പുല്ല്...ഷൂസ്! നൈക്കിയുടെ ലേറ്റസ്റ്റ് ട്രെന്ഡിങ് ഷൂ ചര്ച്ചയാവുന്നു
ഇംഗ്ലീഷ് അറിയാത്ത ഗ്രാമീണരെ പണ്ട് കവാത്ത് പഠിപ്പിക്കാന് ശ്രമിച്ച സായിപ്പിനെ കുറിച്ചൊരു കഥയുണ്ട്. ലെഫ്റ്റ്...റൈറ്റ് എന്ന് പലയാവര്ത്തി പറഞ്ഞുകൊടുത്തിട്ടും മനസ്സിലാക്കാന് പാടുപെടുന്ന അവരെ അവര്ക്കു മനസ്സിലാകുന്ന ഭാഷയില് പഠിപ്പിക്കാന് തീരുമാനിക്കുന്നു. അതിനായി എല്ലാവരുടേയും ഒരു കാലില് ഓല കൊണ്ടും മറ്റേ കാലില് തുണി ഉപയോഗിച്ചും ഓരോ കെട്ട് കെട്ടി. പിന്നീട് ലെഫ്റ്റ്, റൈറ്റ് എന്നതിനു പകരം ഓലക്കാല്, ശീലക്കാല് എന്നു പറഞ്ഞ് കവാത്ത് പഠിപ്പിച്ചെടുത്തെന്നാണ് കഥ.
സ്പോര്ട്സ് ഷൂ ബ്രാന്ഡുകളിലെ അതികായന്മാരായ നൈക്കിയും ഏതാണ്ട് ആ വഴിക്കാണെന്ന് തോന്നിപ്പോകും അവര് പുതുതായി പുറത്തിറക്കാന് തീരുമാനിച്ചിരിക്കുന്ന സ്പോര്ട്സ് ഷൂവിന്റെ വിശേഷങ്ങള് കേട്ടാല്. കൃത്രിമ പുല്ലുകള് പിടിപ്പിച്ചിട്ടുള്ള ഷൂ ആണ് അവര് ഉടനെ വിപണിയില് എത്തിക്കുന്നതെന്നാണ് അറിയുന്നത്.
നൈക്കി ഷൂസുകളിലെ ഏറെ പ്രിയമാര്ന്ന ഏയര് മാക്സ് ട്രെയിനര് വിഭാഗത്തില്പ്പെട്ട 'പുല്ല് ഷൂസുകളുടെ' ചിത്രങ്ങള് ഇതിനകം സോഷ്യല്മീഡിയയില് ട്രെന്ഡിങ് ആണ്. ഗോള്ഫ് കോഴ്സുകള്ക്ക് അനുയോജ്യമാവും വിധമാണ് ഷൂസുകളുടെ രൂപകല്പ്പനയെന്നു പറയപ്പെടുമ്പോഴും പുല്ലു മുടിയ നിലയിലുള്ള ഷൂസുകളുടെ ഡിസൈന് മികവിന് മികച്ച പ്രതികരണമാണ് ലഭിക്കുന്നത്.
ഷൂസിന്റെ അപ്പറില് മാത്രമാണ് പുല്ലുകളുടെ ഡിസൈനെന്നാണ് ചിത്രങ്ങളില് നിന്നു വ്യക്തമാകുന്നത്. കടുംപച്ച ഷൂ ലെയ്സും വെള്ള നൈക്കി ലോഗോയും ഷൂസിനെ മറ്റുള്ള ഡിസൈനുകളില് നിന്നു വ്യത്യസ്തമാക്കുന്നു. സോള് പതിവ് ഗം റബര് മെറ്റീരിയലാണെന്നു വിശ്വസിക്കുമ്പോഴും ഇനിയും അത്ഭുതങ്ങള് മറഞ്ഞിരിപ്പുണ്ടെന്ന വിശ്വാസത്തിലാണ് ആരാധകര്.
എന്നാല് പുത്തന് ഷൂസിനെ ട്രോളുന്നവരും കുറവല്ല. ഷൂസിനെ ചുറ്റിപ്പറ്റി വിവിധ മീമീകളും ഗിഫുകളും അരങ്ങ് തകര്ക്കുന്നുണ്ട്. എന്നു വിപണിയിലെത്തും, വില എത്രയാവുമെന്നുള്ള ചോദ്യങ്ങള്ക്ക് ഉത്തരമില്ലെങ്കിലും ഇവ വിപണയില് വിജയകീരിടം നേടുമെന്ന ഉറച്ച വിശ്വാസത്തിലാണ് നൈക്കി ആരാധകര്.
https://www.facebook.com/Malayalivartha