കൂറ്റന്‍ ട്രക്കില്‍ വന്നിടിച്ച് തെറിച്ച് പോകാനോ ട്രക്കിനടിയിലേക്ക് ഇടിച്ചു കയറാനോ ഒക്കെ സാദ്ധ്യത ഉണ്ടായിരുന്ന ഒരു കാര്‍ അങ്ങനെയൊന്നും സംഭവിക്കാതെ തലനാരിഴയ്ക്ക് രക്ഷപ്പെടുന്നതിന്റെ വീഡിയോ ദൃശ്യങ്ങള്‍ വൈറലാകുന്നു. രാജസ്ഥാനിലെ ഉദയ്പൂര്‍ ദേശീയപാതയിലാണ് സംഭവമെന്നാണ് റിപ്പോര്‍ട്ടുകള്‍.

ട്രക്ക് റോഡിന്റെ ഇടതുവശത്തേക്ക് ഒതുക്കാന്‍ ശ്രമിക്കുമ്പോഴായിരുന്നു സംഭവം. മാരുതി എസ് ക്രോസാണ് അപകടം ഒഴിഞ്ഞ് രക്ഷപ്പെട്ടത്. കാറിന്റെ ഡാഷ്‌ബോര്‍ഡ് ക്യാമറയിലാണ് ദൃശ്യങ്ങള്‍ പതിഞ്ഞത്.

ടേണിങ് റേഡിയസ് കുറവായതിനാല്‍ വലതുവശത്തെ ലൈനിലേക്ക് അല്‍പം കയറ്റി ഇടത്തേയ്ക്ക് ഒതുക്കാന്‍ ശ്രമിക്കുകയായിരുന്നു കൂറ്റന്‍ ട്രക്ക്. ഈ സമയം ട്രക്കിന്റെ ഇടതുവശത്തുകൂടി ഓവര്‍ടേക്ക് ചെയ്യാന്‍ ശ്രമിക്കുകയായിരുന്നു കാര്‍. ട്രക്ക് ഡ്രൈവര്‍ കാറിനെ കണ്ടതുകൊണ്ട് മാത്രമാണ് കൂട്ടിയിടി ഒഴിവായത്.

വീഡിയോയ്ക്ക് നിരവധി പേര്‍ പ്രതികരണങ്ങളുമായെത്തുന്നുണ്ട്. ഇടതുവശത്തു കൂടി ഓവര്‍ടേക്ക് ചെയ്യാന്‍ ശ്രമിച്ച കാര്‍ ഡ്രൈവറാണ് കുറ്റക്കാരനെന്നും അല്ല അലക്ഷ്യമായി ട്രക്കോടിച്ച ഡ്രൈവറാണ് കുറ്റക്കാരനെന്നും അഭിപ്രായങ്ങള്‍ ഉയരുന്നുണ്ട്.