കഴിഞ്ഞ വര്‍ഷം ഇംഗ്ലണ്ടില്‍ നടന്ന ഏകദിന ലോകകപ്പിന്റെ സെമി ഫൈനലില്‍ ന്യൂസിലാന്‍ഡിനെതിരേയാണ് എംഎസ് ധോണി അവസാനമായി ഇന്ത്യന്‍ ദേശീയ ടീമിനു വേണ്ടി കളിച്ചത്. അതിനു ശേഷം ദേശീയ ടീമില്‍ നിന്നു മാത്രമല്ല ക്രിക്കറ്റില്‍ നിന്നും അനിശ്ചിതമായി വിട്ടു നില്‍ക്കുകയായിരുന്നു അദ്ദേഹം. ഐപിഎല്ലില്‍ ചെന്നൈ സൂപ്പര്‍ കിങ്സിനു വേണ്ടി കളിച്ച് ക്രിക്കറ്റിലേക്ക് മടങ്ങിവരാന്‍ ധോണി തയ്യാറെടുക്കുകയായിരുന്നു. ഇതിനിടെയാണ് കൊറോണ വൈറസ് ഭീതിയെ തുടര്‍ന്ന് ഐപിഎല്‍ മാറ്റി വച്ചത്. ഈ വര്‍ഷം ഇനി ടൂര്‍ണമെന്റ് നടക്കുമോയെന്ന കാര്യം സംശയത്തിലാണ്.

അതിനിടെയാണ്, ടീം ഇന്ത്യ കണ്ട എക്കാലത്തെയും മികച്ച ക്യാപ്റ്റന്‍മാരില്‍ ഒരാളും വിക്കറ്റ് കീപ്പര്‍ ബാറ്റ്‌സമാനുമായ ധോനി ക്രിക്കറ്റിനോട് വിടപറയാന്‍ തയ്യാറെടുക്കുന്നതായുള്ള റിപ്പോര്‍ട്ട് പുറത്തുവരുന്നത്. ധോനിയോട് അടുത്ത വൃത്തങ്ങളെ ഉദ്ധരിച്ച് ദേശീയ മാധ്യമമായ സ്പോര്‍ട്സ്‌കീഡയാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. വിരമിക്കലിനെ കുറിച്ച് ബി.സി.സി.ഐയോട് ധോനി ഔദ്യോഗികമായി സംസാരിച്ചിട്ടില്ലെങ്കിലും തീരുമാനം അദ്ദേഹം കുടുംബത്തോടും അടുത്ത സുഹൃത്തുക്കളോട് പങ്കുവച്ചതായി റിപ്പോര്‍ട്ടില്‍ പറയുന്നു.

വിരമിക്കാന്‍ മാനസികമായി ധോണി തയ്യാറായിക്കഴിഞ്ഞു. അതേക്കുറിച്ച് തങ്ങളോട് സംസാരിക്കുകയും ചെയ്തിരുന്നു. എന്നാല്‍ ബിസിസിഐ ഒഫീഷ്യലുകളുമായി ധോണി ഇതേക്കുറിച്ചു സംസാരിച്ചിട്ടില്ല. ശരിയായ സമയത്തു തന്നെ അദ്ദേഹം ഇക്കാര്യം അവരെ അറിയിക്കുമെന്നും അടുത്ത സുഹൃത്തകള്‍ പറയുന്നു. ഐപിഎല്ലിനു മുമ്പ് എന്തായാലും ധോണി കളി നിര്‍ത്തില്ലെന്നാണ് അവര്‍ പറയുന്നത്. ഐപിഎല്ലിലെ സ്വന്തം പ്രകടനം കൂടി വിലയിരുത്തിയ ശേഷം മാത്രമേ വിരമിക്കുന്നതിനെക്കുറിച്ച് തീരുമാനമെടുക്കൂ. ഐപിഎല്ലിനു വേണ്ടിയാണ് ധോണി കാത്തിരുന്നത്. ഇല്ലായിരുന്നെങ്കില്‍ വളരെ മുമ്പ് തന്നെ അദ്ദേഹം കളി നിര്‍ത്തുമായിരുന്നുവെന്നും ബന്ധപ്പെട്ട അടുത്ത വൃത്തങ്ങള്‍ വ്യക്തമാക്കി.

