യുഎഇ സ്വകാര്യമേഖലയില്‍ സ്വദേശിവല്‍ക്കരണം
ഡാറ്റാ എന്‍ട്രി ഓപ്പറേറ്റര്‍, ആരോഗ്യസുരക്ഷാ ഒഫീസര്‍ തുടങ്ങി തസ്തികകള്‍ യുഎഇ-ല്‍ സ്വദേശിവല്‍ക്കരിച്ചു. ഇതിനുള്ള ഉത്തരവ് ഈ വര്‍ഷം ജൂലൈയില്‍ പുറത്തിറക്കിരുന്നു. ജനുവരി മുതല്‍ ഇത് പ്രാബല്യത്തില്‍ വരും. വലിയ കമ്പനികളില്‍ ഈ തസ്തികയില്‍ സ്വദേശികളെ നിയോഗിക്കാനുള്ള നടപടികള്‍ മാനവ'വിഭവശേഷിമന്ത്രാലയം പൂര്‍ത്തിയാക്കി. കമ്പനികള്‍ക്ക് യോഗ്യതയുള്ള സ്വദേശികളുടെ പട്ടിക തയ്യാറാക്കി കൈമാറിയതായി മന്ത്രാലയം അസിസ്റ്റന്റ് അണ്ടര്‍ സെക്രട്ടറി ഫരീദ അല്‍ അലി അറിയിച്ചു. 1000-ല്‍ അധികം ജീവനക്കാരുള്ള കമ്പനികള്‍ മന്ത്രാലയത്തിന്റെ ഓണ്‍ലൈന്‍ സേവനപോര്‍ട്ടലായ 'തസ്ഹീല്‍' സംവിധാനത്തില്‍ രജിസ്റ്റര്‍ചെയ്യണമെന്ന് നിര്‍ദേശം നല്‍കിയിരുന്നു. രണ്ട് സ്വദേശികളെ നിയമിച്ചാലേ ഈ സംവിധാനത്തില്‍ കമ്പനികള്‍ക്ക് പ്രവേശിക്കാനാകൂ. തസ്ഹീല്‍ ഓണ്‍ലൈന്‍ സേവനത്തിന് രജിസ്റ്റര്‍ചെയ്ത 1000-ല്‍ കൂടുതല്‍ ജീവനക്കാരുള്ള കമ്പനികള്‍ ഡാറ്റാ എന്‍ട്രി ഓപ്പറേറ്റര്‍ തസ്തികയില്‍ ജനുവരിമുതല്‍ സ്വദേശികളെമാത്രമേ നിയമിക്കാവൂവെന്നാണ് പുതിയ വ്യവസ്ഥ. ആയിരത്തിലേറെ ജീവനക്കാരുള്ള 375 വന്‍കിട കമ്പനികള്‍ യുഎഇയില്‍ പ്രവര്‍ത്തിക്കുന്നുണ്ട്. അഞ്ഞൂറ് ജീവനക്കാരുള്ള നിര്‍മാണ, വ്യവസായ കമ്പനികള്‍ക്കാണ് ആരോഗ്യസുരക്ഷാ ഒഫീസര്‍ തസ്തികയില്‍ സ്വദേശികളെ നിയോഗിക്കണമെന്ന വ്യവസ്ഥ ഏര്‍പ്പെടുത്തിയത്.
https://www.facebook.com/Malayalivartha
