ലോകകപ്പില്‍ ഇന്ന് ന്യൂസിലന്‍ഡും ശ്രീലങ്കയും തമ്മിലുള്ള മത്സരത്തില്‍ ശ്രീലങ്കയെ തോല്‍പ്പിച്ച് കിവീസ്. അഞ്ച് വിക്കറ്റിനാണ് കിവീസ് വിജയിച്ചത്. ശ്രീലങ്ക 46.4 ഓവറില്‍ 171 റണ്‍സിന് ഓള്‍ ഔട്ടാവുകയായിരുന്നു. കിവികള്‍ 23.2 ഓവറില്‍ അഞ്ച് വിക്കറ്റ് നഷ്ടത്തില്‍ 172 റണ്‍സുമായി വിജയതീരത്തെത്തി.

ഡിവോണ്‍ കോണ്‍വേയും (45), രചിന്‍ രവീന്ദ്രയും (42), ഡരില്‍ മിച്ചല്‍ (43) എന്നിവരാണ് ന്യൂസിലന്‍ഡിനായി തിളങ്ങിയത്. നായകന്‍ കെയ്ന്‍ വില്യംസണെ (14) മാത്യൂസ് ബൗള്‍ഡാക്കുകയായിരുന്നു. മാര്‍ക്ക് ചാംപ്മാന് (7) ഓട്ടത്തിടയില്‍ വിക്കറ്റ് നഷ്ടപ്പെടുത്തി. ഗ്ലെന്‍ ഫിലിപ്സും (17) ടോം ലാതമും (2) ന്യൂസിലന്‍ നിരയില്‍ ഔട്ടാവാതെ നിന്നു.

ശ്രീലങ്കയെ ബാറ്റിങ്ങിനയച്ച ശേഷം അക്ഷരാര്‍ത്ഥത്തില്‍ ന്യൂസിലന്‍ഡ് ബൗളര്‍മാര്‍ തകര്‍ത്താടുകയായിരുന്നു. അര്‍ധ സെഞ്ച്വറി നേടിയ കുശാല്‍ പെരേരയാണ് (51) ശ്രീലങ്കന്‍ നിരയിലെ ടോപ് സ്‌കോറര്‍. മഹീഷ് തീക്ഷണ 91 പന്തില്‍ 38 റണ്‍സടിച്ചു. ട്രെന്റ് ബൗള്‍ട്ട് മൂന്നും ലോക്കി ഫെര്‍ഗൂസന്‍, മിച്ചല്‍ സാന്റ്നര്‍, രചിന്‍ രവീന്ദ്ര എന്നിവര്‍ രണ്ട് വീതവും വിക്കറ്റുകള്‍ നേടി. ടിം സൗത്തി ഒരു വിക്കറ്റ് നേടി.

ശ്രീലങ്കയെ തകര്‍ത്തതോടെ ന്യൂസിലന്‍ഡ് സെമി പ്രതീക്ഷകള്‍ സജീവമാക്കി. ശ്രീലങ്കയെ തോല്‍പ്പിച്ചതുവഴി 10 പോയിന്റുമായി ന്യൂസിലന്‍ഡ് സെമിയിലേക്ക് ഒരുപടി കൂടി അടുത്തു. അവസാന നാലിലെത്താന്‍ മറ്റ് മത്സരങ്ങളുടെ ഫലമാണ് ഇനി അനുകൂലമാവേണ്ടത്. ബംഗ്ലാദേശിനോട് ഏറ്റ തോല്‍വിയോടെ ശ്രീലങ്കയുടെ എല്ലാ പ്രതീക്ഷകള്‍ അവസാനിച്ചിരുന്നു.