2019-ലെ ഏകദിന ലോകകപ്പ് സെമിയില്‍ ന്യൂസീലന്‍ഡിനോട് തോറ്റ് ടീം പുറത്തായതിനുശേഷം ധോനി ഇന്ത്യന്‍ ജേഴ്സിയില്‍ കളിച്ചിട്ടില്ല. അനിശ്ചിതകാലമായി ക്രിക്കറ്റില്‍ നിന്ന് മാറിനില്‍ക്കുകയാണ് അദ്ദേഹം. അതേസമയം ഐ.പി.എല്‍ 2020 സീസണില്‍ ചെന്നൈ സൂപ്പര്‍ കിങ്സിനു വേണ്ടി കളത്തിലേക്ക് മടങ്ങിയെത്താന്‍ അദ്ദേഹം തയ്യാറെടുത്തുവരികയായിരുന്നു. ടീമിനൊപ്പം പരിശീലനത്തിനായി താരം ചെന്നൈയിലെത്തുകയും ചെയ്തിരുന്നു. എന്നാല്‍ കോവിഡ്-19 ആശങ്കയെ തുടര്‍ന്ന് ഐ.പി.എല്‍ മാറ്റിവെച്ചതോടെ കാര്യങ്ങള്‍ വീണ്ടും അനിശ്ചിതത്വത്തിലായി. മാര്‍ച്ച് 29 ഞായറാഴ്ച തുടങ്ങേണ്ടിയിരുന്ന ഐ.പി.എല്‍ ടൂര്‍ണമെന്റ് ഏപ്രില്‍ 15-ലേക്ക് മാറ്റിയിരുന്നു. എന്നാല്‍ നിലവിലെ സാഹചര്യത്തില്‍ ടൂര്‍ണമെന്റ് നടക്കുമെന്നു തന്നെ ഉറപ്പില്ല. ഇതിനെ തുടര്‍ന്ന് ധോനി ചെന്നൈയില്‍ നിന്ന് നാട്ടിലേക്ക് മടങ്ങുകയും ചെയ്തു.

ഐ.പി.എല്ലില്‍ മികവ് തെളിയിച്ചാല്‍ ഈ വര്‍ഷം ഓസ്ട്രേലിയയില്‍ നടക്കുന്ന ട്വന്റി 20 ലോകകപ്പില്‍ ധോനിക്ക് അവസരം ലഭിക്കുമെന്നായിരുന്നു റിപ്പോര്‍ട്ടുകള്‍. എന്നാല്‍ ടൂര്‍ണമെന്റ് തന്നെ അനിശ്ചിതത്വത്തിലായതോടെ ഈ സാധ്യതയും ഇല്ലാതായി. ഇതോടെയാണ് വിരമിക്കാന്‍ ധോനി മാനസികമായി തയ്യാറെടുത്തതെന്നും റിപ്പോര്‍ട്ടില്‍ പറയുന്നു. അതേസമയം ഒന്നോ രണ്ടോ ഐ.പി.എല്‍ സീസണില്‍ കൂടി ധോനി കളിച്ചേക്കുമെന്നും റിപ്പോര്‍ട്ടിലുണ്ട്. ഐ.പി.എല്ലിനു വേണ്ടിയാണ് ധോനി കാത്തിരുന്നതെന്നും ഇല്ലായിരുന്നെങ്കില്‍ നേരത്തെ തന്നെ വിരമിക്കല്‍ പ്രഖ്യാപിക്കുമായിരുന്നെന്നും അദ്ദേഹത്തിന്റെ സുഹൃത്തുക്കളെ ഉദ്ധരിച്ച് റിപ്പോര്‍ട്ടില്‍ പറയുന്നു.

ധോനിക്കുശേഷം വിക്കറ്റിനു പിന്നില്‍ അവസരം ലഭിച്ച രണ്ട് താരങ്ങള്‍ ഇപ്പോള്‍ ടീമിലുണ്ട്. ഋഷഭ് പന്തും കെ.എല്‍ രാഹുലും. ഇതില്‍ പന്തിന് ഏറെ പഴി കേള്‍ക്കേണ്ടി വന്നിട്ടുണ്ടെങ്കിലും രാഹുല്‍ വിശ്വസ്തനായ വിക്കറ്റ് കീപ്പര്‍ ബാറ്റ്സ്മാനായി വളര്‍ന്നു കഴിഞ്ഞു. ഇതും ടീമിലേക്ക് മടങ്ങിയെത്തുകയെന്ന ധോനിയുടെ സാധ്യതകളെ ഇല്ലാതാക്കുന്ന കാര്യമാണ്.