ധനപരിശോധനാ വിഭാഗത്തെ മച്ചി പശുവാക്കി; ചെലവു ചുരുക്കല് ഗോപി!
ഒറ്റമുണ്ട് മുറുക്കിയുടുക്കണമെന്ന് സര്ക്കാര് നിര്ബന്ധിക്കുമ്പോഴും മുറുക്കിയാണോ ഉടുക്കുന്നതെന്ന് പരിശോധിക്കാനുള്ള ധനകാര്യ പരിശോധന വിഭാഗത്തെ സര്ക്കാര് മച്ചി പശുവാക്കുന്നു. വിവിധ സര്ക്കാര് വകുപ്പുകളില് പരിശോധന നടത്താന് അധികാരമുള്ള ധനപരിശോധനാ വിഭാഗം മറ്റൊരു സര്ക്കാര് വകുപ്പായി തരം താഴുന്നു. ചെലവു ചുരുക്കണമെന്ന് നിരന്തരം ഉത്തരവുകള് ഇറക്കുന്ന ധനസെക്രട്ടറിയുടെ കീഴിലാണ് ധനപരിശോധനാ വിഭാഗം.
സര്ക്കാര് സഹായത്താല് പ്രവര്ത്തിക്കുന്ന ഏതു സ്ഥാപനത്തിലും പരിശോധന നടത്താനുളള അധികാരം ധനകാര്യപരിശോധന വിഭാഗത്തിനുണ്ട്. ചെലവു ചുരുക്കാന് പ്രതിബദ്ധരായ വകുപ്പുകള് പോലും പണം ധൂര്ത്തടിക്കുന്നു. മന്ത്രിമാരുടെ ഓഫീസുകളില് ധൂര്ത്ത് പൊടിപൊടിക്കുന്നു. മന്ത്രിയുടെ പ്രൈവറ്റ് സെക്രട്ടറിക്ക് മാത്രമാണ് ഔദ്യോഗികവാഹനം ഉപയോഗിക്കാന് അനുവാദമുള്ളത്. എന്നാല് മന്ത്രിയോഫീസില് തൂപ്പുകാര് പോലും സര്ക്കാര് വാഹനത്തിലാണ് സഞ്ചരിക്കാറുള്ളത്. സര്ക്കാര് വാഹനങ്ങളുടെ ദുരുപയോഗം തടഞ്ഞിരുന്നത് ധനകാര്യ പരിശോധന വിഭാഗമാണ്. എന്നാല് ഇപ്പോള് പേരിന് പോലും പരിശോധനകള് നടക്കുന്നില്ല. ഉന്നതതല ഇടപടലാണത്രേ കാരണം.
സര്ക്കാര് ഓഫീസുകള് ലക്ഷങ്ങളുടെ വാടകക്കാണ് പ്രവര്ത്തിക്കുന്നത്. മൂന്നുലക്ഷം വരെ പ്രതിമാസവാടകക്ക് പ്രവര്ത്തിക്കുന്ന സര്ക്കാര് സ്ഥാപനങ്ങളുണ്ട്. ഇത്തരം കെട്ടിടങ്ങളില് പലതും ഇഷ്ടക്കാരുടേതാണ്. വാടകകെട്ടിടങ്ങള് സര്ക്കാര് ഓഫീസുകള്ക്ക് 'ഒപ്പിച്ച് നല്കുന്ന' ലോബിയും കേരളത്തില് സജീവമാണ്. സര്ക്കാര് കെട്ടിടങ്ങള്ക്ക് വാടക നിശ്ചയിക്കുന്ന പൊതുമരാമത്ത് വകുപ്പില് കൈക്കൂലി കൊടുത്താല് എന്തും നടക്കും. സര്ക്കാര് കെട്ടിടങ്ങളുടെ അധിക വാടക കൈകാര്യം ചെയ്യേണ്ടതും ധനപരിശോധനാ വിഭാഗമാണ്. എന്നാല് വാടകയൊന്നും ഇവര് അറിഞ്ഞമട്ടില്ല.
ഡപ്യൂട്ടേഷനില് അഴിമതി സീറ്റുകള് കൈക്കലാക്കാന് ഉദ്യോഗസ്ഥര് നടത്തുന്ന ശ്രമങ്ങളും ധനപരിശോധനാ വിഭാഗം അറിയാറില്ല. വരവുള്ള സീറ്റുകള് തരപ്പെടുത്താന് ഉദ്യോഗസ്ഥര്ക്കിടയില് മത്സരമാണ്. വരവ് രണ്ടു തരമുണ്ട്. അഴിമതിയും നിയന്ത്രണമില്ലാത്ത യാത്രാബത്തയും, ചില സ്ഥാപനങ്ങളില് മാസം 20,000 രൂപ യാത്രാബത്ത വാങ്ങുന്ന ഉദ്യോഗസ്ഥര് പ്രവര്ത്തിക്കുന്നുണ്ട്. അസിസ്റ്റന്റായി ചെല്ലുന്ന ഇവര് അഡീഷണല് സെക്രട്ടറിയാകുന്നതു വരെ തുടരും.
https://www.facebook.com/Malayalivartha