സൗദി അറേബ്യയിലേക്കും തിരിച്ചുമുള്ള എല്ലാ വിമാന സര്‍വീസുകളും ഒക്‌ടോബര്‍ 17വരെ റദ്ദാക്കി വിമാനക്കമ്പനികളായ ഇന്‍ഡിഗോയും ആകാശ എയറും. ഗള്‍ഫ് മേഖലയിലെ സംഘര്‍ഷ സാഹചര്യം കണക്കിലെടുത്ത് റിയാദ്, ജിദ്ദ, ദമാം, മദീന എന്നീ നഗരങ്ങളിലേക്കും അവിടെനിന്നുമുള്ള സര്‍വീസുകളാണ് നിര്‍ത്തിവച്ചിരിക്കുന്നത്.

യാത്രക്കാരെ സഹായിക്കാന്‍ തങ്ങളുടെ സപ്പോര്‍ട്ട് ടീമുകള്‍ സജ്ജമാണെന്നും വിമാനത്താവളത്തിലേക്ക് പുറപ്പെടുന്നതിന് മുന്‍പ് യാത്രക്കാര്‍ തങ്ങളുടെ വിമാനത്തിന്റെ നിലവിലെ വിവരം കമ്പനിയുടെ വെബ്‌സൈറ്റ് വഴി പരിശോധിക്കണമെന്നും ഇന്‍ഡിഗോ അറിയിച്ചു. ടിക്കറ്റ് ബുക്ക് ചെയ്ത സമയത്ത് നല്‍കിയ ബന്ധപ്പെടാനുള്ള നമ്പറിലേക്ക് വിവരങ്ങള്‍ പങ്കുവച്ചിട്ടുണ്ടെന്ന് അധികൃതര്‍ വ്യക്തമാക്കി.