അമേരിക്കന്‍ യാത്രയില്‍ ശ്രദ്ധിക്കണം... ഹാന്‍ഡ് ബാഗിനൊപ്പം ലാപ്‌ടോപ്, ടാബ്ലറ്റ് തുടങ്ങി മറ്റ് ഇലക്‌ട്രോണിക്‌സ് സാധനങ്ങള്‍ പാടില്ല
അമേരിക്കയിലേക്കുള്ള യാത്രയില്‍ വീണ്ടും വിലക്ക്. ചില മുസ്ലീം ഭൂരിപക്ഷ രാജ്യങ്ങളില്‍ നിന്നുള്ള യാത്രക്കാര്‍ക്ക് ഹാന്‍ഡ് ബാഗിനൊപ്പം ലാപ്‌ടോപ്, ടാബ്ലറ്റ്, മറ്റ് ഇലക്‌ട്രോണിക് സാധനങ്ങള്‍ക്കാണ് വിലക്ക് ഏര്‍പ്പെടുത്തിയിരിക്കുന്നത്. ചൊവ്വാഴ്ച മുതലാണ് വിലക്ക് നിലവില്‍ വരുന്നത്.
വിലക്ക് സംബന്ധിച്ച് യു.എസ് അധികൃതര്‍ ഔദ്യോഗികമായി ഒരു അറിയിപ്പും നല്‍കിയിരുന്നില്ല. എന്നാല്‍ റോയല്‍ ജോര്‍ദ്ദാന്‍ എയര്‍ലൈന്‍സ് അധികൃതര്‍ തിങ്കളാഴ്ച പുറത്തുവിട്ട ട്വീറ്റിലൂടെയാണ് വിലക്കിനെ കുറിച്ചുള്ള വിവരങ്ങള്‍ പുറത്തുവന്നത്. അമേരിക്കന്‍ വകുപ്പുകളുടെ കര്‍ശന നിര്‍ദേശത്തെ തുടര്‍ന്ന് യു.എസിലേക്ക് പോകുന്നതും വരുന്നതുമായ യാത്രക്കാര്‍ക്ക് കൈവശം വയ്ക്കാവുന്ന ഇലക്‌ട്രോണിക് ഉപകരണങ്ങള്‍ വിമനത്തില്‍ കര്‍ശനമായി നിരോധിച്ചിരിക്കുന്നു എന്നായിരുന്നു ട്വീറ്റ്. ഇത് പിന്നീട് നീക്കം ചെയ്തു. നിരോധനം സംബന്ധിച്ച് വാഷിംഗ്ടണ്‍ പോസ്റ്റും സ്ഥിരീകരിച്ചിട്ടുണ്ട്.
എന്നാല്‍ യു.എസ് എയര്‍ലൈന്‍സിന് വിലക്ക് ബാധകമല്ല. എട്ട് മുസ്ലീം ഭൂരിപക്ഷ രാജ്യങ്ങളില്‍ നിന്നും അമേരിക്കയിലേക്ക് നോണ്‍ സ്‌റ്റോപ് സര്‍വീസുള്ള പത്ത് വിമാനത്താവളങ്ങള്‍ക്കാണ് നിരോധന ഉത്തരവ് നല്‍കിയിരിക്കുന്നത്.
അതേസമയം, മൊബൈല്‍ ഫോണ്‍, മെഡിക്കല്‍ ഉപകരണങ്ങള്‍ എന്നിവയെ നിരോധനത്തില്‍ നിന്ന് ഒഴിവാക്കിയിട്ടുണ്ട്. വിലക്ക് സംബന്ധിച്ച് യു.എസ് സെക്യൂരിറ്റി ഡിപ്പാര്‍ട്ട്‌മെന്റോ മറ്റേതെങ്കിലും വകുപ്പുകളോ പ്രതികരിക്കാനും തയ്യാറായിട്ടില്ല. പുതിയ പരിഷ്‌കാരങ്ങള്‍ ഉടന്‍ നടപ്പാക്കും.
https://www.facebook.com/Malayalivartha
