ഫ്ലൈ വാഗമണ് ടീമിന്റെ ചരിത്രത്തിലെ ഏറ്റവും ദൈര്ഘ്യമേറിയ ആകാശയാത്രയുടെ റെക്കോര്ഡുമായി ജോബിന് ലാന്ഡ്ചെയ്തു കാഞ്ഞിരപ്പള്ളിയില്!
വാഗമണില്നിന്നു കാഞ്ഞിരപ്പള്ളിയിലേക്കു നിര്ത്താതെ ഒരു പറക്കല്! ഹെലികോപ്ടറില് ആണെന്ന് വിചാരിച്ചു കളയരുത് , ഒരു പാരാഗ്ലൈഡറിലായിരുന്നു ഈ സാഹസിക യാത്ര. ഫ്ലൈ വാഗമണ് ടീമിന്റെ ചരിത്രത്തിലെ ഏറ്റവും ദൈര്ഘ്യമേറിയ ആകാശയാത്ര നടത്തിയതിന്റെ റിക്കാര്ഡും ഏന്തയാര് സ്വദേശി ജോബിന് സെബാസ്റ്റ്യന് പോക്കറ്റിലാക്കി.
കേരള ടൂറിസം ആന്ഡ് യൂത്ത് വെല്ഫയര് ബോര്ഡിന്റെ അംഗീകാരത്തോടെ ഇടുക്കിയിലെ വാഗമണില് പ്രവര്ത്തിക്കുന്ന പാരാഗ്ലൈഡിംഗ് ക്ലബായ ഫ്ലൈ വാഗമണ് അംഗമാണ് ജോബിന്. വാഗമണ് മലനിരകളില്നിന്നു ഗ്ലൈഡറില് പറന്നുതുടങ്ങി. സമുദ്രനിരപ്പില്നിന്ന് 2,500 മീറ്റര് ഉയരത്തിലായിരുന്നു പ്രയാണം. നീലാകാശത്തില് റബര് കാടുകള്ക്കും മലനിരകള്ക്കും മീതെ വട്ടമിട്ട് ഒന്നര മണിക്കൂര്കൊണ്ട് ഏകദേശം 50 കിലോമീറ്റര് ആകാശ ദൂരം ചുറ്റിക്കറങ്ങി ജോബിന് കാഞ്ഞിരപ്പള്ളി സെന്റ് ഡൊമിനിക്സ് കോളജിന്റെ ഗ്രൗണ്ടിലാണ് പറന്നിറങ്ങിയത്.
വാഗമണില്നിന്നു തുടക്കമിടുമ്പോള് പരുന്തുംപാറയില് പോയി തിരികെ വരികയായിരുന്നു ആദ്യ ലക്ഷ്യമെന്നു ജോബിന് പിന്നീടു പറഞ്ഞു. എന്നാല്, കാലാവസ്ഥ അനുകൂലമാണെന്നു കണ്ടതോടെ കൂടെ ഗ്ലൈഡിംഗ് നടത്തിയ ഉത്തരേന്ത്യന് സ്വദേശി ടോഷിയോടു മുണ്ടക്കയത്തേക്കു പറന്നാലോയെന്നു ചോദിച്ചു. മുണ്ടക്കയം ബോയിസ് എസ്റ്റേറ്റിലെ റബര് മരങ്ങള് വെട്ടിമാറ്റിയത് അറിയാവുന്നതിനാല് അവിടെ സുരക്ഷിതമായി ഇറങ്ങാമെന്ന് ജോബിന് ടോഷിയോടു പറഞ്ഞു. ടോഷിയും സമ്മതിച്ചതോടെ ഗ്ലൈഡര് അവിടേക്കു പറത്തി.
അവിടെ എത്തിയപ്പോഴും അനുകൂലമായ അന്തരീക്ഷം. എങ്കില് പിന്നെ കാഞ്ഞിരപ്പള്ളിയിലേക്കു പറന്നാലോയെന്നായി ആലോചന. ടോഷിക്കും സമ്മതം. അങ്ങനെ കാഞ്ഞിരപ്പള്ളി ലക്ഷ്യമാക്കി. ഏകദേശം ഒന്നര മണിക്കൂറാണ് പാരാ ഗ്ലൈഡറില് പറന്നത്. മണിക്കൂറില് 20 മുതല് 70 കിലോമീറ്റര് വരെ വേഗത്തിലായിരുന്നു സഞ്ചാരം. ഒടുവില് കാഞ്ഞിരപ്പള്ളി സെന്റ് ഡൊമിനിക് കോളജ് ഗ്രൗണ്ടില് സുരക്ഷിതമായ ലാന്ഡിംഗ്.
10 വര്ഷമായി പാരാഗ്ലൈഡിംഗ് നടത്തുന്ന ജോബിന് ഇതിനോടകം 1,500 മണിക്കൂറിലേറെ പറന്നിട്ടുണ്ട്. ഇന്ത്യയിലെ വിവിധ സംസ്ഥാനങ്ങളില് പാരാഗ്ലൈഡിംഗ് മത്സരങ്ങളിലും പങ്കെടുത്തിട്ടുണ്ട്. കഴിഞ്ഞ വര്ഷം നടന്ന പ്രി വേള്ഡ്കപ്പ് ക്യാറ്റ് ടു അക്യുറസി ചാമ്പ്യന്ഷില് ടീം ബേസില് ഒന്നാമതായും വ്യക്തിഗത ഇനത്തില് ഏഴാമതായും പൂര്ത്തീകരിച്ചു. ഇന്റര്നാഷണല് ക്രോസ്കണ്ട്രി ചാമ്പ്യന്ഷിപ്പില് പങ്കെടുക്കാനുള്ള പരിശീലന ഭാഗമായിട്ടാണ് ഇപ്പോള് ദീര്ഘദൂര പറത്തല് നടത്തുന്നത്.
കഴിഞ്ഞ ഒളിമ്പിക്സില് പാരാഗ്ലൈഡിംഗ് ഒരു മത്സര ഇനമായിരുന്നെങ്കിലും ഇന്ത്യയില്നിന്ന് ആരും പങ്കെടുത്തില്ല. അടുത്ത വര്ഷങ്ങളില് നടക്കുന്ന പരിശീലന പറക്കലുകളില് പങ്കെടുത്ത് ഇന്ത്യയില്നിന്നുള്ള മത്സരാര്ഥിയായി ഒളിമ്പിക്സില് പങ്കെടുക്കാന് കഴിയുമെന്ന പ്രതീക്ഷയിലാണ് ടാന്ഡം പൈലറ്റുകൂടിയായ (മുന് പരിചയമില്ലാത്തവരെ ഒപ്പംകൂട്ടി പറക്കുന്ന) ഈ യുവ സാഹസികന്.ഏന്തയാര് അയിലൂക്കുന്നേല് ജോയി തങ്കമ്മ ദമ്പതികളുടെ മകനാണു ജോബിന്. സഹോദരങ്ങളായ ജോസിന്, ജോസ്മിന് എന്നിവര് ഉറച്ച പിന്തുണയുമായി ജോബിനൊപ്പമുണ്ട്.
https://www.facebook.com/Malayalivartha
