ഓണാവധി അടുത്തതോടെ വിവിധ വിമാനക്കമ്പനികള്‍ ടിക്കറ്റ്‌ നിരക്കുകള്‍ 600 ശതമാനം വരെ വര്‍ദ്ധിപ്പിച്ചു. ഇത്‌ ഓണക്കാലത്ത്‌ അവധിയെടുത്ത്‌ നാട്ടിലെത്താനുള്ള യാത്രക്കാര്‍ക്ക്‌ തിരിച്ചടിയായി. ഗള്‍ഫ്‌ മേഖലയിലേക്ക്‌ പറക്കുന്ന യാത്രക്കാര്‍ക്ക്‌ ടിക്കറ്റില്‍ 600 ശതമാനം വരെ കൂടുതല്‍ നല്‍കേണ്ടിവരും. യൂറോപ്പ്‌, അമേരിക്ക എന്നിവിടങ്ങളിലേക്കുളള യാത്രക്കാര്‍ക്ക്‌ 200 ശതമാനം വരെ നിരക്ക്‌ കൂട്ടിയിട്ടുണ്ട്‌.
എയര്‍ഇന്ത്യ കോഴിക്കോട്‌-ഷാര്‍ജ മേഖലയിലെ വിമാനനിരക്ക്‌ 5500 രൂപ മുതല്‍ ആരംഭിച്ചിരുന്നത്‌ ഒറ്റ.യടിക്ക്‌ 40,000 രൂപയായി ഉയര്‍ത്തി. ഈ മേഖലയിലേക്കും തിരിച്ചുമുള്ള ടിക്കറ്റുകള്‍ ലഭ്യമല്ലാത്ത അവസ്ഥയുണ്ട്‌. എക്കോണമി ക്ലാസ്സില്‍ ലഭ്യമായ ടിക്കറ്റുകള്‍ മാസങ്ങള്‍ക്കു മുമ്പു തന്നെ വിറ്റു തീര്‍ന്നതിനാല്‍ ബിസിനസ്‌ ക്ലാസ്‌ ടിക്കറ്റുകള്‍ മാത്രമാണ്‌ ഒരുമാസമായി നിലവിലുള്ളത്‌. ഇവയിലാണ്‌ വലിയ വര്‍ദ്ധനവ്‌ ഉണ്ടായിരിക്കുന്നത്‌.
കോഴിക്കോട്‌-സൗദിഅറേബ്യ ടിക്കറ്റുകള്‍ക്ക്‌ 9,600 രൂപയായിരുന്നത്‌ 34,000 രൂപ മുതല്‍ 40,000 രൂപ വരെ ഇപ്പോള്‍ നല്‍കണം. 6500 മുതല്‍ 7000 രൂപ വരെയുണ്ടായിരുന്ന കോഴിക്കോട്‌-ദുബായ്‌ ടിക്കറ്റിന്‌ ഇപ്പോള്‍ 30,000 രൂപയാണ്‌ നിരക്ക്‌.
കൂടാതെ പ്രമുഖ വിദേശ വിമാനക്കമ്പനികളും നിരക്കുകള്‍ ഉയര്‍ത്തി കഴിഞ്ഞു. ഗള്‍ഫ്‌ മേഖലയിലെ അവധിക്ക്‌ നാട്ടില്‍ വന്നിരുന്ന പ്രവാസികള്‍ കുടുംബത്തോടൊപ്പം തിരിച്ചു പോകുന്ന സമയമാണിത്‌. ഈ സമയത്തെ മുതലെടുത്താണ്‌ വിമാന കമ്പനികള്‍ നിരക്കുകള്‍ കുത്തനെ ഉയര്‍ത്തിയത്‌.
നാലു പേരടങ്ങുന്ന ഒരു കുടുംബത്തിന്റെ മടക്കയാത്രാടിക്കറ്റന്മേല്‍ ഒന്നരലക്ഷം രൂപയുടെ വര്‍ദ്ധനവാണുണ്ടായിരിക്കുന്നത്‌. ഇതുമൂലം അനേകം പ്രവാസികുടുംബങ്ങളുടെ മടക്കയാത്ര പ്രതിസന്ധിയിലായി. പലരും കുടുംബത്തെ നാട്ടില്‍ നിര്‍ത്തി ഒറ്റയ്‌ക്ക്‌ മടങ്ങാനാണ്‌ ഉദ്ദേശിക്കുന്നത്‌.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha