അരനൂറ്റാണ്ടില് അധികകാലം മുമ്പ് സ്കൂളില് വച്ച് നഷ്ടപ്പെട്ട പഴ്സ് തിരികെ ലഭിച്ചു
പതിറ്റാണ്ടുകള്ക്കു മുമ്പ് നഷ്ടപ്പെട്ട പഴ്സ് 82-കാരിയായ ഉടമയ്ക്ക് തിരികെ ലഭിച്ചു. മര്ത്ത എവറെറ്റ് എന്നു പേരുള്ള വൃദ്ധയ്ക്കാണ് വര്ഷങ്ങള്ക്കു മുമ്പ് 1955-ല് വിദ്യാര്ഥിയായിരുന്നപ്പോള് നഷ്ടമായ പഴ്സ് തിരികെ ലഭിച്ചത്.
അമേരിക്കയിലെ ഇന്ത്യാനയിലുള്ള ജെഫെര്സണ് വില്ല ഹൈസ്ക്കൂളില് അറുപത്തി നാല് വര്ഷങ്ങള്ക്കു മുമ്പ് പഠിക്കുമ്പോഴാണ് മര്ത്തയ്ക്ക് പേഴ്സ് നഷ്ടമായത്. ഇത് കണ്ടെത്താന് മര്ത്ത ഏറെ തെരഞ്ഞുവെങ്കിലും നിരാശയായിരുന്നു ഫലം. പിന്നീട് അവര് തന്റെ ശ്രമം ഉപേക്ഷിക്കുകയും ചെയ്തു.
വര്ഷങ്ങള് കഴിഞ്ഞ് അടുത്തിടെ സ്കൂളിലെ പഴയ കെട്ടിടത്തില് അറ്റകൂറ്റപ്പണി നടത്തുന്നതിനിടെയാണ് ഈ പഴ്സ് ജീവനക്കാരുടെ ശ്രദ്ധയില്പ്പെട്ടത്. സ്കൂളിലെ സയന്സ് ക്ലാസ് റൂമിലായിരുന്നു ഈ പഴ്സ് കിടന്നിരുന്നത്. തുടര്ന്ന് മര്ത്തയെ കണ്ടെത്തി പഴ്സ് തിരികെ നല്കണമെന്ന് തീരുമാനിച്ചുറപ്പിച്ച സ്കൂള് അധികൃതര് അതിനായി സ്വീകരിച്ചത് സോഷ്യല്മീഡിയയുടെ സഹായമായിരുന്നു.
സ്കൂള് അധികൃതരുടെ കുറിപ്പ് സോഷ്യല്മീഡിയയില് കണ്ട മര്ത്തയുടെ ഒരു ബന്ധു ഇവരുമായി ബന്ധപ്പെടുകയും പിന്നീട് മര്ത്തയുമായി ബന്ധപ്പെടാന് അധികൃതരെ സഹായിക്കുകയും ചെയ്തു.മര്ത്ത ഇപ്പോള് താമസിക്കുന്നത് ഫ്ളോറിഡയിലാണ്. പഴ്സ് ഉടന് തന്നെ ഇവര്ക്ക് അയച്ചു നല്കുമെന്നും അധികൃതര് അറിയിച്ചു.
സ്കൂളിലെ ബാസ്ക്കറ്റ്ബോള് ഷെഡ്യൂള്, ലിപ്സ്റ്റിക്ക്, ഐഡന്റിറ്റി കാര്ഡ്, സ്കൂള് പ്രോമിന് തന്നോടൊപ്പം സംബന്ധിക്കണമെന്ന് ആവശ്യപ്പെടുന്ന ഒരു കുറിപ്പ് എന്നിവയൊക്കെയാണ് പേഴ്സിലുണ്ടായിരുന്നത്.
https://www.facebook.com/Malayalivartha
