ബംഗ്ലാദേശിനെതിരായ ലോകകപ്പ് മത്സരത്തില്‍ ഹാര്‍ദിക്കിന് പരുക്ക്... ഇന്ത്യയുടെ ലോകകപ്പ് ടീമില്‍ നിന്ന് ആള്‍ റൗണ്ടര്‍ ഹര്‍ദിക് പാണ്ഡ്യ പുറത്ത്....ഫാസ്റ്റ് ബൗളര്‍ പ്രസിദ്ധ് കൃഷ്ണയായിരിക്കും ഹാര്‍ദിക്കിന്റെ പകരക്കാരന്‍. ബംഗ്ലാദേശിനെതിരായ ലോകകപ്പ് മത്സരത്തില്‍ പരിക്കേറ്റതിനെ തുടര്‍ന്നാണ് ഹാര്‍ദിക്കിനെ ടീമില്‍ നിന്നും മാറ്റിയത്.

ഇന്ത്യക്കായി 19 ഏകദിന മത്സരങ്ങളിലാണ് പ്രസിദ്ധ് കൃഷ്ണ കളിച്ചത്.ലോകകപ്പിന് മുമ്പ് ആസ്‌ട്രേലിയക്കെതിരെ നടന്ന ഏകദിന പരമ്പരയില്‍ ഡേവിഡ് വാര്‍ണറിന്റെ വിക്കറ്റെടുത്ത് പ്രസിദ്ധ് കൃഷ്ണ ശ്രദ്ധ നേടിയിരുന്നു.

അന്താരാഷ്ട്ര മത്സരങ്ങളില്‍ ഇതുവരെ 33 വിക്കറ്റുകള്‍ പ്രസിദ്ധ് സ്വന്തമാക്കിയിട്ടുണ്ട്. ജസ്പ്രീത് ബുംറ, മുഹമ്മദ് ഷമി, മുഹമ്മദ് സിറാജ് എന്നിവരുള്‍പ്പെട്ട ഇന്ത്യയുടെ മാരക പേസ് നിരയോടാണ് ടീമിലെ സ്ഥാനത്തിനായി പ്രസിദ്ധിന് മത്സരിക്കേണ്ടത്.


ഒക്ടോബര്‍ 19ന് ബംഗ്ലാദേശിനെതിരെ നടന്ന മത്സരത്തില്‍ ഹാര്‍ദിക്കിന് കാലിന് പരിക്കേല്‍ക്കുകയായിരുന്നു. പിന്നീട് ന്യൂസിലാന്‍ഡിനും ഇംഗ്ലണ്ടിനും ശ്രീലങ്കക്കുമെതിരെ നടന്ന ലോകകപ്പ് മത്സരങ്ങളില്‍ ഹാര്‍ദിക് കളിച്ചിരുന്നില്ല.

സെമി ഫൈനലിന് മുമ്പായി ഹാര്‍ദിക് കളിക്കളത്തിലേക്ക് തിരിച്ചെത്തുമെന്നായിരുന്നു ബി.സി.സി.ഐയുടെ പ്രതീക്ഷ. എന്നാല്‍, സെമി ഫൈനലിന് ഒരുങ്ങുന്ന ടീം ഇന്ത്യയെ സംബന്ധിച്ചിടത്തോളം കനത്ത തിരിച്ചടിയാണ് ഹാര്‍ദിക്കിന്റെ അഭാവം.