ദുരിതത്തില്‍ നിന്ന് മോചനം നേടിയ മലയാളി വീട്ടമ്മ നാട്ടിലേക്ക് മടങ്ങി
ഏഴുമാസം മുന്‍പ് ദമാമിലെ ഒരു വീട്ടില്‍ ജോലിക്കെത്തിയ ആലപ്പുഴ സ്വദേശിന് അംബികാദേവി ശമ്പളം കിട്ടാതെ വന്നപ്പോള്‍ വീട് വിട്ടിറങ്ങി അഭയകേന്ദ്രത്തില്‍ ആശ്രയം തേടിയിരുന്നു. വിശ്രമമില്ലാതെ നാലുമാസം ജോലി ചെയ്‌തെങ്കിലും ശമ്പളം നല്‍കിയില്ല. തുടര്‍ന്ന് സ്‌പോണ്‍സറുമായി വഴക്കിട്ടു വീടുവിട്ടിറങ്ങി ഇന്ത്യന്‍ എംബസി സേവനകേന്ദ്രം ഹെല്‍പ് ഡെസ്‌കില്‍ പരാതി നല്‍കി. എംബസിയില്‍ നിന്ന് സൗദി പൊലീസിന്റെ സഹായത്തോടെ ദമാമിലെ വനിതാ അഭയകേന്ദ്രത്തിലെത്തിച്ചു.
വനിതാ അഭയകേന്ദ്രത്തില്‍ എത്തിയ നവയുഗം ജീവകാരുണ്യ പ്രവര്‍ത്തക മഞ്ജു മണിക്കുട്ടനോട് സ്വന്തം അവസ്ഥ വിവരിച്ച് അംബിക സഹായം അഭ്യര്‍ഥിച്ചു. മഞ്ജുവും നവയുഗം ജീവകാരുണ്യ പ്രവര്‍ത്തകരും അംബികയുടെ സ്‌പോണ്‍സറെ ബന്ധപ്പെടാന്‍ ശ്രമിച്ചെങ്കിലും അയാള്‍ ഫോണ്‍ എടുക്കാന്‍ പോലും തയാറായില്ല. തുടര്‍ന്ന് മഞ്ജു പൊലീസ് അധികാരികളെക്കൊണ്ട് സ്‌പോണ്‍സറെ വിളിപ്പിച്ചു സംസാരിച്ചു. അംബികയെ താന്‍ ഹുറൂബ് ആക്കിയെന്നും ഇനി അവരുടെ ഒരു കാര്യത്തിലും താന്‍ ഇടപെടില്ല എന്നും സ്‌പോണ്‍സര്‍ പറഞ്ഞു.
അംബികയുടെ ഹുറൂബ് മാറ്റി മറ്റൊരു സ്‌പോണ്‍സറെ കണ്ടെത്തി ജോലി തുടരാനുള്ള ശ്രമങ്ങള്‍ നടത്താന്‍ നോക്കിയെങ്കിലും നാട്ടിലെ അംബികയുടെ ബന്ധുക്കളുടെ നിര്‍ദ്ദേശപ്രകാരം അംബികയെ തിരികെ അയയ്ക്കാന്‍ ശ്രമം തുടങ്ങി. വനിതാ അഭയകേന്ദ്രം അധികൃതരുടെ സഹായത്തോടെ അംബികയ്ക്ക് ഫൈനല്‍ എക്‌സിറ്റ് അടിച്ചു വാങ്ങി. നവയുഗത്തിന്റെ അഭ്യര്‍ഥന മാനിച്ച്, സാമൂഹിക പ്രവര്‍ത്തകനായ വിത്സണ്‍ ഷാജി അംബികയ്ക്ക് വിമാനടിക്കറ്റ് നല്‍കി. നിയമനടപടികള്‍ പൂര്‍ത്തിയായപ്പോള്‍ എല്ലാവര്‍ക്കും നന്ദി പറഞ്ഞ് അംബികാദേവി നാട്ടിലേക്ക് മടങ്ങി.
https://www.facebook.com/Malayalivartha
