ട്വന്‍റി 20 ലോകകപ്പിന്​ ശേഷം വിരാട്​ കോഹ്​ലി ഇന്ത്യയുടെ ഏകദിന, ട്വന്‍റി20 ടീമുകളുടെ നായക സ്​ഥാനം ഒഴിയുമെന്ന​ റിപ്പോര്‍ട്ടുകള്‍ തള്ളി ബി.സി.സി.ഐ ഒഫീഷ്യല്‍​. ഈ വിഷയത്തില്‍ ചര്‍ച്ചകളൊന്നും നടന്നിട്ടില്ലെന്നും എല്ലാം മാധ്യമ സൃഷ്​ടിയാണെന്നും ബി.സി.സി.ഐ ടോപ്​ ഒഫീഷ്യല്‍ അരുണ്‍ ധുമല്‍ എന്‍.ഡി.ടി.വി​യോട്​ പ്രതികരിച്ചു. കോഹ്​ലി തന്നെയാകും ക്യാപ്​റ്റനെന്ന്​ ധുമല്‍ ഉറപ്പിച്ചു പറഞ്ഞു.

ബാറ്റിങ്ങില്‍ കൂടുതലായി ശ്രദ്ധ കേന്ദ്രീകരിക്കുന്നതിനായി കോഹലി നായക സ്​ഥാനം ഒഴിയുമെന്ന്​ റിപ്പോർട്ടുകൾ ഉണ്ടായിരുന്നു. നിലവില്‍ 32കാരനായ കോഹ്​ലിയാണ്​ മൂന്ന്​ ഫോര്‍മാറ്റിലും ടീം ഇന്ത്യയെ നയിക്കുന്നത്​. ഏറെ നാളായി കോഹ്​ലി ഇതുസംബന്ധിച്ച്‌​ ബി.സി.സി.ഐയുമായും രോഹിത്തുമായും ചര്‍ച്ച ചെയ്യുന്നതായി റിപ്പോര്‍ട്ടില്‍ പറയുന്നു. 2014ല്‍ ആസ്​ട്രേലിയയില്‍ വെച്ച്‌​ ധോണി ടെസ്റ്റ്​ നായക സ്​ഥാനം ഒഴിഞ്ഞതോടെയാണ്​ കോഹ്​ലി നായക സ്​ഥാനത്ത്​ അവരോധിക്കപ്പെട്ടത്​. 2017ലാണ്​ മൂന്ന്​ ഫോര്‍മാറ്റിലെയും നായകനായത്​.

65 ടെസ്റ്റ്​ മത്സരങ്ങളില്‍ ഇന്ത്യയെ നയിച്ച കോഹ്​ലി 38 മത്സരങ്ങളില്‍ ഇന്ത്യയെ വിജയത്തിലെത്തിച്ചു. കോഹ്​ലിക്ക്​ കീഴില്‍ കളിച്ച 95 ഏകദിനങ്ങളില്‍ 65ലും ഇന്ത്യ വെന്നിക്കൊടി പാറിച്ചു. 45 ട്വന്‍റി20കളില്‍ 29ലും ഇന്ത്യക്കായിരുന്നു ജയം.

രണ്ട്​ ലോകകപ്പുകള്‍ മുന്നിലുള്ളതിനാല്‍ ബാറ്റിങ്ങില്‍ കൂടുതല്‍ മികവിലേക്കുയരണമെന്നാണ്​ കോഹ്​ലിയുടെ ചിന്ത. 2022ല്‍ ട്വന്‍റി20 ലോകകപ്പും 2023ല ഏകദിന ലോകകപ്പുമാണ്​ ലക്ഷ്യം​. ടീമിലെ ഏറ്റവും മുതിര്‍ന്ന താരങ്ങളില്‍ ഒരാളായ രോഹിത്​ ശര്‍മയും മികച്ച ഫോമിലാണ്​.

ഐ.പി.എല്ലില്‍ മുംബൈ ഇന്ത്യന്‍സിനെ തുടര്‍ച്ചയായി കിരീട ജേതാക്കളാക്കുന്ന രോഹിതിന്‍റെ ക്യാപ്​റ്റന്‍സി മികവ്​ ഐ.പി.എല്ലിലൂടെ തെളിയിക്കപ്പെട്ടതാണ്​. കോഹ്​ലിയുടെ അഭാവത്തില്‍ 10 ഏകദിനങ്ങളില്‍ രോഹിത്തിന്‍റെ കീഴില്‍ ഇറങ്ങിയ ഇന്ത്യ​ എ​ട്ടെണ്ണത്തിലും വിജയിച്ചു. 19 ട്വന്‍റി20കളില്‍ 15ലും വിജയിച്ച ഇന്ത്യ നാലെണ്ണത്തില്‍ മാത്രമാണ്​ തോറ്റത്​. ഐ.പി.എല്ലില്‍ 123 മത്സരങ്ങള്‍ നയിച്ച രോഹിത്ത്​ 74 മത്സരങ്ങളില്‍ വിജയിച്ചു. അഞ്ചു കിരീടങ്ങളാണ്​ രോഹിത്​ മുംബൈ ഇന്ത്യന്‍സിന്‍റെ അലമാരയില്‍ എത്തിച്ചത്​.