ക്രിസ്മസ് ആഘോഷത്തില്‍ മുങ്ങി നില്‍ക്കുന്ന ഗോവയ്ക്ക് ഇരട്ടി മധുരം നല്‍കാന്‍ ഐഎസ്എല്‍ രണ്ടാം സീസണിന്റെ ഒടുവിലത്തെ അങ്കത്തിന് ഗോവയില്‍ ഇന്നെറങ്ങുന്നു.. ഇന്ന് രാത്രി ഏഴിന് ഫേറ്റോര്‍ദ സ്‌റ്റേഡിയത്തില്‍ കലാശക്കളിയില്‍ ലീഗിലെ വമ്പന്‍മാരായ രണ്ടു സംഘങ്ങള്‍ കൊമ്പുകോര്‍ക്കും. സീക്കോയുടെ എഫ്‌സി ഗോവയും മാര്‍കോ മറ്റെരാസിയുടെ ചെന്നൈയിന്‍ എഫ്‌സിയും. ഫേറ്റോര്‍ദ സ്‌റ്റേഡിയത്തിലേക്കുള്ള വഴികള്‍ ക്രിസ്മസിന് അഞ്ചുദിവസം മുമ്പുതന്നെ ആഘോഷത്തിമിര്‍പ്പിലാണ്. കഴിഞ്ഞ പതിപ്പില്‍ സെമിയില്‍ പുറത്തായ രണ്ടു സംഘങ്ങളുടെ ഏറ്റുമുട്ടലാണ് ഇന്ന്. കഴിഞ്ഞ പതിപ്പില്‍ ചെന്നൈയിന്‍ എഫ്‌സി കേരള ബ്‌ളാസ്‌റ്റേഴ്‌സിനോട് അവസാനനിമിഷം വഴങ്ങിയ ഗോളിന് പുറത്തായി. ഇരുപാദങ്ങളിലും മുഴുവന്‍സമയത്ത് ഗോള്‍ പിറക്കാതിരുന്നപ്പോള്‍ ഗോവയ്ക്ക് അത്‌ലറ്റികോ ഡി കൊല്‍ക്കത്തയുമായി പെനല്‍റ്റിയിലെത്തേണ്ടിവന്നു. ആദ്യ കിക്കെടുത്ത ആന്ദ്രെ സാന്റോസിന്റെ പിഴവ് അവരെ പുറത്തേക്കു നയിച്ചു. ഇതേ മൈതാനത്തിലാണ് അവര്‍ കീഴടങ്ങിയത്. ഇക്കുറി അതു തിരുത്തേണ്ടതുണ്ട്.
സുവര്‍ണപാദുകം കാത്തുനില്‍ക്കുന്ന കൊളംബിയന്‍ സ്‌െ്രെടക്കര്‍ സ്റ്റീവന്‍ മെന്‍ഡോസയാണ് ചെന്നൈയിന്റെ ആക്രമണങ്ങളുടെ കുന്തമുന. രണ്ട് ഹാട്രിക് ഉള്‍പ്പെടെ 12 ഗോള്‍. മൂന്നുതവണ കൂട്ടുകാര്‍ക്ക് അവസരമൊരുക്കി. ലീഗിലെ ശക്തരെന്ന് പോരുകേട്ട അത്‌ലറ്റികോ ഡി കൊല്‍ക്കത്തക്കെതിരെ ഇരുപാദങ്ങളിലും മെന്‍ഡോസയുടെ കളിമികവാണ് ചെന്നൈയിന് കരുത്തായത്. ലീഗില്‍നിന്നു പുറത്താകുമെന്ന സ്ഥിതിയില്‍നിന്ന് ഫൈനലില്‍വരെ എത്തിയതിന് ചെന്നൈയിന്‍ മെന്‍ഡോസയെന്ന അധ്വാനിയായ കളിക്കാരനോട് കടപ്പെട്ടിരിക്കുന്നു.
അത്‌ലറ്റികോയില്‍നിന്നെത്തിയ കീപ്പര്‍ അപൌല എദെലും തകര്‍പ്പന്‍ രക്ഷപ്പെടുത്തലോടെ മികച്ചുനിന്നു. ജെജെ ലാല്‍പെഖുലെയും ഫിക്രു ടഫേരയും എലാനോ ബ്‌ളുമറും ബ്രൂണോ പെല്ലിസാറിയും അണിനിരന്നാല്‍ ഗോവന്‍ പ്രതിരോധത്തിന് പിടിപ്പതു പണിയാകും. മെയ്ല്‍സണെയും ബെര്‍ണാഡ് മെന്‍ഡിയെയും മധ്യത്തില്‍ നിര്‍ത്തി മറ്റെരാസി ഒരുക്കുന്ന പ്രതിരോധവും ശക്തംതന്നെ. പ്രളയത്തിന്റെ ദുരിതത്തിലായ ചെന്നൈയിലെ ആരാധകര്‍ക്കുവേണ്ടി കിരീടം നേടുമെന്ന് എലാനോ പറഞ്ഞുകഴിഞ്ഞു.
