തലയെടുപ്പോടെ ഇന്ത്യ പവലിയന്‍
ദുബൈയുടെ സ്വന്തം ഗ്‌ളോബല്‍ വില്ലേജില്‍ ഇത്തവണയും മുഖ്യ ആകര്‍ഷണ കേന്ദ്രങ്ങളിലൊന്നായി തലയെടുപ്പോടെ ഇന്ത്യ പവലിയന്‍. 'വിസ്മൃതമായ ഇന്ത്യ' എന്ന പ്രമേയത്തില്‍ രൂപകല്‍പ്പന ചെയ്ത പവലിയന്‍ ഇന്ത്യയുടെ നാനാത്വത്തിലെ ഏകത്വം എന്ന സത്തയിലേക്ക് വാതില്‍ തുറക്കുന്നതാണ്. വിനോദ സഞ്ചാരികളുടെ പറുദീസയായ ദുബൈയില്‍ ഇ ഫോര്‍ എന്റര്‍ടെയിന്‍മെന്റിന്റെ ആഭിമുഖ്യത്തില്‍ എല്ലാ വര്‍ഷത്തെയും പോലെ തലയെടുപ്പോടെ തന്നെയാണ് മറ്റു രാജ്യങ്ങളുടെ പവലിയനുകള്‍ക്കിടയില്‍ ഈ വര്‍ഷവും 'ഇന്ത്യ' നില്‍ക്കുന്നത്. മുഗള്‍ ശില്പകലയുടെ മകുടോദാഹരണമായി വിശേഷിപ്പിക്കപ്പെടുന്ന ബുലന്ദ് ദര്‍വാസയുടെ തനിപകര്‍പ്പും ഇവിടെ കാണാം. അക്ബര്‍ ചക്രവര്‍ത്തിയുടെ ഗുജറാത്ത് വിജയത്തിന്റെ സ്മരണക്കായി 16-ാം നൂറ്റാണ്ടില്‍ പണിതതാണ് 54 മീറ്റര്‍ ഉയരത്തിലുളള ബുലന്ദ് ദര്‍വാസ ലോകത്തിലെ തന്നെ ഏറ്റവും വലിയ കവാടമാണ്. ഇതിനകത്ത് കടന്നാല്‍ വിവിധ സംസ്ഥാനങ്ങളുടെ രുചികളും കരകൗശല വിദ്യയും വര്‍ണ വൈചിത്ര്യവും സന്ദര്‍ശകര്‍ക്ക് മുമ്പില്‍ വിസ്മയം വിടര്‍ത്തും. ഡല്‍ഹിയിലെ ഇന്ത്യ ഗേറ്റും ഹൈദരബാദിലെ ചാര്‍മിനാറും പവലിയനില്‍ സ്ഥാനം പിടിച്ചിട്ടുണ്ട്. വിവിധ രാജ്യക്കാരായ സന്ദര്‍ശകര്‍ക്ക് ശരിക്കും ആസ്വദിക്കാനും വാങ്ങാനും ഒരുപാട് വിഭവങ്ങളും ഉത്പന്നങ്ങളും കൂടാതെ വിവിധ സംസ്ഥാനങ്ങളുടെ കലാരൂപങ്ങളും മേളയില്‍ ഒരുക്കിയിട്ടുണ്ട്. ഇന്ത്യയുടെ സംസ്‌കാരവും പൈതൃകവും മേളയില്‍ സമ്മേളിക്കുന്നതോടെ ലോകനഗരത്തില്‍ ഒരു കൊച്ചു ഇന്ത്യ തന്നെയാണ് രൂപപ്പെടുന്നത്.
ഇന്ത്യന്‍ കോണ്‍സുലേറ്റ് ജനറല്‍ അനുരാഗ് ഭൂഷണും പത്‌നിയും ഇന്ത്യന്‍ എംബസി ഉദ്യോഗസ്ഥയുമായ നിത ഭൂഷണ്‍, ഗ്‌ളോബല്‍ വില്ലേജ് സി.ഇ.ഒ അഹ്മദ് ഹുസൈന്‍ ബിന്‍ ഇസ്സ തുടങ്ങിയവര്‍ പവലിയന്‍ സന്ദര്‍ശിച്ചപ്പോള്‍ പഞ്ചാബി മേളത്തോടെയാണ് അവരെ സ്വീകരിച്ചത്.ഇന്ത്യയുടെ വൈവിധ്യം വിളിച്ചറിയിക്കുന്ന വ്യത്യസ്ത വേഷങ്ങളണിഞ്ഞ കുട്ടികള്‍ ഉള്‍പ്പെടെയുള്ളവര്‍ വര്‍ണപകിട്ടു പകര്‍ന്ന വേദിയിലും ഇവരത്തെി.
ഇന്ത്യ പവലിയന്‍ സി.ഇ.ഒ സുനില്‍ ഭാട്ട്യ ഇവരെ സ്വീകരിച്ചു. എല്ലാ രാജ്യങ്ങളുടെയൂം പവലിയനുകള്‍ ഉന്നത നിലവാരം പുലര്‍ത്തുന്നുവെന്നും ഇന്ത്യന്‍ പവലിയന്‍ സവിശേഷ ശ്രദ്ധയര്‍ഹിക്കുന്നുവെന്നും ഗ്‌ളോബല്‍ വില്ലേജ് സി.ഇ.ഒ അഹ്മദ് ഹുസൈന്‍ പറഞ്ഞു. ഇന്ത്യന്‍ ഗ്രാമത്തിന്റെ പൗരാണിക ഭംഗി പ്രസരിപ്പിക്കുന്ന പൈതൃക ഗ്രാമം പവലിയിനിലെ മുഖ്യ ശ്രദ്ധാകേന്ദ്രങ്ങളിലൊന്നാണ്. കയര്‍ കട്ടിലും ഇരിപ്പിടങ്ങളും പശുക്കളുടെ ശില്പങ്ങളടങ്ങിയ കൃഷിയിടവും രാജസ്ഥാനിലെ ജയ്‌സല്‍മാറിലെ ഖുറി ഗ്രാമത്തിന്റെ മാതൃകയാക്കിയാണ് പുന:സൃഷ്ടിച്ചത്. പവലിയല്‍ വേദിയില്‍ ദിവസവും നടക്കുന്ന കലാ സാംസ്കാരിക പരിപാടികള്‍ കാണാന്‍ നല്ല തിരക്കാണ്. ഇന്ത്യന്‍ പവലിയന്‍ ഏപ്രില്‍ ഒമ്പത് വരെ പ്രവര്‍ത്തിക്കും
https://www.facebook.com/Malayalivartha
