ഈ പരിഭാഷ പൃഥ്വിരാജിനങ്ങ് പിടിച്ചു!
സെലിബ്രിറ്റികള് സോഷ്യല്മീഡിയയില് പങ്കുവയ്ക്കുന്ന പോസ്റ്റിന് രസകരമായ നിരവധി കമന്റുകള് ലഭിക്കാറുണ്ട്. ചില കമന്റുകള് വായിച്ചാല് പരിസരം മറന്ന് ഉറക്കെ ചിരിക്കുക വരെ ചെയ്യും. എന്നാല് തങ്ങളുടെ പോസ്റ്റിന് ലഭിക്കുന്ന കമന്റുകള് സെലിബ്രിറ്റികള് ഷെയര് ചെയ്യുക പതിവില്ല.
പൃഥ്വിരാജ് ആ പതിവ് ഒന്ന് മാറ്റിപ്പിടിച്ചു. തന്നെ പൊട്ടിച്ചിരിപ്പിച്ച ഒരു കമന്റ് സോഷ്യല്മീഡിയയില് അദ്ദേഹം പോസ്റ്റ് ചെയ്തിരിക്കയാണ്. തന്റെ സംവിധാനത്തിലൊരുങ്ങുന്ന ലൂസിഫറിന്റെ ചിത്രീകരണം പൂര്ത്തിയായതുമായി ബന്ധപ്പെട്ടുള്ള ഒരു കുറിപ്പ് പൃഥ്വി സോഷ്യല്മീഡിയയില് പങ്കുവച്ചിരുന്നു.
ഇന്ന് പുലര്ച്ച 4.30ന് ലക്ഷദ്വീപിലെ കവരത്തി ദ്വീപിലുള്ള കിഴക്കെ ജെട്ടിയില് വച്ച് ഞങ്ങള് ലൂസിഫറിന്റെ അവസാന രംഗവും ചിത്രീകരിച്ചു. ഷൂട്ടിംഗ് പൂര്ത്തിയായിരിക്കുന്നു. എന്നായിരുന്നു പൃഥ്വി ഇംഗ്ലീഷില് കുറിച്ചത്.
പൃഥ്വിയുടെ വാക്കുകള്, മലയാളം മാത്രമറിയുന്ന ആരാധകര് കൂടി മനസ്സിലാക്കിയ്ക്കോട്ടേ എന്നു തോന്നിയിട്ടോണോ എന്തോ, ആ കമന്റിന്റെ മലയാളപരിഭാഷ പ്രവീണ് എന്നയാള് കമന്റായി നല്കി. ആ ആരാധകന് അത് മനസ്സിലാക്കിയ രീതിയില് പരിഭാഷ നല്കിയതാണോ അതോ അതില് അല്പ്പം ഹാസ്യത്തിന്റെ മേമ്പൊടി ചേര്ത്തതാണോ എന്നറിയില്ല, പൃഥ്വി ഉദ്ദേശിച്ചതുമായി പുലബന്ധം പോലുമുണ്ടായിരുന്നില്ല പരിഭാഷയ്ക്ക്! ഏതായാലും പൃഥ്വിയ്ക്കത് നന്നായി രസിച്ചു.
ആരാധകന്റെ പരിഭാഷ ഇതാ കാണൂ... ഇന്ന് പുലര്ച്ചെ നാലരക്ക് പുറങ്കടലില് നിന്നും കിഴക്ക് ഭാഗത്ത് നിന്നായി കിട്ടിയ ജട്ടിയുമായി ലക്ഷദ്വീപിലെ കവരത്തി ദ്വീപിലെത്തി, ഞങ്ങള് എല്ലാവരും കൂടെ ലൂസിഫറെ വെടിവെച്ചു കൊന്നു കാനിലാക്കി. അതെ നല്ലോണം കെട്ടിത്തന്നെ.
ഏറെ ചിരിയുണര്ത്തിയ ഈ കമന്റിന്റെ സ്ക്രീന് ഷോട്ട് പൃഥ്വിരാജ് ട്വീറ്റ് ചെയ്യുകയായിരുന്നു.
https://www.facebook.com/Malayalivartha
