ആരെങ്കിലും എന്റെ കുഞ്ഞിനെയൊന്ന് രക്ഷിക്കണേ..! വാഹനമിടിച്ചു വഴിയരികില് കിടന്ന നായ്ക്കുഞ്ഞിനെ രക്ഷിക്കാന് വാഹനങ്ങള്ക്കു പിന്നാലെ പായുന്ന അമ്മ നായ
വഴിയരികില്, വാഹനമിടിച്ച് പരിക്കുപറ്റി കിടക്കുന്ന തന്റെ കുഞ്ഞിനെ രക്ഷിക്കുവാന് റോഡില് കൂടി പോകുന്ന വാഹനങ്ങളുടെ പിന്നാലെ അമ്മ നായ ഓടുന്നതിന്റെ ഹൃദയഭേദകമായ ദൃശ്യങ്ങള് സോഷ്യല്മീഡിയയുടെ കണ്ണ് നനയിക്കുന്നു.
ഫിലിപ്പിന്സിലെ ഇല്ലോയ്ലോ സിറ്റിയിലെ ലാ പാസ് ടൗണിലാണ് സംഭവം.ഇവിടെയുള്ള റോഡിനു സമീപമാണ് ഈ തെരുവു നായയും കുട്ടികളും കാലങ്ങളായി ചുറ്റിത്തരിയുന്നത്. ഭക്ഷണം തേടി അമ്മ നായ സ്ഥലത്തു നിന്നും മാറിയ സമയം റോഡിലിറങ്ങിയ കുഞ്ഞുങ്ങളൊന്നിനെ വാഹനം ഇടിച്ചു തെറിപ്പിക്കുകയായിരുന്നു.
നായ കുഞ്ഞിന് എന്തെങ്കിലും സംഭവിച്ചോ എന്ന് നോക്കാന് പോലും തയാറാകാതിരുന്ന വാഹനത്തിന്റെ ഡ്രൈവര് അവിടെ നിന്നും സ്ഥലം വിട്ടു. തിരികെ എത്തിയ അമ്മ നായ കാണുന്നത് ചോരയൊലിപ്പിച്ച് വഴിയരികില് കിടക്കുന്ന തന്റെ കുഞ്ഞിനെയായിരുന്നു. കുഞ്ഞിനെ മരണത്തിന് വിട്ടുകൊടുക്കില്ലെന്ന് തീരുമാനിച്ചുറപ്പിച്ച അമ്മ-നായ വഴിയില് കൂടി കടന്നു പോയ വാഹനങ്ങള്ക്കു മുമ്പില് നിന്ന് കുരച്ചു. എന്നാല് ഒരു വാഹനം പോലും നിര്ത്തിയില്ല.
ഏറെ താമസിയാതെ ആ നായ കുഞ്ഞ് വഴിയരികില് കിടന്ന് ജീവന് വെടിഞ്ഞു. സംഭവമറിഞ്ഞ് അധികൃതര് എത്തിയിരുന്നുവെങ്കിലും മറ്റ് രണ്ട് കുഞ്ഞുങ്ങളുമായി അമ്മ നായ സ്ഥലത്തു നിന്നും അപ്രത്യക്ഷമായിരുന്നു. വഴിയാത്രക്കാരിലൊരാള് പകര്ത്തി സോഷ്യല്മീഡിയയില് പങ്കുവച്ചിരിക്കുന്ന വീഡിയോ വൈറലായി മാറിയിരിക്കുകയാണ്. ആര്ക്കെങ്കിലും കുഞ്ഞിനെ രക്ഷിക്കാമായിരുന്നുവെന്നാണ് ഭൂരിഭാഗമാളുകളുടെയും അഭിപ്രായം.
https://www.facebook.com/Malayalivartha