മുന്നേറ്റക്കാരന്‍ റെയ്‌നാള്‍ഡോയുടെ പരിക്ക് ഗോവന്‍നിരയില്‍ തലവേദനയുണ്ടാക്കും. ഏഴു ഗോളുകളോടെ മികച്ച പ്രകടനമാണ് ബ്രസീലിയന്‍ താരം കഴിഞ്ഞ കളികളില്‍ പുറത്തെടുത്തത്. റെയ്‌നാള്‍ഡോ കളത്തിലിറങ്ങുമോയെന്ന് ഇതുവരെ ഉറപ്പായിട്ടില്ല. എങ്കിലും റാഫേല്‍ കൊയ്‌ലോയും ജൊഫ്രിയും ലിയോ മോറയും ഉള്‍പ്പെടുന്ന മുന്നേറ്റത്തിന് ചെന്നൈയിന്‍ പ്രതിരോധത്തെ മറികടക്കാനുള്ള കരുത്തുണ്ട്. ആദ്യപാദ സെമിയില്‍ ഡല്‍ഹിയോട് ഒറ്റഗോളിനു തോറ്റ ഗോവ റെയ്‌നാള്‍ഡോയുടെ അഭാവത്തിലും മൂന്നു ഗോളിന് രണ്ടാംപാദം പിടിച്ചെടുത്തിരുന്നു.
നൈജീരിയന്‍ താരം ഡുഡുവും ഇന്ത്യന്‍ ജോഡിയായ മന്ദാര്‍റാവു ദേശ്മുഖും റോമിയോ ഫെര്‍ണാണ്ടസും ചെന്നൈയിന്‍ ഏരിയയില്‍ അപകടവുമായെത്തും. മൂന്നംഗ പ്രതിരോധത്തില്‍ ബ്രസീലിയന്‍ ലൂസിയോ മെന്‍ഡോസയുടെ നീക്കങ്ങള്‍ക്ക് തടയിടും. പോരാട്ടം ഇരുവരും തമ്മിലുള്ള ടെന്നീസ് കളിയല്ലെന്ന് ലൂസിയോ പറഞ്ഞെങ്കിലും കളത്തില്‍ നടക്കാന്‍പോകുന്നത് അതുതന്നെയാകും. ഗോള്‍വല കാക്കുന്ന ലക്ഷ്മികാന്ത് കട്ടിമണി സുവര്‍ണ കൈയുറ പോരാട്ടത്തില്‍ എദെലിന് ഭീഷണിയാണ്. കലാശക്കളിയില്‍ കട്ടിമണിയുടെ സംഭാവന ഗോവയ്ക്ക് നിര്‍ണായകമാകും.
രണ്ടു സീസണിലായി കളിച്ച രണ്ടു കളിയിലും ചെന്നൈയിന്‍ ഫത്തോര്‍ദയില്‍ തോല്‍വിയറിഞ്ഞിട്ടില്ല. ഇക്കുറി ഇവിടെ ഗോവയെ 4-0ന് തകര്‍ത്താണ് അവര്‍ പോരാട്ടം തുടങ്ങിയത്. ആ വിജയത്തിന്റെ ഓര്‍മ ചെന്നൈയിന് നല്‍കുന്നത് വന്‍ ഊര്‍ജമാകും. പക്ഷേ ഇക്കുറി ആ മുന്‍തൂക്കം കിട്ടില്ലെന്നാണ് ചെന്നൈയിന്‍ പരിശീലകന്‍ മാര്‍കോ മറ്റെരാസിയുടെ പക്ഷം. സീക്കോയുടെ അഭിപ്രായവും അതുതന്നെ. ഇന്ന് പുതിയ ദിവസം, പുതിയ കളി. ഇരുവരും പറഞ്ഞത് അതാണ്.
എന്നാല്‍ ഗോവയിലെ കാണികളുടെ മുന്നില്‍ ചെന്നൈയിന് പക്ഷേ എഫ്‌സി ഗോവയില്‍നിന്ന് കടുത്ത വെല്ലുവിളിയാകും നേരിടേണ്ടിവരിക. ഇതേ മൈതാനത്ത് ആദ്യപതിപ്പില്‍ കൊല്‍ക്കത്തയോടു സംഭവിച്ചത് ആവര്‍ത്തിക്കാതിരിക്കാന്‍ ഗോവ എല്ലാ അടവുപ്രയേഗിച്ചാകും ഇന്ന് ഇറങ്ങുക.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha