കടുത്ത ചൂടില് നിന്നും രക്ഷപ്പെടാന് ഷവര് തേടി എത്തിയത് ഏഴടി നീളമുളള പെരുമ്പാമ്പ്!
ലൂക്ക് ഹണ്ട്ലി ഓസ്ട്രേലിയയില് ഖ്യാതി നേടിയ ഒരു പാമ്പുപിടുത്തക്കാരനാണ് . ലൂക്ക് പുതിയതായി പിടികൂടിയ പെരുമ്പാമ്പ് വാര്ത്തകളില് നിറയുകയാണ്. കൊടുംകാട്ടില് നിന്നോ ആള്താമസമില്ലാത്ത ഇടങ്ങളില് നിന്നല്ല ലൂക്ക് ഈ പെരുമ്പാമ്പിനെ പിടികൂടിയത്. കുളിമുറിയിലെ ഷവറില് നിന്നാണ് ലൂക്ക് ഈ പാമ്പിനെ പിടികൂടിയതെന്നതാണ് കൗതുകം. ഓസ്ട്രേലിയയില് ചൂട് മുന് വര്ഷങ്ങളെ അപേക്ഷിച്ച് പരിധികള് ലംഘിക്കുകയാണ്.
കടുത്ത ചൂടായതിനാല് മനുഷ്യരെപ്പോലെ ശരീരം തണുപ്പിക്കുന്നതിനു വേണ്ടിയാണ് ഇഴജന്തുക്കള് വീടുകളിലേക്ക് എത്തുന്നതെന്ന് ലൂക്ക് പറയുന്നു. കഴിഞ്ഞ ദിവസമാണ് ഓസ്ട്രേലിയയില് ടോയ്ലറ്റില് പെരുമ്പാമ്പിനെ കണ്ടതെന്ന വാര്ത്തകള് പുറത്തു വന്നത്. മറ്റൊരു സംഭവത്തില് ടോയ്ലറ്റിലെത്തിയ പാമ്പ് സ്ത്രീയെ കടിച്ചിരുന്നു.
സതേണ് ക്വീന്സ്ലാന്ഡിലെ സണ്ഷൈന് കോസ്റ്റില് താമസിക്കുന്ന കുടുംബമാണ് കുളിമുറിയില് അപ്രതീക്ഷിതമായി പെരുമ്പാമ്പിനെ കണ്ടത്. രാവിലെ കുളിമുറിയില് കയറിയപ്പോള് കണ്ടത് ഏഴടി നീളമുള്ള പെരുമ്പാമ്പ് ഷവറില് തൂങ്ങിക്കിടക്കുന്നതാണ്. ഉടന് തന്നെ വിവരം അധികൃതരെ അറിയിക്കുകയായിരുന്നു. പാമ്പിനെ പിടികൂടുന്നതിന്റെ വിഡിയോ ലൂക്ക് തന്റെ ഫെയ്സ്ബുക്കില് പോസ്റ്റ് ചെയ്യുകയും ചെയ്തു.
കടുത്ത ചൂടിനെ അതിജീവിക്കാന് തണുപ്പുളള സ്ഥലങ്ങളില് പാമ്പുകള് ചുറ്റിപ്പിടിച്ചു കിടക്കുന്നതും സാധാരണമാണെന്നും ഷവറുകളിലും ടോയ്ലെറ്റുകളിലും പാമ്പുകള് കയറിപ്പറ്റുന്നത് അതിസാധാരണമായി മാറുകയാണെന്നും ലൂക്ക് പറയുന്നു. ചൂട് മൂലം ജലാശയങ്ങളിലെ വെള്ളം വറ്റിയതിനാലാണ് തണുപ്പ് തേടി ഇഴജന്തുക്കള് വീടുകളിലേക്ക് എത്തുന്നതെന്നും ലൂക്ക് പറയുന്നു.
https://www.facebook.com/Malayalivartha