ആചാരങ്ങള് കൈവിടാതെ കൂത്തുപറമ്പിലൊരു നേപ്പാളി കല്യാണം!
കൂത്തുപറമ്പില് വച്ചാണ് വിവാഹം എങ്കിലും നേപ്പാളി പാരമ്പര്യരീതികളൊന്നും വിട്ടുകളയാന് അവര് ഒരുക്കമായിരുന്നില്ല. മുപ്പത് വര്ഷത്തിലേറെയായി കൂത്തുപറമ്പിലെ താമസക്കാരായ ജയരാജ് -കമല ദമ്പതികളുടെ മകള് തുളസി സുനാറിന്റെ വിവാഹമാണ് ഇന്നലെ ആഘോഷ പൊലിമയോടെ നടന്നത്. മുംബൈയില് ടെക്നീഷ്യന് ആയ നേപ്പാള് സ്വദേശി ജയാ സിംഗ് ആയിരുന്നു വരന്.
നഗരസഭാ സ്റ്റേഡിയത്തിന് സമീപത്തെ സിറ്റി ഓഡിറ്റോറിയത്തില് വച്ചായിരുന്നു നേപ്പാള് ആഘോഷ ചടങ്ങുകളോടെ വിവാഹം നടന്നത്. ചടങ്ങിന് പങ്കാളിയാകാന് ജയരാജിന്റെ കൂത്തുപറമ്പിലും പരിസരങ്ങളിലുമുള്ള സുഹൃത്തുക്കളായ നിരവധിയാളുകള് നേരത്തെ തന്നെ എത്തിയിരുന്നു. അത്കൊണ്ട് മലയാളി നാട്ടില് വച്ചു തന്നെ ഒരു നേപ്പാളി വിവാഹം കാണാന് അവര്ക്ക് അവസരമുണ്ടായി.
പാട്ടും മേളവും നൃത്തച്ചുവടുകളോടെയുമാണ് വരനെ വിവാഹ വേദിയിലേക്ക് ബന്ധുക്കളും സുഹൃത്തുക്കളും ആനയിച്ചത്. കഴുത്തില് നോട്ടുമാലയും അലങ്കാര മാലയും തലയില് തൊപ്പിയും ധരിച്ച വേഷത്തിലായിരുന്നു വരന്. വാഹനത്തില് നിന്ന് ഇറങ്ങിയ വരനെ പിന്നെ തോളിലേറ്റിക്കൊണ്ടായിരുന്നു വേദിക്കരികിലേക്ക് എത്തിച്ചത്.
അപ്പോഴേക്കും വരനെ സ്വീകരിക്കാന് പൂര്ണകുംഭങ്ങളുമായി പെണ്കുട്ടികളും വരന്റെ ബന്ധുക്കളും റെഡി. പിന്നെ മുതിര്ന്നവരുടെ വകയായി വരനെ ഷൂസണിയിക്കലും നെറ്റിയില് കുറി വരക്കലുമൊക്കെയായി വ്യത്യസ്തമായ ആചാരങ്ങള് വേറെയും.
ഇതിനു ശേഷമായിരുന്നു വേദിയിലെ വിവാഹ ചടങ്ങുകള്. വേഷങ്ങളിലും ആചാരങ്ങളിലും എല്ലാം നേപ്പാളി പാരമ്പര്യമാണ് കണ്ടത്. മുപ്പത് വര്ഷത്തിലേറെ സ്റ്റേഡിയത്തിന് സമീപത്തുള്ള സ്ഥാപനത്തിലെ ജീവനക്കാരനാണ് വധുവിന്റെ അച്ഛന് ജയരാജന്. അതിനാല് സുഹൃത്തുക്കളേയും ക്ഷണിച്ചിരുന്നു.
കൂത്തുപറമ്പില് നടന്ന നേപ്പാളി കല്യാണത്തിലെ മലയാളി പങ്കാളിത്തം , ആചാര വൈവിധ്യം കൊണ്ട് സമ്പുഷ്ടമായ നമ്മുടെ നാട്ടില് മറ്റുള്ളവരുടെ ആചാരാനുഷ്ഠാനങ്ങളെ എത്രമാത്രം മാനിക്കുന്നുവെന്നതിന്റെ നേര്സാക്ഷ്യമായി മാറിയിരിക്കുകയാണ്. ചടങ്ങുകള്ക്ക് ശേഷം നേപ്പാളി ഭക്ഷണം കൂടി കഴിച്ചപ്പോള് എല്ലാവര്ക്കും ഒരേ അഭിപ്രായം വിവാഹം അതിഗംഭീരമെന്ന്!
https://www.facebook.com/Malayalivartha