പാണ്ഡ്യക്കു സെഞ്ചുറി നഷ്ടം !; ഇന്ത്യ ആദ്യ ഇന്നിംഗ്സില് 209 റണ്സിന് പുറത്ത്
ടീം ഇന്ത്യയെ ഒറ്റയ്ക്കു ചുമലിലേറ്റി പറന്ന ഹാര്ദിക് പാണ്ഡ്യയുടെ മികവില് ടീം ഇന്ത്യ ആദ്യ ഇന്നിംഗ്സില് 209 റണ്സ് സ്വന്തമാക്കി. ഒരു മുഴു ദിവസം പോലും പിടച്ചുനില്ക്കാനാവാതെ ദക്ഷിണാഫ്രിക്കന് സ്കോറിനു 77 റണ്സിനു പിന്നിലായി ഇന്ത്യ ഒന്നാം ഇന്നിംഗ്സ് അവസാനിപ്പിച്ചു. സെഞ്ചുറിയുടെ വക്കില് വീണുപോയ പാണ്ഡ്യയാണ് ഇന്ത്യയെ കരകയറ്റിയത്. 95 പന്ത് നേരിട്ട് 93 റണ്സ് അടിച്ചുകൂട്ടിയ പാണ്ഡ്യ റബാഡയുടെ പന്തില് ക്വിന്റന് ഡീകോക്കിനു പിടികൊടുത്ത് മടങ്ങുമ്ബോള് ടീം ഇന്ത്യ അത്യാസന്നനില തരണം ചെയ്തിരുന്നു.
ഏകദിന ശൈലിയില് ദക്ഷിണാഫ്രിക്കന് പേസര്മാരെ കടന്നാക്രമിച്ചു മുന്നേറിയ പാണ്ഡ്യക്കു അര്ഹിച്ച സെഞ്ചുറിയാണ് നഷ്ടമായത്. റബാഡയുടെ ഉയര്ന്നു പൊങ്ങിയ പന്തില് ബാറ്റുവച്ച പാണ്ഡ്യക്കു പിഴച്ചു. പാണ്ഡ്യ ക്വിന്റന് ഡീകോക്കിന്റെ കൈകളില് ഭദ്രം. പാണ്ഡ്യയുടെ വിക്കറ്റില് ആഹ്ലാദിച്ച് ഓടിയടുത്ത റബാഡയുടെ നെറുകയില് ദക്ഷിണാഫ്രിക്കന് ക്യാപ്റ്റന് ഡുപ്ലസിയുടെ ചുംബനം. അത്ര വിലപ്പെട്ടതായിരുന്നു ദക്ഷിണാഫ്രിക്കയ്ക്കു പാണ്ഡ്യയുടെ വിക്കറ്റ്. പാണ്ഡ്യ വീണതോടെയാണ് ദക്ഷിണാഫ്രിക്ക റിലാക്സേഷന് മൂഡിലായത്.
92 റണ്സിന് ഏഴു വിക്കറ്റെന്ന നാണക്കേടില്നിന്ന് പാണ്ഡ്യയും ഭുവനേശ്വര് കുമാറും (25) ചേര്ന്നാണ് രക്ഷിച്ചത്. ഏകദിന ശൈലിയില് ഒരു വശത്ത് പാണ്ഡ്യ തകര്ത്തടിച്ചപ്പോള് മറുവശത്ത് അക്ഷോഭ്യനായി ഭുവിനിന്നു. ഇരുവരും എട്ടാം വിക്കറ്റില് 99 റണ്സിന്റെ കൂട്ടുകെട്ടാണ് സൃഷ്ടിച്ചത്. ഭുവി-പാണ്ഡ്യ കൂട്ടുകെട്ട് പൊളിഞ്ഞതിനു പിന്നാലെ ഇന്ത്യ 200 കടന്നെങ്കിലും ഇന്നംഗ്സിനു ആയുസ് നീട്ടാന് മുഹമ്മദ് ഷമിക്കും (4) ബുംമ്രയ്ക്കും (2) കഴിഞ്ഞില്ല.
നേരത്തെ മൂന്നിന് 28 റണ്സെന്ന നിലയില് രണ്ടാം ദിനം ബാറ്റിംഗ് ആരംഭിച്ച ഇന്ത്യയുടെ വഴിക്കായിരുന്നില്ല കളി. പച്ചപ്പുല്ലില് കുത്തി ഉയരുന്ന പന്തുകള്ക്കു മുന്നില് ഇന്ത്യന് പിച്ചലെ വില്ലാളിവീരന്മാര് ബാറ്റുവച്ചുകീഴടങ്ങി. ചേതേശ്വര് പുജാര (26) മാത്രമായിരുന്നു അല്പ്പമെങ്കിലും പിടിച്ചുനിന്നത്. രോഹിത് ശര്മ (11), അശ്വിന് (12), സാഹ (0) എന്നിവരും വന് പരാജയമായി. കളി കൈവിട്ട ഘട്ടത്തിലായിരുന്നു പാണ്ഡ്യയുടേയും ഭുവിയുടേയും രക്ഷാപ്രവര്ത്തനം.
https://www.facebook.com/Malayalivartha