സ്‌പെയിന്‍ സ്വദേശിയായ ടിറ്റോ ആറു മാസത്തിലേറെയായി സൈക്കിളില്‍ ലോകം ചുറ്റുകയാണ്. അഗ്‌നിശമന വിഭാഗത്തില്‍ ജോലിചെയ്യുന്ന ടിറ്റോ സാഹസികത വളരെ ഹരമാണ്. വിവിധ രാജ്യങ്ങളുടെ സംസ്‌കാരങ്ങളും അവയുടെ വൈവിധ്യം കണ്ടത്തൊന്‍ സൈക്കിള്‍ യാത്രയാണ് ഏറ്റവും നല്ല വഴിയെന്നാണ് ടിറ്റോ പറയുന്നത്. സൈക്കള്‍ യാത്ര താന്‍ വളരെയധികം ആസ്വദിക്കുന്നതായും ടിറ്റോ പറയുന്നു. സൈക്കിള്‍ യജ്ഞത്തില്‍ ഇതുവരെ ഏഴായിരം കിലോമീറ്ററാണ് ടിറ്റോ പിന്നിട്ടത്. ടിറ്റോയുടെ ഈ യാത്രയ്ക്ക് വലിയ പണചെലവൊന്നുമില്ല. കാരണം യാത്ര അവസാനിക്കുന്നിടത്ത് കിടന്നുറങ്ങും. അത് മലഞ്ചെരുവുകളോ, മരത്തണലുകളോ പാര്‍ക്കുകളോ ബീച്ചുകളോ ഒക്കെയാകാം. യാത്രക്ക് വേണ്ട സാമഗ്രികള്‍ ഒക്കെ സൈക്കിളില്‍ ഭദ്രമായി കെട്ടിയൊതുക്കി വെച്ചിട്ടുമുണ്ട്. സഞ്ചരിച്ച രാജ്യങ്ങളില്‍ ഏറ്റവും സഹൃദയരായ ജനങ്ങള്‍ ഒമാനികളും ഇറാനികളുമാണെന്നു പറയുന്ന ഇയാള്‍ ഒമാന്റെ ഭൂപ്രകൃതിയെയും വാനോളം പുകഴ്ത്തുന്നു.യൂറോപ്പ്, ആഫ്രിക്ക, ഏഷ്യ എന്നീ ഭൂഖണ്ഡങ്ങളിലെ ഏകദേശം എല്ലാരാജ്യങ്ങളും താണ്ടിയാണ് ടിറ്റോ ഇറാന്‍ വഴി ഒമാനിലെത്തിയത്.12 ദിവസത്തെ ഒമാന്‍ പര്യടനത്തിനു ശേഷം ഇന്ത്യയിലേക്ക് മടങ്ങുന്ന ടിറ്റോ ഇന്ത്യെ കണ്ടെത്തിക്കഴിഞ്ഞാല്‍ സ്വദേശമായ സ്‌പെയിനിലേക്ക് തിരിച്ചു പോകും.