ഡബിള്ബെല് കേട്ടാല് പിന്നെ വേറെന്ത് നോക്കാന്...? മുന്നോട്ട് പോകണം, അത്രയേ ആ ഡ്രൈവറും ചെയ്തുള്ളൂ...പക്ഷേ...!
കഴിഞ്ഞ ദിവസം കാസര്കോട് നിന്ന് തൃശൂരിലേക്ക് പുറപ്പെട്ട കെഎസ്ആര്ടിസിയുടെ ദീര്ഘദൂര ഫാസ്റ്റ് പാസഞ്ചര് ബസില് നടന്ന സംഭവങ്ങള്ക്ക് ഡ്രൈവറെ കുറ്റപ്പെടുത്തണോ എന്നാണ് പലരും ചിന്തിക്കുന്നത്.
പുലര്ച്ചെ നാലരയ്ക്ക് കാസര്കോട് ഡിപ്പോയില് നിന്നെടുത്ത ബസ് പയ്യന്നൂര് ഡിപ്പോയിലെത്തിയപ്പോള് കണ്ടക്ടര് ടൈം റജിസ്റ്ററില് ഒപ്പിടാനായി ഇറങ്ങി. ഇതിനുപിന്നാലെ, ഇറങ്ങേണ്ട യാത്രക്കാരും ഇറങ്ങി. എന്നാല് ബസിനുള്ളിലേക്ക് യാത്രക്കാര് കയറുന്നതിനിടയില് ആരോ അറിയാതെ ബെല്ല് മുട്ടി. ഇതോടെ ഡ്രൈവര് ബസ് എടുത്തു.
പയ്യന്നൂര് ഡിപ്പോയില്നിന്ന് പുറപ്പെട്ട ബസ് പിലാത്തറയിലെത്തിയിട്ടും ടിക്കറ്റ് നല്കാന് കണ്ടക്ടറെത്താതെ വന്നപ്പോള് യാത്രക്കാര് കണ്ടക്ടറെ അന്വേഷിച്ചു.
അപ്പോഴാണ് കണ്ടക്ടര് കയറിയില്ലെന്ന വിവരം ഡ്രൈവര് അറിയുന്നത്. അപ്പോഴേയ്ക്കും കണ്ടക്ടറില്ലാതെ ആ ബസ് ഏഴ് കിലോമീറ്റര് ഓടിക്കഴിഞ്ഞിരുന്നു! ഇതോടെ ബസ് പിലാത്തറയില് നിര്ത്തി. പയ്യന്നൂര് ഡിപ്പോയില് കുടുങ്ങിപോയ കണ്ടക്ടര് ഓട്ടോറിക്ഷയില് പിലാത്തറയിലെത്തിയാണ് ബസില് കയറിയത്. അങ്ങനെ ആറേമുപ്പതിന് ബസ് പിലാത്തറയില്നിന്ന് തൃശൂരിലേക്ക് പുറപ്പെട്ടു.
അതുകൊണ്ട് ഇനി ഡബിള്ബെല് കേട്ടാല്, ഡ്രൈവര് തിരിഞ്ഞുനോക്കി ഉറപ്പാക്കിയിട്ടുവേണം വണ്ടിയെടുക്കാനെന്നെങ്ങാനും പറയാന് പറ്റുമോ...?
https://www.facebook.com/Malayalivartha
