ദിണ്ഡുക്കല്‍ ജില്ലയിലെ വടമധുരയ്ക്കു സമീപം അയ്യലൂരില്‍ തമിഴ്‌നാട് അസീല്‍ ഓര്‍ഗനൈസേഷന്റെ നേതൃത്വത്തില്‍ നടന്ന കിളിമൂക്ക് കോഴികളുടെ (വിശറിപോലെ വാലുള്ള കോഴികള്‍) പ്രദര്‍ശനം നടന്നു.

പൂവന്‍കോഴികളുടെ പ്രദര്‍ശനത്തില്‍ ഒരു കോഴിക്ക് ഒന്നര ലക്ഷം രൂപവരെ വിലയെത്തി. എന്നിട്ടും ഉടമസ്ഥന്‍ കോഴിയെ വില്‍ക്കാന്‍ തയാറായില്ല.

തമിഴ്‌നാട്ടില്‍നിന്നും സമീപ സംസ്ഥാനങ്ങളില്‍നിന്നും കീരി, മയില്‍, കൊക്കുവെള്ള, എണ്ണക്കറുപ്പ്, കാകം തുടങ്ങി വിവിധ ഇനങ്ങളിലുള്ള 452 പൂവന്‍കോഴികളെ പ്രദര്‍ശനത്തില്‍ പങ്കെടുപ്പിച്ചു.

അന്യംനിന്നുപോകുന്ന പാരമ്പര്യ പൂവന്‍കോഴി ഇനങ്ങളെ സംരക്ഷിക്കുന്നതിനാണ് പ്രദര്‍ശനങ്ങള്‍ സംഘടിപ്പിക്കുന്നതെന്നു സംഘാടകര്‍ പറഞ്ഞു. എട്ടു വര്‍ഷം മുമ്പുവരെ നല്ല ബ്രീഡിലുള്ള പൂവന്‍ കോഴികള്‍ ഉണ്ടായിരുന്നു. ഇന്ന് ഇതെല്ലാം അന്യമാകുകയാണ്. അയ്യല്ലൂരില്‍ രണ്ടാം വര്‍ഷമാണ് ഇവയെ സംരക്ഷിക്കാനായി പ്രദര്‍ശനമേള സംഘടിപ്പിക്കുന്നത്.

നത്തം ഗാന്ധി എന്നയാളുടെ മയില്‍ വിഭാഗത്തില്‍പെടുന്ന പൂവന്‍ കോഴിയെ ഒന്നരലക്ഷം രൂപ വിലയ്ക്ക് വാങ്ങാന്‍ ആളുകള്‍ തയാറായെങ്കിലും ഉടമസ്ഥന്‍ വില്‍ക്കാന്‍ തയാറായില്ല. കോമപ്പെട്ടി ചിന്നപ്പന്‍ എന്നയാളില്‍നിന്നു മാസങ്ങള്‍ക്കുമുന്‍പ് 90,000 രൂപ വിലയ്ക്ക് നത്തം ഗാന്ധി വാങ്ങിയ പൂവന്‍കോഴിക്കാണ് ഒന്നര ലക്ഷം രൂപ വിലവന്നത്.

കഴിഞ്ഞ വര്‍ഷം നടന്ന പ്രദര്‍ശനത്തില്‍ ഒന്നര ലക്ഷം രൂപയ്ക്കു ബംഗളൂരു സ്വദേശി വാങ്ങിയ മയില്‍ ഇനത്തില്‍പെട്ട കോഴിയെ മൂന്നുലക്ഷം രൂപയ്ക്ക് ഒമാന്‍ സ്വദേശിക്കു മറിച്ചുവിറ്റിരുന്നു. ഇത്തവണ 20,000 രൂപമുതല്‍ ഒന്നര ലക്ഷം രൂപവരെ കിളിമൂക്ക് പൂവന്‍കോഴികള്‍ക്കു വിലവന്നു.

പ്രദര്‍ശനത്തിലെ മികച്ച പൂവന്‍ കോഴികള്‍ക്ക് സ്വര്‍ണ നാണയങ്ങള്‍, വെള്ളിനാണയങ്ങള്‍ എന്നിവ സമ്മാനമായി ലഭിച്ചു. കോഴികളുമായി പങ്കെടുത്ത മുഴുവന്‍ ആളുകള്‍ക്കും സര്‍ട്ടിഫിക്കറ്റുകള്‍ നല്‍്കി. കേരളം, തമിഴ്‌നാട്, ആന്ധ്രപ്രദേശ്, ഒറീസ, പശ്ചിമ ബംഗാള്‍ എന്നിവിടങ്ങളില്‍നിന്നുമാണ് ഇത്തവണ കോഴികളെ പ്രദര്‍ശനത്തിനായി എത്തിച്ചത്.