യുഎസില്‍ മോഷണ ശ്രമത്തിനിടെ ഇന്ത്യക്കാരനായ വിദ്യാര്‍ഥി വെടിയേറ്റു മരിച്ചു. പഞ്ചാബ് സ്വദേശിയായ ധരം പ്രീത് സിങ്ങാണ് കലിഫോര്‍ണിയയില്‍ വെച്ച് കൊല്ലപ്പെട്ടത്. സംഭവവുമായി ബന്ധപ്പെട്ട് ഇന്ത്യന്‍ വംശജനെ ഫെഡറല്‍ പോലീസ് അറസ്റ്റ് ചെയ്തു. ഇരുപത്തിരണ്ടുകാരനായ അമിത്‌രാജ് സിങ് അത്‌വാളാണ് പോലീസ് പിടിയിലുള്ളത്. മറ്റു മൂന്നപേരെ പോലീസ് തിരയുന്നു. 

പഠനം കഴിഞ്ഞുള്ള ഒഴിവുവേളയില്‍ കലിഫോര്‍ണിയയിലെ ഗ്യാസ് സ്‌റ്റേഷനു സമീപമുള്ള ഷോപ്പില്‍ ജോലിചെയ്തിരുന്ന യുവാവാണ് കൊല്ലപ്പെട്ടത്. ചൊവ്വാഴ്ച രാത്രി കടയില്‍ മോഷ്ടിക്കാന്‍ കയറിയ സംഘമാണ് ധരം പ്രീത് സിങ്ങിനെ കൊലപ്പെടുത്തിയത്.
മോഷണ സംഘത്തെ കണ്ട് ഭയന്ന് ധരംപ്രീത് സിങ്ങ് കൗണ്ടറിനു കീഴില്‍ ഒളിച്ചിരുന്നുവെങ്കിലും മോഷ്ടാക്കളിലൊരാള്‍ വെടിയുതിര്‍ത്ത് കൊലപ്പെടുത്തുകയായിരുന്നു.
ധരംപ്രീതിനെ കൊലപ്പെടുത്തിയതിനുശേഷം സംഘം കടയില്‍നിന്ന് പണവും സാധനങ്ങളും മോഷ്ടിക്കുകയും ചെയ്തു. കടയില്‍ സാധനം വാങ്ങാനെത്തിയ ആളാണ് ധരംപ്രീതിന്റെ മൃതദേഹം കണ്ടെത്തിയത്.
ധരംപ്രീത് മൂന്നുവര്‍ഷം മുന്‍പ് സ്റ്റുഡന്റ് വിസയിലാണ് യുഎസിലെത്തിയത്.
കൊലപാതകവാര്‍ത്ത ഞെട്ടലുളവാക്കിയെന്ന് പഞ്ചാബ് മുഖ്യമന്ത്രി അമരീന്ദര്‍ സിങ് അറിയിച്ചു.