മാറ്റങ്ങള്ക്ക് പിന്നില് സാധാരണ ജനം : ബറാക് ഒബാമ
അമേരിക്കന് പ്രസിഡന്റ് ബറാക് ഒബാമയുടെ വികാരനിര്ഭരമായ വിടവാങ്ങല് പ്രസംഗത്തെ നിറഞ്ഞ കൈയ്യടികളോടെയാണ് അമേരിക്കന് ജനത സ്വീകരിച്ചത്. നിങ്ങളില് നിന്നുമാണ് ഞാന് പാഠം പഠിച്ചത്. നിങ്ങളാണ് എന്നിലെ മികച്ച പ്രസിഡന്റിനെ പുറത്ത് കൊണ്ട് വന്നത്. നിങ്ങളാണ് എന്നെ നല്ല മനുഷ്യനാക്കിയത്. സാധാരണ ജനങ്ങള് ഒരുമിച്ച് ചേര്ന്ന് ഇടപെടുമ്പോള് മാത്രമാണ് മാറ്റം സംഭവിക്കുന്നത്. ഇതായിരുന്നു ഒബാമയുടെ വാക്കുകള്. തുടര്ച്ചയായ എട്ടുവര്ഷത്തെ ഭരണത്തിനുശേഷം പ്രസിഡന്റ് പദവിയില് നിന്നും വിടവാങ്ങുമ്പോള് രാഷ്ട്രീയത്തേക്കാള് ഉപരി അമേരിക്കന് ജനതയുടെ ഐക്യത്തിനെക്കുറിച്ചാണ് അദ്ദേഹം പ്രസംഗിച്ചത്. വര്ണവിവേചനം അമേരിക്കന് ജനാധിപത്യത്തിന് നേരെയുളള ശക്തമായ വെല്ലുവിളിയാണെന്ന് ഒബാമ സൂചിപ്പിച്ചു. വര്ണവിവേചനം ഇപ്പോഴും വെല്ലുവിളിയായി തുടരുകയാണ്. നിയമങ്ങള് മാറിയതുകൊണ്ടു കാര്യമില്ല. ഹൃദയങ്ങള് മാറിയാലേ കൂടുതല് മുന്നേറാന് നമുക്ക് സാധിക്കുകയുളളുവെന്നും അദ്ദേഹം കൂട്ടി ചേര്ത്തു. രാജ്യത്തെ പുരോഗതിയിലേക്ക് നയിക്കുന്ന സ്വപ്നങ്ങള് കാണണമെന്നും പൂര്വികരില് നിന്നും ലഭിച്ച സൗഭാഗ്യത്തെ കാത്ത് സൂക്ഷിക്കണുമെന്ന് അദ്ദേഹം പറഞ്ഞു. അമേരിക്കയുടെ നേതൃത്വത്തില് ഇസ്ലാമിക് സ്റ്റേറ്റിനെതിരായ രാജ്യാന്തര സഹകരണം വിജയിച്ച് കൊണ്ടിരിക്കുകയാണ്. രാജ്യത്തെ ജനാധിപത്യത്തിന് നിങ്ങളെ ആവശ്യമാണ്. തെരഞ്ഞെടുപ്പില് മാത്രമല്ല, രാജ്യത്തിന്റെ എല്ലാ ശ്വാസത്തിലും നിങ്ങള് അനിവാര്യമാണെന്നും ഒബാമ പറഞ്ഞു.
https://www.facebook.com/Malayalivartha