അഫ്ഗാനിസ്ഥാനെതിരായ മത്സരത്തിനിടെ പന്തില് കൃത്രിമം കാട്ടിയ പുരാന് വിലക്ക്
വെസ്റ്റ് ഇന്ഡീസ്- അഫ്ഗാനിസ്ഥാന് ഏകദിന പരമ്പരയിലെ മൂന്നാം മത്സരത്തിനിടെ പന്തില് കൃത്രിമം കാട്ടിയ വെസ്റ്റിന്ഡീസ് താരം നിക്കോളാസ് പുരാനെ രാജ്യാന്തര ക്രിക്കറ്റ് കൗണ്സില് (ഐസിസി) സസ്പെന്ഡ് ചെയ്തു. ഇരുപത്തിനാലുകാരനായ പുരാന് പന്തിന്റെ സ്വാഭാവിക അവസ്ഥയില് ബോധപൂര്വം വ്യതിയാനം വരുത്തിയതിനാണ് കടുത്ത നടപടി. നാലു മത്സരങ്ങളില്നിന്നാണ് വിലക്ക്.
ലക്നൗവില് നവംബര് 11-ന് നടന്ന മൂന്നാം ഏകദിനത്തിനിടെ പുരാന് പെരുവിരലിന്റെ നഖമുപയോഗിച്ച് പന്തില് ചുരണ്ടുന്നതിന്റെ വിഡിയോ വ്യാപകമായി പ്രചരിച്ചിരുന്നു. ഇതിനു പിന്നാലെയാണ് താരത്തെ സസ്പെന്ഡ് ചെയ്ത് ഐസിസിയുടെ തീരുമാനം എത്തിയത്. പുരാന്റെ പേരില് അഞ്ച് ഡീമെറിറ്റ് പോയിന്റും ചുമത്തി. മൂന്നു മത്സരങ്ങളടങ്ങിയ പരമ്പര വിന്ഡീസ് തൂത്തുവാരിയിരുന്നു.
ഐസിസിയുടെ പെരുമാറ്റച്ചട്ടത്തിലെ ആര്ട്ടിക്കിള് 2.1.4 ലംഘിച്ചതിനാണ് നാലു മത്സരങ്ങളില്നിന്ന് വിലക്കിയത്. ലെവല് 3 കുറ്റമാണ് പുരാന് ചെയ്തതെന്ന് ഐസിസി കണ്ടെത്തി. ഇതിന്റെ പേരില് ലഭിച്ച നാല് സസ്പെന്ഷന് പോയിന്റുകള് ഫലത്തില് അഞ്ച് ഡീമെറിറ്റ് പോയിന്റുകളായി പുരാന്റെ പേരില് രേഖപ്പെടുത്തും. ഇതോടെ, വെസ്റ്റിന്ഡീസിന്റെ അടുത്ത നാല് ട്വന്റി20 മത്സരങ്ങളില് പുരാന് കളത്തിലിറങ്ങാനാകില്ല. നാല് സസ്പെന്ഷന് പോയിന്റുകള് രണ്ട് ടെസ്റ്റില്നിന്നോ നാല് ഏകദിന/ട്വന്റി20 മത്സരങ്ങളില്നിന്നോ താരത്തെ വിലക്കാന് പര്യാപ്തമാണ്. ചട്ടലംഘനം നടത്തുന്ന താരത്തിന്റെ ടീം ആദ്യം കളത്തിലിറങ്ങുന്ന മത്സരം ഏതാണോ അതനുസരിച്ചാണ് വിലക്കിന്റെ സ്വഭാവം തീരുമാനിക്കുക.
പുരാന്റെ കാര്യത്തില് വെസ്റ്റിന്ഡീസിന്റെ അടുത്ത മത്സരം അഫ്ഗാനിസ്ഥാനെതിരായ മൂന്നു മത്സരങ്ങളടങ്ങിയ ട്വന്റി20 പരമ്പരയാണ്. അതിനുശേഷം ഇന്ത്യയ്ക്കെതിരായ ട്വന്റി20 പരമ്പര. ഫലത്തില് മൂന്നു മത്സരങ്ങളടങ്ങിയ അഫ്ഗാനെതിരായ പരമ്പര പുരാന് പൂര്ണമായും നഷ്ടമാകും. ഇന്ത്യയ്ക്കെതിരായ ആദ്യ ട്വന്റി20യിലും പുരാന് കളത്തിലിറങ്ങാനാകില്ല.
പ്രസ്തുത മല്സരത്തില് ഓണ്-ഫീല്ഡ് അംപയര്മാരായിരുന്ന ബിസ്മില്ല ഷിന്വാരി, അഹമ്മദ് ദുറാനി എന്നിവര്ക്കൊപ്പം തേഡ് അംപയര് അഹമ്മദ് പാക്തീന്, ഫോര്ത്ത് അംപയര് ഇസത്തുല്ല സഫി എന്നിവര് ചേര്ന്നാണ് പുരാനെതിരെ കുറ്റം ചുമത്തിയത്. ഇക്കാര്യം സമ്മതിച്ച പുരാന്, മാച്ച് റഫറി ക്രിസ് ബ്രോഡ് ഏര്പ്പെടുത്തിയ ശിക്ഷയും ഏറ്റുവാങ്ങുകയായിരുന്നു.
'വിന്ഡീസ് ടീമിലെ എന്റെ സഹതാരങ്ങളോടും ആരാധകരോടും അഫ്ഗാന് ടീമിനോടും ലക്നൗവില് മത്സരത്തിനിടെ സംഭവിച്ച കാര്യങ്ങളില് ഞാന് നിരുപാധികം മാപ്പു ചോദിക്കുന്നു. ഞാന് തെറ്റുവരുത്തിയതായി തുറന്നു സമ്മതിക്കുന്നു. ഐസിസി തീരുമാനിച്ച ശിക്ഷയും ഏറ്റുവാങ്ങുന്നു. ലക്നൗവില് സംഭവിച്ചത് തീര്ത്തും ഒറ്റപ്പെട്ട സംഭവമാണെന്നും മേലില് ഇത്തരം തെറ്റുകള് ആവര്ത്തിക്കില്ലെന്നും ഉറപ്പു നല്കുന്നു. ഈ തെറ്റില്നിന്ന് പാഠം പഠിച്ച് കൂടുതല് കരുത്തോടെ തിരിച്ചെത്തുമെന്നും വാഗ്ദാനം ചെയ്യുന്നു' - ഐസിസി വിലക്കിനെക്കുറിച്ച് പുരാന് പ്രതികരിച്ചു.
https://www.facebook.com/Malayalivartha