ദുബായ് രാജ്യാന്തര സ്റ്റേഡിയത്തില്‍ നടന്ന മത്സരത്തില്‍ ശിഖര്‍ ധവാന്റെ സെഞ്ചുറിക്കരുത്ത് ഡല്‍ഹിക്ക് തുണയായില്ല. കിങ്‌സ് ഇലവന്‍ പഞ്ചാബ് അഞ്ച് വിക്കറ്റിന് ഡല്‍ഹിയെ തകര്‍ത്തു. തുടര്‍ച്ചയായ മൂന്നാം ജയത്തോടെ പഞ്ചാബ് പോയിന്റ് പട്ടികയില്‍ അഞ്ചാം സ്ഥാനത്തായി.

ടോസ് നേടിയ ഡല്‍ഹി ബാറ്റിങ് തിരഞ്ഞെടുക്കുകയായിരുന്നു. തുടര്‍ച്ചയായ രണ്ടാം സെഞ്ചുറി തികച്ച ധവാന്റെ (61 പന്തില്‍ 106*) ബലത്തില്‍ നിശ്ചിത 20 ഓവറില്‍ ഡല്‍ഹി അഞ്ച് വിക്കറ്റ് നഷ്ടത്തില്‍ 164 റണ്‍സെടുത്തു. 28 പന്തില്‍ അര്‍ധസെഞ്ചുറി തികച്ച ധവാന്‍, നേരിട്ട 57-ാം പന്തിലാണ് സെഞ്ചുറിയിലേക്ക് എത്തിയത്. ആദ്യമായാണ് ഐപിഎല്ലില്‍ ഒരു താരം തുടര്‍ച്ചയായ ഇന്നിങ്‌സുകളില്‍ സെഞ്ചുറി നേടുന്നത്. കഴിഞ്ഞ മത്സരത്തില്‍ ചെന്നൈയ്‌ക്കെതിരെയും ധവാന്‍ സെഞ്ചുറി നേടിയിരുന്നു.

ഓപ്പണര്‍ പൃഥി ഷായ്ക്ക് (11 പന്തില്‍ 7) ഇന്നും തിളങ്ങാനായില്ല. നാലാം ഓവറില്‍ ജെയിംസ് നീഷം ഷായെ മാക്സ്വെല്ലിന്റെ കൈകളില്‍ എത്തിച്ചു. പിന്നീട് എത്തിയ ക്യാപ്റ്റന്‍ ശ്രേയസ് അയ്യരും (12 പന്തില്‍ 14) കാര്യമായ സംഭാവന നല്‍കിയില്ല. ഒന്‍പതാം ഓവറില്‍ മുരുകന്‍ അശ്വിനാണ് ശ്രേയസിനെ മടക്കിയത്. ഋഷഭ് പന്ത് (20 പന്തില്‍ 14), മാര്‍ക്കസ് സ്റ്റോയിനിസ് (10 പന്തില്‍ 9) എന്നിവരും പെട്ടെന്ന് മടങ്ങി. ആറ് പന്തില്‍ 10 റണ്‍സെടുത്ത് ഷിമ്രോണ്‍ ഹെറ്റ്മയര്‍ അവസാന പന്തിലാണ് പുറത്തായത്. ഡല്‍ഹിക്കായി മുഹമ്മദ് ഷമി രണ്ടു വിക്കറ്റ് വീഴ്ത്തി.

165 റണ്‍സ് ലക്ഷ്യം പിന്തുടര്‍ന്ന് മറുപടി ബാറ്റിങ്ങിനിറങ്ങിയ പഞ്ചാബ് അര്‍ധസെഞ്ചുറി തികച്ച നിക്കോളാസ് പുരാന്റെയും (28 പന്തില്‍ 53), ഗ്ലെന്‍ മാക്‌സ്വെല്ലിന്റെയും (24 പന്തില്‍ 32) ഇന്നിങ്‌സുകളുടെ ബലത്തില്‍ 19-ാം ഓവറില്‍ അഞ്ച് വിക്കറ്റ് നഷ്ടത്തില്‍ ലക്ഷ്യം കണ്ടു. ഡല്‍ഹിക്കായി കഗിസോ റബാദ രണ്ടു വിക്കറ്റ് വീഴ്ത്തി.

മൂന്നാം ഓവറില്‍തന്നെ ക്യാപ്റ്റന്‍ കെ.എല്‍.രാഹുല്‍ പുറത്തായി. 11 പന്തില്‍ 15 റണ്‍സായിരുന്നു രാഹുലിന്റെ സമ്പാദ്യം. പിന്നാലെ ക്രീസിലെത്തിയ ക്രിസ് ഗെയ്ല്‍ തകര്‍പ്പന്‍ ഫോമിലായിരുന്നെങ്കിലും നീണ്ട ഇന്നിങ്‌സ് കളിക്കാനായില്ല. മായങ്ക് അഗര്‍വാളിന്റെ പ്രതിരോധ തന്ത്രവും വിലപ്പോയില്ല. ഒമ്പത് പന്തില്‍ അഞ്ച് റണ്‍സെടുത്ത അഗര്‍വാളിനെ അശ്വിന്റെ ഉജ്വല ത്രോയില്‍ ഋഷഭ് പന്ത് പുറത്താക്കി.

പിന്നീട് നിക്കോളാസ് പുരാനും ഗ്ലെന്‍ മാക്‌സ്വെല്ലും ചേര്‍ന്ന് നാലാം വിക്കറ്റില്‍ 69 റണ്‍സ് കൂട്ടിച്ചേര്‍ത്തു. 13-ാം ഓവറില്‍ അര്‍ധസെഞ്ചുറി തികച്ചതിനു പിന്നാലെ പുരാന്‍ പുറത്തായി. റബാദയുടെ ലീവ് ചെയ്ത ബോള്‍ പുരാന്റെ ഗ്ലൗസില്‍ തട്ടിയശേഷം ഋഷഭ് പന്തിന്റെ കൈകളില്‍ എത്തുകയായിരുന്നു.
മാക്‌സ്വെല്ലിനെ 16-ാം ഓവറില്‍ റബാദ തന്നെ പുറത്താക്കി. പിന്നീടെത്തിയ ദീപക് ഹൂഡയും (22 പന്തില്‍ 15), ജെയിംസ് നീഷവും (8 പന്തില്‍ 10) ബുദ്ധിപൂര്‍വം ബാറ്റ്‌വീശി പഞ്ചാബിനെ വിജയത്തിലെത്തിക്കുകയായിരുന്നു. 19 ഓവറിന്റെ അവസാനപന്തില്‍ സിക്‌സടിച്ചാണ് നീഷം വിജയലക്ഷ്യം മറികടന്നത്. ഡല്‍ഹിക്കായി അശ്വിനും അക്‌സര്‍ പട്ടേലും ഓരോ വിക്കറ്റും വീഴ്ത്തി.