ശീതള പാനീയമായ സ്‌പ്രൈറ്റ് പാക്ക് ചെയ്യാൻ 60 വർഷത്തിലേറെയായി ഉപയോഗത്തിലുള്ള പച്ചക്കുപ്പി മാറ്റാൻ കൊക്കോകോള കമ്പനിയുടെ തീരുമാനം. ഇനിമുതൽ സുതാര്യമായ പ്ലാസ്റ്റിക് ബോട്ടിലുകളാവും സ്‌പ്രൈറ്റ് പാക്ക് ചെയ്യാനും ഉപയോഗിക്കുക. ബുധനാഴ്ച പുറത്തിറക്കിയ പ്രസ്താവനയിലൂടെയാണ് കൊക്കകോള കമ്പനി ഈ വിവരം പുറത്ത് വിട്ടത്. പ്ലാസ്റ്റിക് പുനരുപയോഗം ചെയ്യുന്നതിനുള്ള വ്യവസ്ഥിതിക്ക് ഊർജ്ജം പകരുന്നതിനാണ് ഈ തീരുമാനം കമ്പനി കൈക്കൊള്ളുന്നത്. കുപ്പിയുടെ പുതിയ ഡിസൈൻ ഓഗസ്റ്റ് ആദ്യം പുറത്തിറക്കും.

പോളിയെത്തിലീൻ ടെറഫ്താലേറ്റ് (പിഇടി) കൊണ്ടാണ് നിലവിലുള്ള പച്ച കുപ്പി നിർമ്മിച്ചിരിക്കുന്നത്. ഇത് പലപ്പോഴും ഒറ്റത്തവണ ഉപയോഗിക്കാവുന്ന ഉത്പന്നമാക്കി പരിവർത്തനം ചെയ്യാനാകും. പ്രധാനമായും വസ്ത്രങ്ങൾ, പരവതാനി എന്നിവയുടെ നിർമ്മാണത്തിനായി ഉപയോഗിക്കാറുണ്ട്. എന്നാൽ സുതാര്യമായ കുപ്പികളിലുള്ള ക്ലിയർ പ്ലാസ്റ്റിക് പുനരുപയോഗിക്കുന്നത് വളരെ എളുപ്പമാണ്. ഇവ പുനഃചംക്രമണം ചെയ്യുമ്പോൾ വീണ്ടും കുപ്പികളാക്കി പുനർനിർമ്മിക്കാൻ കഴിയും. ഇത് പ്ലാസ്റ്റിക്കിന്റെ റീസൈക്ലിംഗിന് കൂടുതൽ വേഗവും പൂർണതയും നൽകും.

സുതാര്യമായ ബോട്ടിലിൽ സ്‌പ്രൈറ്റ് വരുമ്പോഴും പച്ച നിറത്തിലാവും അതിലെ പേരും മറ്റു വിവരങ്ങളും നൽകുന്നത്. എന്നാൽ ലോഗോയ്ക്ക് മാറ്റമുണ്ടാകുമെന്നും റിപ്പോർട്ടുകളുണ്ട്. അമേരിക്കയിൽ 1961ലാണ് ആദ്യമായി സ്‌പ്രൈറ്റ് വിപണിയിലിറങ്ങുന്നത്. നാരങ്ങയുടെ ഫ്‌ളേവറിൽ ഇറങ്ങിയ സ്‌പ്രൈറ്റ് അന്ന് മുതൽക്കേ പച്ച നിറത്തിലാണ് പായ്ക്ക് ചെയ്യുന്നത്. എന്നാൽ ചില രാജ്യങ്ങളിൽ ചെറി, ഷുഗർ ഫ്രീ തുടങ്ങിയ രുചികളിൽ ക്ലിയർ പ്ലാസ്റ്റിക് കുപ്പികളിലാണ് സ്‌പ്രൈറ്റ് വിൽപ്പനയ്‌ക്കെത്തുന്നത്.