയ ആസൂത്രിതമായ നീക്കത്തിലൂടെയാണ് ഇവര് കുടുങ്ങിയത്.
https://www.facebook.com/Malayalivartha
