പണി കിട്ടിയ പുയ്യാപ്ല പറയുന്നു, 'ഒരിക്കലും ഒരു അര്ജന്റീന ആരാധകനോട് ഇങ്ങനെ പെരുമാറരുത്'!
കല്ല്യാണ ദിവസം തന്നെ വധുവിന്റെ വീട്ടുകാരുടെ കയ്യില് നിന്നും പണി കിട്ടിയ പുയ്യാപ്ലയെ മലപ്പുറത്തിന്റെ ഫുട്ബോള് കമ്പത്തിന് പുതിയ ഉദാഹരണമായി ചൂണ്ടിക്കാട്ടാം എന്നാണ് സോഷ്യല് ലോകത്തെ കമന്റുകള്. കല്ല്യാണ ദിവസം തന്നെ വധുവിന്റെ വീട്ടുകാരുടെ കയ്യില് നിന്നും പണി കിട്ടുക എന്നത് ഏറെ രസമുള്ള സംഗതിയാണ്.
സൗദി അറേബ്യയില് ജോലി ചെയ്യുന്ന, തിരൂരങ്ങാടി ചുള്ളിപ്പാറ സ്വദേശി ഇഹ്ജാസ് അസ്ലമിന്റെ വിവാഹം ശനിയാഴ്ചയായിരുന്നു. കൂട്ടിലങ്ങാടി സ്വദേശിനി മുബഷിറയാണ് വധു. ബ്രസീലിന്റെയും നെയ്മറിന്റെയും ആരാധകരാണ് മുബഷിറയുടെ സഹോദരനും അമ്മാവന്മാരും. ഇവരുമായി ഇഹ്ജാസ് വിവാഹത്തിനു മുന്പേ ഫാന് ഫൈറ്റ് തുടങ്ങിയിരുന്നു. വിവാഹദിനത്തില് വീടും മണിയറയും അര്ജന്റീന ജഴ്സിയില് അലങ്കരിക്കുമെന്നു ഇഹ്ജാസ് പ്രഖ്യാപിച്ചു കളഞ്ഞു!
ആ പ്രഖ്യാപനത്തിന് ഒരു മറുപണി അവര് വിവാഹവേദിയില് വച്ചു തന്നെ നടപ്പാക്കി. അര്ജന്റീനയുടെ കടുത്ത ആരാധകനായ അസ്ലമിന് തന്റെ വിവാഹദിനത്തില് അണിയേണ്ടിവന്നത് നെയ്മറുടെ ജഴ്സി. വരന്റെ അര്ജന്റീന പ്രേമം തിരിച്ചറിഞ്ഞ ഭാര്യവീട്ടുകാര് നിര്ബന്ധിച്ച് നെയ്മറുടെ ജഴ്സി അണിയിക്കുകയായിരുന്നു. ബ്രസീല് പതാകയുടെ ദൃശ്യമുള്ള കേക്കും മുറിച്ച് കഴിക്കേണ്ടിവന്നു.
താന് 'വെറുക്കുന്ന' ആ ജഴ്സിയണിഞ്ഞിന്റെ വേദനയില് ഇജ്ഹാസ് പറഞ്ഞു; മേലില് ഒരു അര്ജന്റീന ആരാധകനോടും ഇങ്ങനെ ചെയ്യരുത്. ഫുട്ബോള് ആരാധകന് മാത്രമല്ല കളിക്കാരനും കൂടിയാണ് ഇഹ്ജാസ്. സൗദിയില് ക്രൗണ് എന്ന ക്ലബില് കളിക്കുന്നുണ്ട്. ലയണല് മെസ്സിയാണ് ഇഷ്ടതാരം. വധു മുബഷിറയുടെ ആങ്ങളയും അമ്മാവന്മാരുമെല്ലാം ബ്രസീല് ഫാനാണെങ്കിലും, മുബഷിറ മെസ്സി ഫാനാണെന്നറിഞ്ഞതോടെ ഇജ്ഹാസിന് സമാധാനമായി.
'ഒരു പണി കിട്ടുമെന്ന് പ്രതീക്ഷിച്ചിരുന്നു, പക്ഷേ അത് ഇത്രേം വലിയ ദുരന്തമായിരിക്കുമെന്ന് അറിഞ്ഞില്ല. മുത്താണ് അര്ജന്റീന, മുത്തുമണിയാണ് മെസ്സി'. വിവാഹത്തിരക്കുകള്ക്കുശേഷം ഇഹ്ജാസ് ഫെയ്സ്ബുക്കില് കുറിച്ചു.
https://www.facebook.com/Malayalivartha
