സൈനികരുടെ വീരമൃത്യുവിന്റെ പശ്ചാത്തലത്തില്‍ 'പിഎം കെയേഴ്‌സ്' ഫണ്ടിനെ വിമര്‍ശിച്ച് ട്വീറ്റ് ചെയ്ത ഡോക്ടറെ സിഎസ്‌കെ സസ്‌പെന്‍ഡ് ചെയ്തു, ഡോക്ടര്‍ വിശദീകരണം സഹിതം മാപ്പു ചോദിച്ചു
ഇന്ത്യ-ചൈന അതിര്‍ത്തിയിലെ സൈനികരുടെ വീരമൃത്യുവില്‍ രാജ്യം വേദനിക്കുമ്പോള്‍ രാഷ്ട്രീയപരമായ അഭിപ്രായ വ്യത്യാസം വിളിച്ചുപറഞ്ഞ് ട്വീറ്റ് ചെയ്തതിന് ചെന്നൈ സൂപ്പര്‍ കിങ്‌സ് മാനേജ്‌മെന്റ് സസ്‌പെന്‍ഡ് ചെയ്തിരുന്ന ടീം ഡോക്ടര്‍ മധു തോട്ടപ്പിള്ളില്‍ മാപ്പുപറഞ്ഞ് രംഗത്തെത്തി.
പൗരന്‍മാരുടെയും സൈന്യത്തിന്റെയും കാര്യത്തില്‍ ശ്രദ്ധ ചെലുത്തുന്ന പ്രധാനമന്ത്രിയേയോ സര്‍ക്കാരിനെയോ രക്തസാക്ഷികളായ സൈനികരെയോ അപമാനിക്കാന്‍ ഉദ്ദേശിച്ചായിരുന്നില്ല തന്റെ ട്വീറ്റെന്ന് ഡോ. മധു വിശദീകരിച്ചു. ഏതെങ്കിലും വ്യക്തികളുമായോ സംഘടനകളുമായോ തന്റെ ട്വീറ്റിന് ഒരു ബന്ധവുമില്ലെന്നും ഡോക്ടര്‍ മധു വ്യക്തമാക്കി.
2008-ല്‍ ഐപിഎല്ലിന് തുടക്കമായതു മുതല്‍ ചെന്നൈ സൂപ്പര്‍ കിങ്‌സിന്റെ ഔദ്യോഗിക ടീം ഡോക്ടറാണ് മധു തോട്ടപ്പിള്ളില്‍. 'ആ ശവപ്പെട്ടികളില്‍ പിഎം കെയേഴ്‌സ് സ്റ്റിക്കറുണ്ടാകുമോ? ഒരു ആകാംക്ഷ' - ഇതായിരുന്നു ഡോ. മധുവിന്റെ ട്വീറ്റ്. ഈ ട്വീറ്റ് പോസ്റ്റ് ചെയ്തതിനു പിന്നാലെ ഒട്ടേറെപ്പേരാണ് ഡോക്ടറെ വിമര്‍ശിച്ച് രംഗത്തെത്തിയത്. സംഭവം വിവാദമായതോടെ ഡോക്ടര്‍ ട്വീറ്റ് പിന്‍വലിക്കുകയും ചെയ്തു. എന്നാല്‍, ഇത്തരമൊരു വിഷയത്തില്‍ വിവാദ ട്വീറ്റിട്ട ഡോക്ടറെ സസ്‌പെന്‍ഡ് ചെയ്യാനായിരുന്നു ചെന്നൈ സൂപ്പര്‍ കിങ്‌സ് മാനേജ്‌മെന്റിന്റെ തീരുമാനം. ഇക്കാര്യം വ്യക്തമാക്കി അവര്‍ ട്വീറ്റും ചെയ്തു.
ഡോക്ടര്‍ മധു തോട്ടപ്പിള്ളില്‍ വിശദീകരണവുമായി ഇങ്ങനെ ട്വീറ്റ് ചെയ്തു:
ജൂണ്‍ 16-ന് ഞാന്‍ നടത്തിയ ഒരു ട്വീറ്റ് തെറ്റായിപ്പോയെന്ന് പിന്നീട് ബോധ്യപ്പെട്ടതിന്റെ അടിസ്ഥാനത്തില്‍ ഡിലീറ്റ് ചെയ്തിരുന്നു. പക്ഷേ, അതിനകം ആ ട്വീറ്റിന്റെ സ്‌ക്രീന്‍ ഷോട്ട് ആരോ പകര്‍ത്തുകയും ഇത് സമൂഹമാധ്യമങ്ങളിലാകെ പ്രചരിക്കുകയും ചെയ്തു. ഇന്ത്യന്‍ പൗരന്‍മാരെയും സൈന്യത്തെ ഒന്നാകെയും സംരക്ഷിക്കുന്നതിന് കേന്ദ്രസര്‍ക്കാരും ബഹുമാനപ്പെട്ട പ്രധാനമന്ത്രിയും നടത്തുന്ന നിതാന്ത പരിശ്രമങ്ങളെ കുറച്ചുകാണിക്കാനോ നമ്മുടെ ധീര രക്തസാക്ഷികളെ അപമാനിക്കാനോ ഉദ്ദേശിച്ചായിരുന്നില്ല ആ ട്വീറ്റ്. കോവിഡ് 19-നെ ചെറുക്കാന്‍ നമ്മുടെ സര്‍ക്കാര്‍ നടത്തുന്ന കഠിനാധ്വാനത്തെയും വിപരീത സാഹചര്യങ്ങളില്‍ രാജ്യം സംരക്ഷിക്കുന്ന ജവാന്‍മാരെയും അതിരറ്റ് ബഹുമാനിക്കുന്ന ഒരാളാണ് ഞാന്‍.
എന്റെ ട്വീറ്റ് മൂലം സങ്കടപ്പെടേണ്ടി വന്ന എല്ലാവരോടും ഹൃദയത്തിന്റെ ഭാഷയില്‍ മാപ്പു ചോദിക്കുന്നു. തീര്‍ത്തും അശ്രദ്ധവും പിഴവുനിറഞ്ഞതുമായിരുന്നു ആ ട്വീറ്റ്. അതിന് ഏതെങ്കിലും വ്യക്തികളുമായോ പ്രസ്ഥാനങ്ങളുമായോ യാതൊരു ബന്ധവുമില്ല.
നമ്മുടെ രാജ്യത്തെ പൗരന്‍മാര്‍ക്ക് സുരക്ഷിതമായ ജീവിതം ഉറപ്പാക്കാന്‍ സ്വന്തം ജീവിതം ബലികൊടുത്ത ധീര ജവാന്‍മാരുടെ കാര്യത്തില്‍ ബഹുമാനപ്പെട്ട പ്രധാനമന്ത്രി പുലര്‍ത്തുന്ന കരുതലിനെക്കുറിച്ച് ഞാന്‍ ബോധവാനാണ്. എന്റെ ഭാഗത്തുനിന്ന് സംഭവിച്ച ഒരു പിഴവായി ആ ട്വീറ്റിനെ കാണുമെന്നും എല്ലാം ഇവിടംകൊണ്ട് അവസാനിക്കുമെന്നും കരുതുന്നു. എന്റെ മുന്‍ ട്വീറ്റില്‍ വന്നുഭവിച്ച തെറ്റായ പരാമര്‍ശങ്ങള്‍ക്ക് ഒരിക്കല്‍ക്കൂടി ആത്മാര്‍ഥമായി ക്ഷമ ചോദിക്കുന്നു. ജയ് ഹിന്ദ്.
https://www.facebook.com/Malayalivartha
