ട്വന്റി20 ലോകകപ്പില്‍ ബംഗ്ലദേശിനെ മൂന്നു വിക്കറ്റിന് തകര്‍ത്താണ് ഓസ്‌ട്രേലിയ ആദ്യ വിജയം ആഘോഷിച്ചത്. ബംഗ്ലദേശ് ഉയര്‍ത്തിയ 157 റണ്‍സ് വിജയലക്ഷ്യം പിന്തുടര്‍ന്ന ഓസ്‌ട്രേലിയ ഒന്‍പതു പന്തും മൂന്നു വിക്കറ്റും ബാക്കി നില്‍ക്കെ ലക്ഷ്യത്തിലെത്തി. അര്‍ധസെഞ്ചുറിയുമായി തിളങ്ങിയ ഓപ്പണര്‍ ഉസ്മാന്‍ ഖവാജയാണ് (45 പന്തില്‍ 58) ഓസീസിനെ വിജയത്തിലേക്ക് നയിച്ചത്. ആദ്യജയത്തോടെ ഓസ്‌ട്രേലിയ സെമി പ്രതീക്ഷകള്‍ നിലനിര്‍ത്തിയപ്പോള്‍ തുടര്‍ച്ചയായ രണ്ടാം പരാജയം രുചിച്ച ബംഗ്ലദേശിന്റെ നില പരുങ്ങലിലായി.

സ്‌കോര്‍: ബംഗ്ലദേശ് – 20 ഓവറില്‍ അഞ്ചിന് 156. ഓസ്‌ട്രേലിയ – 18.3 ഓവറില്‍ ഏഴിന് 157.

ബംഗ്ലദേശ് ഉയര്‍ത്തിയ 157 റണ്‍സ് വിജയലക്ഷ്യവുമായിറങ്ങിയ ഓസ്‌ട്രേലിയയ്ക്ക് ഓപ്പണര്‍മാരായ ഖവാജയും വാട്‌സണും ചേര്‍ന്ന് നല്‍കിയത് ഉജ്വല തുടക്കം. 44 പന്തില്‍ ഇരുവരും കൂട്ടിച്ചേര്‍ത്തത് 62 റണ്‍സ്. 15 പന്തില്‍ 21 റണ്‍സെടുത്ത വാട്‌സന്‍ റണ്ണൗട്ടായി. പിന്നീടെത്തിയ ക്യാപ്റ്റന്‍ സ്റ്റീവന്‍ സ്മിത്ത് (13 പന്തില്‍ 14), ഡേവിഡ് വാര്‍ണര്‍ (14 പന്തില്‍ 17), ഗ്ലെന്‍ മാക്‌സ്‌വെല്‍ (15 പന്തില്‍ 26) തുടങ്ങിയവര്‍ മികച്ച പ്രകടനം കാഴ്ച വച്ചു. വിജയത്തിനടുത്ത് മിച്ചല്‍ മാര്‍ഷ് (ആറു പന്തില്‍ ആറ്), ജോണ്‍ ഹേസ്റ്റിങ്‌സ് എന്നിവരെ അടുത്തടുത്ത് നഷ്ടപ്പെട്ടെങ്കിലും ഫോക്‌നര്‍ (മൂന്നു പന്തില്‍ അഞ്ച്), പീറ്റര്‍ നെവില്‍ (1) എന്നിവര്‍ ചര്‍ന്ന് ഓസ്‌ട്രേലിയയെ വിജയത്തിലെത്തിച്ചു. ബംഗ്ലദേശിനായി ഷാക്കിബ് അല്‍ഹസന്‍ മൂന്നും മുസ്താഫിസുര്‍ റഹ്മാന്‍ രണ്ടു വിക്കറ്റും വീഴ്ത്തി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha