വാണിമേലില്‍ കഴിഞ്ഞ ദിവസം പോലീസ് കണ്‍ട്രോള്‍ റൂം സംഘം വാഹന പരിശോധന നടത്തുകയായിരുന്നു.

അപ്പോഴാണ് വാണിമേല്‍ വയല്‍ പീടികക്കടുത്ത് ഒരു ഹൈസ്‌കൂള്‍ വിദ്യാര്‍ഥി സ്‌കൂട്ടറുമായി വന്നത്.

ഹെല്‍മറ്റ് ധരിക്കാതെ എത്തിയ വിദ്യാര്‍ഥിയെ പോലീസ് കൈകാണിച്ചു നിര്‍ത്തി. പക്ഷേ ചോദ്യം ചെയ്യുന്നതിനിടെ കുട്ടി ബോധരഹിതനായി.

വാഹനം സ്‌റ്റേഷനിലേക്ക് കൊണ്ട് പോകുമെന്നും ആയിരത്തി അഞ്ഞൂറ് രൂപ പിഴ അടക്കണമെന്നും പോലീസ് പറഞ്ഞതോടെയാണ് വിദ്യാര്‍ഥി കുഴഞ്ഞ് വീണത്. ഇതോടെ പോലീസ് സംഘം പരിഭ്രാന്തരായി.

പണിപാളിയെന്ന് മനസിലായ പോലീസ്, കുട്ടിയെ പരിസരത്തുള്ള യുവാവിനെ ഏല്‍പ്പിച്ച് രക്ഷപ്പെടുകയായിരുന്നു.

നാദാപുരം മേഖലയില്‍ കുട്ടി ഡ്രൈവര്‍മാരുടെ എണ്ണം വര്‍ദ്ധിച്ചു വരുന്നതായാണ് പോലീസ് പറയുന്നത്.

മേഖലയിലെ ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികളാണ് പ്രധാനമായും ബൈക്കുകളിലെത്തുന്നത്.