ഈ വിഡിയോ ലോകം ശ്വാസമടക്കി കാണുകയാണ്. കടലില്‍ ചത്തുപൊങ്ങിയ ഭീമന്‍ തിമിംഗലത്തെ ആഹാരമാക്കുന്ന ഗ്രേറ്റ് വൈറ്റ് ഷാര്‍ക്കിന്റെ ദൃശ്യങ്ങളാണ് വൈറലാകുന്നത്. അതിനടുത്തു നിന്നും ഇതു ഇത് പകര്‍ത്തിയവരെ കുറിച്ചും അദ്ഭുതമാണ്.

ചത്തുപൊങ്ങിയ ഒരു തിമിംഗലത്തിന്റെ മൃതശരീരം കൂര്‍ത്ത പല്ലുകളുപയോഗിച്ചു കീറിമുറിക്കുകയായിരുന്നു സ്രാവ്. ഈ സമയം രണ്ടു ഡൈവര്‍മാരും ഇതിന്റെ സമീപമെത്തി ഇത് ക്യാമറയില്‍ പകര്‍ത്തുകയായിരുന്നു. തൊട്ടടുത്തു മനുഷ്യരെത്തിയിട്ടും ഇവരെ ആക്രമിക്കാന്‍ സ്രാവ് ശ്രമിക്കുന്നില്ല എന്നത് ഗവേഷകരിലും അമ്പരപ്പുണ്ടാക്കുകയാണ്.

ജുവാന്‍ ഒലിഫന്റ്, ഓസിയാന്‍ റാംസി എന്നീ ഡൈവര്‍മാരാണ് വിഡിയോ പകര്‍ത്തിയത്. ഒലിഫന്റാണ് ഈ കൂറ്റന്‍ സ്രാവിന്റെ വിഡിയോ പകര്‍ത്തിയത്. ലോകത്തിലെ ഏറ്റവും വമ്പത്തി സ്രാവിനൊപ്പം മുഖാമുഖമെത്തിയ നീന്തല്‍ അനുഭവത്തിന്റെ വിഡിയോ ഇന്‍സ്റ്റഗ്രാമിലും അദ്ദേഹം പങ്കുവച്ചു.

ഡീപ് ബ്ലൂവിനൊപ്പം ഏകദേശം ഒരു മുഴുവന്‍ ദിവസം തന്നെ ഇരുവരും ചെലവിട്ടു. സ്രാവുകളുടെ പ്രാധാന്യവും അവയെ സംരക്ഷിക്കേണ്ടതിന്റെ ആവശ്യകതയും ജനങ്ങളെ അറിയിക്കാനാണു തങ്ങളുടെ ശ്രമമെന്ന് ഒലിഫന്റ് പറയുന്നു.