ഇന്ത്യയ്‌ക്കെതിരായ രണ്ടാം ക്രിക്കറ്റ് ടെസ്റ്റില്‍ ടോസ് നേടിയ ഓസ്‌ട്രേലിയ ബാറ്റിങ് തിരഞ്ഞെടുത്തു. നാഗ്പുര്‍ ടെസ്റ്റില്‍ കളിച്ച ടീമില്‍ ഒരു മാറ്റവുമായാണ് ഇന്ത്യ ഡല്‍ഹിയില്‍ രണ്ടാം ടെസ്റ്റിന് ഇറങ്ങുന്നത്.

സൂര്യകുമാര്‍ യാദവിനു പകരം ശ്രേയസ് അയ്യര്‍ ടീമില്‍ ഇടംനേടി. ഓസീസ് നിരയില്‍ രണ്ടു മാറ്റമുണ്ട്. മാറ്റ് റെന്‍ഷോയ്ക്കു പകരം ട്രാവിസ് ഹെഡ് ടീമിലെത്തിയപ്പോള്‍, മാത്യു കുനെമാന്‍ ടെസ്റ്റ് അരങ്ങേറ്റം കുറിക്കുകയും ചെയ്യും. അതേസമയം, മിച്ചല്‍ സ്റ്റാര്‍ക്ക് ഈ ടെസ്റ്റിലും കളിക്കുന്നില്ല.

ആദ്യ ടെസ്റ്റിലെ ഇന്നിങ്‌സ് ജയത്തോടെ പരമ്പരയില്‍ 10ന് മുന്നിലെത്തിയെങ്കിലും സമ്മര്‍ദം കൂടുതല്‍ ഇന്ത്യന്‍ ക്യാംപിലാണ്. ലോക ടെസ്റ്റ് ചാംപ്യന്‍ഷിപ് ഫൈനലില്‍ സ്ഥാനമുറപ്പിക്കാനായി ഈ പരമ്പരയില്‍ ഇന്ത്യയ്ക്ക് ഇനിയും 2 മത്സരങ്ങള്‍ കൂടി ജയിക്കേണ്ടതുണ്ട്. അരുണ്‍ ജയ്റ്റ്‌ലി സ്റ്റേഡിയത്തില്‍ രാവിലെ 9.30 മുതലാണ് മത്സരം.


ഓസ്‌ട്രേലിയയ്‌ക്കെതിരായ 2ാം ക്രിക്കറ്റ് ടെസ്റ്റിന് ഇന്ത്യ ഇന്നിറങ്ങുമ്പോള്‍ എല്ലാ കണ്ണുകളും ചേതേശ്വര്‍ പൂജാരയിലേക്ക്. കരിയറിലെ 100ാം ടെസ്റ്റ് മത്സരത്തില്‍ പൂജാരയുടെ ചേതോഹരമായ ഇന്നിങ്‌സിനു വേണ്ടിയാണ് ആരാധകരുടെ കാത്തിരിപ്പ്. 20ാം ടെസ്റ്റ് സെഞ്ചറിയെന്ന നാഴികക്കല്ലും പൂജാരയ്ക്കു തൊട്ടരികിലുണ്ട്.