എണ്ണടാങ്കറിനുനേരെ കടല്‍ക്കൊളളക്കാരുടെ ആക്രമണം
ലോകത്തിലെ എണ്ണനീക്കത്തിന്റെ മുഖ്യജലപാതയായ ഹോര്‍മൂസ്‌ കടലിടുക്കില്‍ എണ്ണടാങ്കറിനു നേരെ കടല്‍ക്കൊളളക്കാരുടെ ആക്രമണ മുണ്ടായതായി റിപ്പോര്‍ട്ട്‌. പാനമയുടെ എണ്ണടാങ്കറാണെന്നാണു സൂചന. ആളപായമുളളതായി റിപ്പോര്‍ട്ടില്ല. ചെറിയ നൗകകളില്‍ വന്ന ആയുധധാരികളായ ആറുപേര്‍ എണ്ണടാങ്കറിനു നേരെ വെടിയുതിര്‍ക്കുകയായിരുന്നുവെന്ന്‌ വാര്‍ത്താ ഏജന്‍സികള്‍ റിപ്പോര്‍ട്ട്‌ ചെയ്തു.
ഈ സംഭവത്തിനുശേഷം ഏതാനും മണിക്കൂറുകള്‍ക്കുളളില്‍ ഇതേ മേഖലയില്‍ രണ്ടു ചരക്കു കപ്പലുകള്‍ക്കുനേരെയും ബോട്ടിലെത്തിയ കൊളളക്കാര്‍ ആക്രമണത്തിനൊരുങ്ങിയതായും റിപ്പോര്‍ട്ടുകള്‍ സൂചിപ്പിക്കുന്നു. ഹോര്‍മൂസ്‌ കടലിടുക്കില്‍ ഇത്തരം ആക്രമണങ്ങള്‍ അപൂര്‍വ്വമാണ്‌. വിവിധ രാജ്യങ്ങളുടെ നാവിക സേനകള്‍ ഗള്‍ഫ്‌ മേഖലയില്‍ പട്രോളിങ്‌ ശക്തമാക്കിയതിനെ തുടര്‍ന്ന്‌ കടല്‍ക്കൊളളക്കാരുടെ ആക്രമണത്തില്‍ ഈയിടെയായി അല്‍പം ശമനമുണ്ടായിരുന്നു.
https://www.facebook.com/Malayalivartha
